09:46, 31 - شىلدە 2014 | GMT +5
امەريكاندىق ۇشاق شۇعىل تۇردە نيۋ-يورك اۋەجايىنا قايتا قونۋعا ءماجبۇر بولدى
استانا. قازاقپارات - American Eagle امەريكاندىق اۋە كومپانياسىنىڭ جولاۋشىلار ۇشاعى شۇعىل تۇردە نيۋ-يوركتىڭ لا-گۋارديا اۋەجايىنا قوندى.
لاينەر ۇشقىشتاردىڭ كابيناسىنان ءتۇتىن شىعۋىنا بايلانىستى اۋەجايعا قايتا ورالۋعا ءماجبۇر بولعان.
اۋە كەمەسى نيۋ-يوركتەن نوكسۆيللعا (تەننەسسي شتاتى) باعىت العان. اۋەجايدان كوتەرىلگەن سوڭ، كوپ ۇزاماي ۇشقىشتاردىڭ كابيناسىنان ءتۇتىن بايقالعان، سوعان بايلانىستى ەكيپاج كومانديرى وسىنداي شەشىم قابىلداعان.
ۇشاق جەرگە قونعاننان كەيىن بارلىق 44 جولاۋشى مەن 3 ەكيپاج مۇشەسى سىرتقا شىعارىلدى. زارداپ شەككەندەر جوق. بولعان جاعدايعا بايلانىستى لا-گۋارديادان ۇشۋى ءتيىس بىرنەشە رەيس توقتاتىلدى.
