مال شارۋاشىلىعىن دامىتۋدىڭ ماسەلەسى تالقىلاندى

استانا. قازاقپارات - بۇگىن قىزىلوردا وبلىسىندا مال شارۋاشىلىعىن دامىتۋ جونىندەگى عىلىمي-پراكتيكالىق سەمينار-كەڭەس ءوتتى.

وعان وبلىس اكىمى ق. كوشەربايەۆ، ق ر ا ش م مال شارۋاشىلىعى دەپارتامەنتى ديرەكتورى ە. احمەتوۆ، «قازاگرو» ۇلتتىق باسقارۋشى حولدينگى» ا ق باسقارما ءتوراعاسىنىڭ ورىنباسارى ق. ايتۋعانوۆ جانە وتاندىق عالىمدار قاتىستى. بۇل تۋرالى وبلىستىق اكىمدىكتىڭ باسپا ءسوز قىزمەتى حابارلادى.

سىر ءوڭىرى - اۋىل شارۋاشىلىعى جاقسى دامىعان ايماق. دەگەنمەن، اتا كاسىپ سانالاتىن ءتورت تۇلىكتى تۇلەتۋدە اتقارۋلى ءتيىس جۇمىس شاش ەتەكتەن. ماسەلەن، شىعىنسىز ءونىم الۋ ءۇشىن مالدى اسىلداندىرۋ قاجەت. بۇل جۇمىستارعا مەملەكەت تاراپىنان كوڭىل بولىنۋدە. قىرۋار قارجىسىن جۇمساپ، سالا جۇمىسىن جانداندىرىپ جاتقاندارعا ءتىپتى سۋبسيديا دا تولەنۋدە. جايىلىمدىق جەر ماسەلەسى دە كۇن تارتىبىندە.

ايماقتاعى مال شارۋاشىلىعىنىڭ دامۋ بارىسىن وبلىس اكىمىنىڭ ورىنباسارى سەرىك قوجانيازوۆ بايانداپ بەردى. جاسىراتىنى جوق، قىزىلوردا بۋفەرلىك ايماق. ياعني، ەتتى وزگە ەلگە ەكسپورتتاي المايدى. ءبىراق، بۇل ۋاقىتشا. ماماندار بۇل باعىتتا جۇمىس جاساپ جاتىر. شارۋالاردا جاعداي وسىلاي ەكەن دەپ قول قۋسىرىپ وتىرعان جوق. ءتورت تۇلىكتى تۇلەتۋدە. ويتكەنى، ەرتەڭگى كۇنگە سەنىم مول.

ءىرى قارا مالىن اسىلداندىرۋ باعىتىندا «سىباعا» باعدارلاماسى جۇزەگە اسىرىلىپ جاتىر. سىربويىلىقتار دا باعدارلامادان ءوز سىباعالارىن الىپ كەلەدى. ايماقتىڭ اگرووندىرىستىك كەشەنىن دامىتۋعا «قازاگرو» ۇلتتىق حولدينگى بيىل 3,6 ميلليارد تەڭگە قارجى ءبولدى. جىل باسىنان بەرى 1498 انالىق باس ءى ق م جانە 60 اسىل تۇقىمدى بۇقا ساتىپ الىندى.

جالپى، وبلىستا 6 ميلليارد تەڭگە قۇرايتىن 7 ينۆەستيتسيالىق جوبا بار. قازىرگى تاڭدا سونىڭ ۇشەۋى جۇزەگە استى. 79 جاڭا جۇمىس ورنى اشىلدى.

مەملەكەت مۇمكىندىك جاساپ وتىر. شارۋاشىلىقتار تەك سونى ءتيىمدى پايدالانۋ كەرەك. عالىمدار سەلەكتسيا جۇمىسىنا نازار اۋداراتىن ۋاقىت جەتكەندىگىن ايتتى. وتاندىق ماماندار بۇل باعىتتا جۇمىستار جاسالىپ جاتقاندىعىن دا جەتكىزدى. عالىمدار سەمينار-كەڭەستە تاجىريبە الماسىپ، مال شارۋاشىلىعىن دامىتۋدا قويان قولتىق جۇمىس جاساۋعا ۋاعدالاستى.

اۆتور: ەلۋباي اۋەزوۆ