ءوزىنىڭ نەمەرە اپكەسىن الىپ قاشقان

استانا. قازاقپارات - وتكەن اپتادا قىز الىپ قاشۋعا بايلانىستى جازعان ماقالامدا، قانشاما قىزداردىڭ وسى ءبىر جابايى ءارى جيركەنىشتى ادەتتىڭ قۇربانى بولىپ جۇرگەندىگىن جازعان بولاتىنمىن. سوعان شىنايى ومىردە بولعان وقيعادان مىسال كەلتىرىپ وتەيىن:

قارقارالى اۋدانى كەڭەستەر وداعى تۇسىندا سىرتتان كەلىمسەكتەر كوپ كەلىپ، بارىنشا ورىستاندىرىلعان اۋداننىڭ ءبىرى. بۇل جاققا كەن وندىرەدى، مال وسىرەدى دەگەن جەلەۋمەن وزگە ۇلت وكىلدەرى ءجيى قونىستاندىرىلعان بولاتىن.

ءبىراق، «ءبورىنى قانشا اسىراساڭ دا تاۋعا قاراپ ۇلىيدى» - دەمەكشى، وداق تاراپ، قولعا تاۋەلسىزدىك تيگەن تۇستا سول كەلىمسەكتەردىڭ % 95 كوشىپ كەتىپ، تەك جەرگىلىكتى تۇرعىندار عانا قالدى. ءبىراق، سول كەلىمسەكتەر اتا-ءداستۇرىمىز بەن سالت-سانامىزعا ايتارلىقتاي كەسىرىن سالىپ كەتكەن.

جەتى اتاعا دەيىن قىز الىپ قىز بەرىسپەيتىن قازاق، ءوزىنىڭ ءداستۇرىن ۇمىتىپ، تۋىستارىمەن ارالاسۋدى دوعارا باستادى. «بارماساڭ، كورمەسەڭ جات بولارسىڭ» - دەگەننىڭ كەرى كەلىپ، ءبىر-ەكى اتا اۋىسقان سوڭ، تۋىستار ءبىرىن-ءبىرى ۇمىتا باستايدى. اسىرەسە جاستار جاعى.

قارقارالىنىڭ كوپ اۋىلدارىنىڭ ءبىر جىگىتى كەشتەتىپ، قالادان قايتىپ كەلە جاتقاندا كولىك توقتاتىپ تۇرعان سۇلۋ بويجەتكەنگە كوزى تۇسەدى.

ايتقان جەرىنە جەتكىزىپ سالامىن دەپ، كولىككە وتىرعىزىپ، ازىلدەسە وتىرىپ، وسى قىزعا ۇيلەنىپ السام با ەكەن دەگەن وي كەلەدى باسىنا. ءسويتىپ، جول ايرىعىندا قىزدىڭ اۋىلىنا قاراي ەمەس ءوز اۋىلىنا بەت بۇرادى. ءجون سۇراعان قىزعا:

- سەنى الىپ قاشىپ بارا جاتىرمىن، - دەپ شىنىن ايتادى.

اۋەلدە ازىلگە بالاپ، بەيقام وتىرعان قىز ءبىرشاما ۋاقىتتان سوڭ، شىنىمەن دە ءوزىن الىپ قاشىپ بارا جاتقانىنا كوزى جەتكەن سوڭ، كولىكتى توقتاتۋدى، ءوزىنىڭ تۇرمىس قۇرعان جان ەكەندىگىن ايتىپ ەسكەرتەدى.

ءبىراق، ونى قۇلاعىنا ىلگەن جىگىت بولمادى. قىزدى اۋىلعا الىپ كەلەدى، جار دەگەندە جالعىز ۇلدارى كەلىندەرىڭ دەپ، ۇيگە بويجەتكەندى الىپ كەلىپ تۇرسا، اتا-انادا ەس قالا ما؟ قىزدى شۋلاپ ءجۇرىپ، ۇيگە تۇسرەدى، ايتقان سوزدەرىنە ەشكىم قۇلاق اسپايدى. ءبارى قۇتىلۋ ءۇشىن ايتىپ جاتقان وتىرىكتەرى دەپ ويلاسا كەرەك.

ءسويتىپ قىزدىڭ باسىنا ورامال سالىپ، كەلىن ەتىپ الىپ قالادى. ەرتەڭىنە شۋ باسىلعان سوڭ، ۇلكەندەر جاعى ءجون سۇراسا كەلە، بويجەتكەننىڭ، جىگىتتىڭ اكەسىنىڭ نەمەرە اعاسىنىڭ جاقىندا تۇرمىسقا شىققان قىزى ەكەندىكتەرىن بىلگەندە اۋىزدارى اشىلىپ اڭتارىلىپ قالادى.

ۇيلەنگەن قىزىنىڭ ءوزىنىڭ اپكەسى ەكەندىگىن بىلگەن جىگىت باسىن الا قاشادى، ال جارىنىڭ وزگە بوساعانى اتتاعانىن ەستىگەن قىزدىڭ كۇيەۋى ودان دەرەۋ اجىراسىپ كەتەدى. ەكى ورتادا جۇرتقا قارابەت بولعان قىز، ءوز-وزىنە قول سالىپ قايتىس بولعان ەكەن. جىگىتتىڭ اقىماقتىعى مەن ونى توقتاتا الماعان قاۋمالاعان قارا ءدۇرسىن قاۋىمنىڭ كەسىرىنەن ەش جازىعى جوق ءبىر ءومىردىڭ استان-كەستەڭى شىعىپ، قىرشىنىنان قىيىلدى.

blogtime.kz