الىشەر كارىموۆ قاي جەردەن قاتەلەستى؟
اتالعان دودادا الىشەر ءوزىن جوعالتىپ الدىم دەپ سانايدى. بايقاۋدىڭ قاتىسۋشىلارى ۇيىمداستىرۋشىلاردىڭ ايتقانىن ىستەپ، بارلىق شارتتارىمەن كەلىسۋگە ءماجبۇر بولعان. ال، ولار بولسا كونكۋرسانتتاردىڭ وبرازىن وزدەرىنىڭ قالاۋىنشا وزگەرتكەن.
«مەن ەرمەكسازداي يلەندىم. مەنىڭ دايىنداپ كەلگەن وبرازىم قابىلدانبادى. ءتىپتى ورىنداۋ مانەرىمە دە وزگەرىستەر ەنگىزدى. الىپ بارعان ساحنالىق كوستيۋمىمدى كيگىزبەدى. ءبىرىنشى ءاندى ايتۋعا ماجبۇرلەدى، ەكىنشى ءانىم «ءاليانى» ورىنداۋعا رۇقسات بەرمەدى. ونى ايتا الاتىن رەسەيدە ءانشى جوق دەپ. ال، ءۇشىنشى «ارينە» انىنە كەلگەندە، ۇيىمداستىرۋشىلار ورىس تىلىنە اۋدارۋ كەرەك دەپ قويمادى.
ءبىز نەگە وزگە انشىلەردىڭ اندەرى اۋدارىلمايتىنىن سۇراعاندا، ولار «جاڭا تولقىندى تەك قازاقستاندا كورمەيدى» دەگەن جاۋاپ الدىق. ءسويتىپ، قىرعىزستان مەن قازاقستاننان كەلگەن انشىلەردىڭ اندەرى ورىس تىلىنە اۋدارىلدى. ءبىراق، ول ءان قازاق تىلىندە جازىلعان، وزگە تىلدە ايتىلۋى ۇلكەن كەمشىلىك بولدى. مۇمكىن وسىنىڭ ءبارى قازىلاردىڭ باعاسىنا اسەر ەتكەن شىعار»، - دەدى الىشەر كارىموۆ.
ءانشىنىڭ ايتۋىنشا، «جاڭا تولقىندا» ونەردەن باسقا بارلىق نارسە سايىسقا تۇسەدى.
«مۇندا تەك تالانتتان باسقا بارلىق نارسە سىنالاتىنىن بايقادىم. بۇرىن وزگە انشىلەر كوڭىلى قايتىپ كەلگەن كەزدەردە سەنبەيتىن ەدىم. قازىر ءوزىمنىڭ كوزىم جەتتى»، - دەدى ول.
اۆتور: گۇلميرا عوسمانالي
