ورىس قىزىنىڭ ويلاعانى قازاق تەاترىنىڭ قامى
اعا ۇرپاق قازاق تىلىندە ءان شىرقاعان ءۇش بۇلبۇل - ءۇش تاتيانانى ءالى ۇمىتا قويعان جوق.
تاتيانا بۋرميستروۆا، تاتيانا مارتىنەنكو، تاتيانا پولتاۆسكايالار كەزىندە «تاماشانىڭ» كونسەرتىنە قاتىسىپ، كورەرمەننىڭ كوزايىمىنا اينالعان ەدى.
كەيىننەن ساحنادان كورىنبەي كەتكەندە «قايدا ءجۇر ەكەن؟» دەپ ەلەڭدەپ ىزدەگەندەر از بولعان جوق. سول تاتيانالاردىڭ ءبىرى - بۋرميستروۆا وسىدان از ۋاقىت بۇرىن وڭتۇستىك ولكەسىنە گاسترولدىك ساپارمەن كەلگەن ەدى.
قازاقتىڭ قارا ولەڭىن ءوز ناقىشىندا ورىنداپ كورەرمەننىڭ كوڭىلىنەن شىققان ءانشىنى وڭتۇستىك جۇرتى قۇرمەتپەن قارسى العان بولاتىن. كونسەرتتەن ەكى كۇن بۇرىن ءانشى جۋرناليستەرمەن باسپا ءسوز ءماسليحاتىن وتكىزدى.
مادەنيەت، ونەر جايلى ەركىن سۇحبات ورنادى. قازاقتىڭ ءتىلىن قازاقتان ارتىق بىلەتىن ورىس قىزىنىڭ ادەبي تىلدە مانەرلەپ، ماقامداپ سويلەگەنىنەن ءتىپتى قارا سوزدەن قايماق ايىرىپ جۇرگەن ءتىلشى قاۋىم جەر شۇقىعانداي بولدى.
بۇگىندە كوڭىلگە كىربىڭ ءتۇسىرىپ جۇرگەن جايتتاردى تەرمەلەپ، وزىندىك پىكىرىن دە ورتاعا سالدى. «ولەڭ ادامنىڭ جانىن ەمدەيدى، كوكىرەك كوزىن وياتادى. ادامعا تۇك جاراسپايدى، دانالىق قانا جاراسادى. بۇگىندە كوكىرەگىنە ءسوزدىڭ ساۋلەسى تۇسپەيتىندەر كوبەيدى... مەن ءبىر تەرىنىڭ ىشىندە ءبىر ورىس، ءبىر قازاقپىن. مەنىڭ كونسەرتىمنەن شىققاندار كوشەدەگى جامان ورىستاردى قۇدالارىمىز دەيدى. مەنىڭ ەكى تىلدە ءان شىرقاپ، دومبىرادا شەبەر ويناپ جۇرگەنىم ادامنىڭ بەرگەنى ەمەس، اللانىڭ بەرگەنى...» دەگەن ەدى.
تەك قازاقشا عانا ءان ايتا ما دەسەك، تاتيانامىز وزبەكشە دە ادەمى شىرقايدى ەكەن. وبلىستىق وزبەك گازەتىنەن كەلگەن ءتىلشى وزبەكشەلەپ سۇراق قويىپ، وزبەكشە ءان ايتىپ بەرۋىن وتىنگەندە تاڭ قالعانىمىز راس. راسىندا تاتيانانىڭ ونەرىنە ريزا بولعان ارىپتەسىمىز ول ءان شىرقاعاندا ورنىنان تۇرىپ قوشەمەت كورسەتىپ، بيلەدى-اي كەلىپ. تالانتىنا تالايدى تابىندىرعان تاتيانانىڭ كونسەرتىندە كورەرمەن كوپ بولعان جوق. ءبىراق ولاردىڭ ءبارى دە ونىڭ ونەرىنە باس يەتىن، شىنايى تىڭدارماندار ەدى. دومبىرامەن تەرمەنى ناشىنە كەلتىرىپ ورىنداعاندا «وسى بىزدە تەرمە ايتاتىن قانداستارىمىزدان وزا شاۋىپ بايگە العان كىم بار ەدى؟» دەگەن ويعا قالدىق.
كوبىنە مۇقاعاليدىڭ مۇڭعا تولى اندەرىن اۋەلەتكەندە زالدا تولقىپ، تەبىرەنىپ، كوزىنە جاس الىپ وتىرىپ تىڭداعاندار كوپ بولدى. «مۇقاعاليدىڭ اندەرىن ەسترادامەن تىڭداعاندا ءبىر بولەك، دومبىرامەن ورىنداعاندا ءبىر ەرەك بولادى ەكەن-اۋ» دەپ تاڭدانىسىن جاسىرا الماعاندار دا بولدى. سول كەشتە تاتيانا وسى كونسەرتتەن تۇسكەن قارجىعا جەتىساي تەاترىنا ساحنالىق پەردە تىككىزىپ بەرمەك ويىن ايتتى. قالاي ريزا بولماسسىڭ؟!
حالىققا قىزمەت ەتەتىن ورىننىڭ جارقىراپ تۇرعانىن قالاعان تاتيانانىڭ بۇل تەڭىزدىڭ قاسىنداعى تامشىداي بولسا دا شىن قامقورلىعىنا ريزا بولعان جۇرت ۇزاق قول شاپالاقتاپ تۇرىپ العان ەدى. قارىن قامىن كۇيتتەۋدەن اۋلاق شىن جاناشىر تالانتتىڭ تاعى ءبىر قىرىنا قانىعىپ ريزا بولدىق. مۇنى ەرلىك دەپ اسىرا باعالاعانى نەسى دەيتىندەر دە تابىلار. ەلگە، جەرگە دەگەن سۇيىسپەنشىلىكتى ۇرانداتپاي-اق وسىنداي كىشكەنە عانا ىزەتپەن-اق بىلدىرۋگە بولادى ەمەس پە؟
قازىرگى ەل ارالاپ گاسترولدە جۇرگەن انشىلەرىمىزگە كونسەرتتەن تۇسكەن قارجىنى قالاي جاراتاسىڭ دەسەڭ «كليپ تۇسىرەمىن، ساحنالىق كيىم تىكتىرەم، ءان جازدىرام» دەيدى. دۇرىس-اق. تالانتىن تۇنشىقتىرماي ەلگە تانىلسىن. ەلگە تانىلۋ ءۇشىن نە كەرەك، كليپ ءتۇسىرۋ كەرەك، جاقسى ءان ساتىپ الۋى كەرەك. ولاردى دا تۇسىنۋگە بولادى... دەگەنمەن تاتيانانىڭ ەرلىگىن قايتالايتىن بىرەۋى بولسايشى دەگەن ارمان عوي بىزدىكى...
اۆتور: گۇلجان كوشەروۆا
«الاش ايناسى»
