10:17, 28 - شىلدە 2014 | GMT +5
استانا ۆەلوكومانداسىنىڭ كاپيتانى «تۋر دە فرانس» كوپكۇندىگىنىڭ جەڭىمپازى اتاندى
استانا. قازاقپارات - كەشە ءپاريجدىڭ ەليسەي الاڭىندا «تۋر دە فرانس» سۋپەركوپكۇندىگىنىڭ سوڭعى كەزەڭى اياقتالدى. Еvry / Paris Champs-Еlysеes ارالىعىندا وتكەن 137,5 شاقىرىمدىق كەزەڭدە مارسەل كيتتەل جەڭىمپاز اتاندى.
ال جالپى ەسەپتە قارسىلاس شاق كەلتىرمەگەن «استانا» كلۋبىنىڭ كاپيتانى ۆينچەنتسو نيبالي گراند-تۋردىڭ باس جۇلدەسىن ەنشىلەدى. كوماندالىق ەسەپتە قازاقستاندىق «استانا» كومانداسى 6- ورىنعا يە بولدى.
ۆ. نيبالي ۆەلوشوسسە سپورتىندا 3 گراند-تۋردى جەڭىپ العان تاريحتاعى 6- سپورتشى ەكەنىن اتاپ وتەيىك. ول 2010 - جىلى «ۆۋەلتا» كوپكۇندىگىن جەڭىپ، ايدى اسپانعا شىعارسا، 2013 - جىلى «استانا» ساپىندا ءجۇرىپ، «دجيرو د'يتاليا» جارىسىندا ۇزدىك اتاندى. ەندى مىنە «تۋر دە فرانستى» باعىندىردى.
ەكىنشى ورىنعا نيباليدان + 07' 52 مينۋتقا قالىپ قويعان فرانسيالىق سپورتشى AG2R كلۋبىنىڭ وكىلى جان-كريستوفف پەرو تابان تىرەدى. ۇزدىك ۇشتىكتى تاعى ءبىر فرانسۋز تيبو پينو (FDJ كلۋبى) تۇيىندەدى.
اۆتور: جاسۇلان جولدىبايەۆ