وزبەك وزىپ، قىرعىز قاپىدا قالدىرىپ كەتتى ءبىزدى

استانا. قازاقپارات - جاسىراتىنى جوق قازاقستان سپورتتاعى جەتىستىكتەرىن كورشى وزبەكستانمەن سالىستىرادى.

مەيلى فۋتبول بولسىن، مەيلى بوكس بولسىن بۇل ەكى ەل اراسىنداعى ۇزاق جىلداردان بەرگى تارتىس ءالى دە جالعاسىپ كەلەدى، دەپ جازادى «الاش ايناسى» گازەتى.

بۇل تارتىس برازيليا جەرىندە وتكەن الەم بىرىنشىلىگى بارىسىندا دا بولدى.

بارشاڭىزعا بەلگىلى بۇل تۋرنيرگە قازاقستان دا وزبەكستان قاتىسقان جوق. ءبىزدىڭ قۇراما ىرىكتەۋ توبىندا سوڭعى ورىنداردىڭ ءبىرىن الىپ، بۇل بىرىنشىلىككە ماڭايلاماسا دا، وزبەكستان قۇراماسىنىڭ وڭتۇستىك امەريكاعا ساپار شەگۋىنە ەكى-اق قادام جەتپەدى. ەگەر، ەلەكتىك سىندا ولار يوردانيا قۇراماسىن جەڭگەن بولسا، وندا «الا تاقيالى اعايىندارىمىز» ۋرۋگۆاي قۇراماسىمەن الەم چەمپيوناتىنىڭ جولداماسىنا تالاساتىن ەدى.

وزبەكستان قۇراماسى الەم چەمپيوناتىن قاتىسپاسا دا، برازيلياداعى بىرىنشىلىك بارىسىندا بۇل ەكى ەل اراسىنداعى تەكە-تىرەستە كورشىمىزدىڭ مەرەيى ۇستەم بولدى. سەبەبى، وزبەكستان اتىن فۋتبول تويىندا باس تورەشى قورعادى. ول - رافشان يرماتوۆ.

رافشاننىڭ رەكوردى

قازىرگى تاڭدا يرماتوۆتى تانىمايتىن فۋتبول جانكۇيەرى كەمدە-كەم. ول ەڭ اۋەلى ميلليونداردىڭ ويىنىنا اينالعان سپورت تۇرىندە 2010 - جىلى وار وتكەن الەم بىرىنشىلىگىنىڭ شىمىلدىعىن اشىپ تانىلدى.

«قارا قۇرلىقتا» رافشان 5 ماتچقا باس قازى بولىپ تاعايىندالدى. سوندىقتان دا 2014 برازيلياعا ازيا قۇرلىعىنان تورەشىلەر تاڭدالعان كەزدە حالىقارالىق فۋتبول قاۋىمداستىعىنىڭ (ف ي ف ا) تاڭداۋى بىردەن قايتا يرماتوۆقا ءتۇستى.

نەگىزى يرماتوۆتار جانۇياسىمەن سپورتقا جاقىن. ونىڭ اكەسى سايفيددين يرماتوۆ كەزىندە كسرو جوعارعى بىرىنشىلىگىندە قازىلىق ەتكەن. ال، رافشاننىڭ ءوزى جاس كەزىندە فۋتبولشى بولعان ەكەن. «رافشان ءتورت جاسار كەزىندە كورشىلەرىمىز ونى ۆەلوسيپەدپەن قىدىرتىپ جۇرگەن.

ءسويتىپ ءبىر كەزدە ەسكى شايتاناربانىڭ سەپى ىرشىپ كەتىپ، رافشاننىڭ اياعىنا كىرىپ كەتتى. ول اياعىن قيمىلداتا الماي، التى اي بويى ەمحانادا جاتتى. باستاپقىدا دارىگەر ءتىپتى ونىڭ وڭ اياعىن كەسىپ تاستايمىز دا دەگەن ەدى. ءبىراق، قۇدايعا شۇكىر، ول جازىلىپ، دوپ تەبۋگە دە شاماسى جەتەتىن بولدى. ءبىراق، قارسىلاسپەن سوقتىعىسقان سايىن ەسكى جارانىڭ بەتى اشىلىپ كەتە بەردى. سوندىقتاندا دارىگەرلەر رافشانعا فۋتبول وياۋعا تيىم سالدى. نەگىزى مەن ونى مىقتى فۋتبولشى ەتىپ شىعارامىن دەپ ويلادىم. دەگەنمەن دە ول كەيىننەن تورەشى بولىپ كەتتى»، - دەيدى ۇلى تۋرالى سايفيددين يرماتوۆ.

جاراقاتىنا بايلانىستى يرماتوۆ «گازالكەنت» كومانداسىنان كەتىپ، تورەشىلەر تاربيەلەيتىن مەكتەپكە ءتۇسىپ، اعىلشىن ءتىلىن ۇيرەنەدى. رافشاننىڭ «قارا قىلدى قاق جاراتىن» قازى دەڭگەيىنە جەتۋ ءۇشىن اكەسىنىڭ ەڭبەگى كوپ.

ول اۋەلدە ۇلىنىڭ ماتچتا ساۋاتتى تورەلىك ەتۋ ءۇشىن بەينەكامەرا ساتىپ الىپ، ونىڭ بارلىق ويىندارىن تاسپاعا جازىپ، كەيىننەن ۇيىندە ەكەۋى بىرلەسە وتىرىپ ساراپتايتىن بولعان. تىنىمسىز ەڭبەكتىڭ ارقاسىندا ول 23 جاسىندا فۋتبولدان وزبەكستاننىڭ جوعارى بىرىنشىلىگىنە قازىلىق ەتەدى. ال ارادا ەكى جىل وتكەن سوڭ ف ي ف ا يرماتوۆتى ءوز قاتارىنا قابىلدايدى.

«2003 - جىلى، 25 جاسىمدا مەنى ف ي ف ا ءوز قاتارىنا قوسىپ، 17 جاسقا دەيىندى جاسوسپىرىمدەر اراسىنداعى الەم چەمپيوناتىندا جۇمىس ىستەۋگە رۇقسات بەردى. ال 2007 - جىلى كانادا مەن 20 جاسقا دەيىن جاستار اراسىنداعى الەم چەمپيوناتىندا جۇمىس ىستەدىم.

سودان كەيىن يەمەندە وتكەن كلۋبارالىق الەم چەمپيوناتىنىڭ فينالدىق كەزدەسۋىندە قازى بولدىم. جالپى، الەم چەمپيوناتىنا باراردىڭ الدىندا مەن 5-6 ءىرى تۋرنيرلەرگە قاتىستىم. سوندىقتان دا مەن الەم بىرىنشىلىگىندە وزىمە تولىق سەنىمدى بولدىم»، -  دەيدى ءوزىنىڭ العاشقى تۋرنيرى تۋرنالى يرماتوۆ.

ازيادا ءساتتى قازىلىق جاساپ جۇرگەن 36 جاستاعى رافشاندى بيىل دا ف ي ف ا ەش ويلانباستان الەم چەمپيوناتىنا شاقىردى. ءجاي عانا شاقىرىپ قويماي، وزبەك تورەشىسىنە ءتورت كەزدەسۋدى سەنىپ تاپسىردى. يرماتوۆ بۇل بىرىنشىلىك بارىسىندا نەگىزى التى كەزدەسۋدە باز قازى بولار ەدى. ءبىراق، ارگەنتينا ويناعان1/8 جانە فينالدىق كەزدەسۋلەردە بۇل تورەشىنىڭ جۇمىس ىستەۋىنە الەحاندرو سابەليا جىگىتتەرى قارسى بولدى.

دەگەنمەن دە سول ءتورت كەزدەسۋدىڭ ارقاسىندا ول الەم چەمپيوناتتارىندا ەڭ كوپ تورەشىلىك ەتكەن قازى بولىپ، تاريحتا قالدى. يرماتوۆ جالپى الەم بىرىنشىلىگى بارىسىندا توعىز كەزدەسۋدە جۇمىس ىستەدى. (بەس كەزدەسۋ -  و ا ر-دا، ءتورت كەزدەسۋ -  برازيليادا).

وسىلايشا وزبەك قازىسى ەنشىلەرىندە سەگىز ماتچتان بار يسپاندىق جوەل كينو، ۋرۋگۆايلىق حورحە لارريوندا جانە مەكسيكالىق بەنيتو ءارچۋنديدىڭ رەكوردىن بۇزدى.

رافشان «وزبەكستان ماقتانىشى»

الەم بىرىنشىلىگىن ابىرويمەن وتكىزىپ كەلگەننەن كەيىن رافشان يرماتوۆتى وزبەك اعايىندارىمىز الاقاندارىنا سالىپ، وعان «وزبەكستان ماقتانىشى» دەگەن اتاق بەرىلدى. ودان بولەك، وزبەكستاننىڭ پرەزيدەنتى اتىنان «ەل جانە جۇرت قۇرمەتى» (ەل-يۋرت حۋرماتي) وردەنىمەن ماراپاتتالدى. وردەندى تورەشىگە ەلدىڭ پرەمەر-ءمينيسترى شاۆكات ميرزيەيەۆ تابىستادى.

بۇل ماراپاتتاردان بولەك وزبەك تورەشىسىنە ەل پرەزيدەنتى يسلام كارىموۆ سۋ جاڭا Chevrolet Malibu كولىگىن مىنگىزسە، ونىڭ قاپتالداعى كومەكشىسى ابدۋحاميدوللو راسۋلوۆقا Chevrolet Orlando تەمىر تۇلپارى بەرىلدى. ايتا كەتەيىك، ابدۋحاميدوللو يرماتوۆپەن بىرگە الەم بىرىنشىلىگىندەگى بارلىق توعىز كەزدەسۋدە كومەكتەسكەن.

قىرعىز دا قاپى قالدىردى ءبىزدى

يرماتوۆتىڭ رەكوردىنا قىرعىزستاندىق تورەشى باحادىر قوشقاروۆتىڭ دا ەلەۋلى ۇلەسى بار. ول رافشان قازىلىق ەتكەن ەكى الەم بىرىنشىلىگىندە دە وزبەك تورەشىسىنىڭ قاپتالداعى سەنىمدى سەرىگى بولعان. باحادىر تەك قانا كومەكشى بولىپ قويماي، الەم چەمپيوناتى بارىسىندا رەكورد ورناتىپ، ءوزىنىڭ تاڭباسىن قالدىردى.

قىرعىزستاندىق تورەشى ءبىر كەزدەسۋدە 16 مارتە فۋتبولشىنىڭ ويىننان تىس قالعانىن (وففسايد) تۋرا انىقتاعان. بۇل الەم چەمپيوناتى بارىسىندا قاپتالداعى تورەشىنىڭ ەڭ كوپ تىركەگەن وففسايدى. سوندىقتان دا بۇل تورەشىگە ف ي ف ا ارنايى التىن مەدال بەردى.

بىلە ءجۇرىڭىز

ف ي ف ا-نىڭ تاراتقان رەسمي اقپاراتى بويىنشا الەم بىرىنشىلىگە شاقىرتىلعان ءاربىر تورەشى 15 مىڭ ا ق ش دوللارىن الادى ەكەن. ال ءاربىر جۇمىس ىستەگەن ماتچ ءۇشىن قازىنىڭ ەسەپ-شوتىنا 50 مىڭ دوللار اۋدارىلادى.

ايتا كەتەيىك

ءبىزدىڭ قازىلاردان الەم بىلاي تۇرسىن كارى قۇرلىقتى باعىندىرعانى وسى ۋاقىتقا دەيىن جوق ەدى. ءبىراق، جاقىندا جاعىمدى جاڭالىق ەستىدىك. ەل فۋتبولىنىڭ تاريحىندا تۇڭعىش رەت قازاقستان تورەشىلەر كورپۋسىنىڭ وكىلى ەۋروپا چەمپيوناتىنىڭ فينالدىق كەزدەسۋىندە قازىلىق جاسايتىن بولدى. ۆەنگريا جەرىندە ءوتىپ جاتقان 19 جاسقا دەيىنگى جاستار اراسىنداعى دودانىڭ فينالدىق كەزەڭىنە بەلگىلەنگەن تورەشىلەر قۇرامىنا تارازدىق ەۆگەني بەلسكي ەنىپ وتىر.

اۆتور: ۋاليحان قوسانباي