قارا جاشىكتىڭ قۇپياسى اشىلدى
بورتتا وزدىگىنەن جازبا جۇرگىزەتىن قۇرىلعى ءالى اشىلعان جوق، الايدا وسى ماسەلەگە جاۋاپتى ەۋروپالىق شەنەۋنىكتەر «ۇشاققا تيگەن زىمىران ءدال وسى نىساندى اتىپ ءتۇسىرۋ ءۇشىن ىسكە قوسىلعانىن» مالىمدەۋدە. ساراپشىلاردىڭ پىكىرىنشە، Boeing ۇشاعى اپاتقا ۇشىراماس بۇرىن ونىڭ بورتىنا ۇلكەن كولەمدە جارىلعىش زاتتىڭ كەلىپ تيگەنىن راستاپ وتىر.
Malaysia Airlines اۋەكومپانياسىنا تيەسىلى ۇشاق جەردەن اتىلاتىن «بۋك» زەنيتتى- زىمىراندى كەشەنىنەن اتىلعان. ول كەشەننەن ۇشىرىلعان كوندىرعى نىسانعا جاقىنداعاندا جارىلىپ، نىسىندى جارقىنشاقتارىمەن-اق جويىپ جىبەرە الادى. تەلەارنا مالىمەتى بويىنشا، وزدىگىنەن جازبا جۇرگىزەتىن قۇرالداعى مالىمەتتەر ناق وسىنداي زىمىراننىڭ جارىلۋى Boeing ۇشاعى اپاتقا ۇشىراۋىنا سەبەپ بولعان. بۇعان دەيىن اسكەري ساراپشىلار ۇشاق قالدىقتارىندا زىمىران جارقىنشاقتارىنىڭ ىزدەرى بولعانىن ايتقان بولاتىن.
ەسكە سالامىز، Boeing اپاتى شىلدەنىڭ 17- كۇنى دونەتسك وبلىسى اۋماعىندا ورىن العان ەدى. ول ۋاقىتتا ۇشاق بورتىنداعى 298 ادامنىڭ بارلىعى قايتىس بولعان ەدى. امستەردامنان كۋالا-لۋمپۋرعا بەت العان اۋەلاينەرىندە 192 نيدەرلاند، 44 مالايزيا، 27 اۆستراليالىق، 12 يندونەزيا، 10 بريتاندىق، ءتورت نەمىس، ءتورت بەلگيالىق، ءۇش فيليپپين، ءبىر كانادالىق جانە ءبىر جاڭا زەلانديا ازاماتى بولعان. كيەۆ پەن باتىس ەلدەرى بۇل اپاتقا «دونەتسك حالىقتىق رەسپۋبليكاسى» مەن رەسەيدى ايىپتاپ وتىر. د ح ر وكىلدەرى بولسا وزدەرىندە 10 مىڭ مەتر بيىكتىكتە ۇشاتىن ۇشاقتى اتىپ تۇسىرەتىندەي قۇرالدىڭ جوق ەكەنىن ايتۋدا.
«ايقىن»
