ەلباسىنىڭ جەدەلحاتى گ. گولوۆكيندى قاناتتاندىردى

استانا. قازاقپارات - مەملەكەت باسشىسى نۇرسۇلتان نازاربايەۆتىڭ اتىنان قۇتتىقتاۋ جەدەلحاتى گەنناديي گولوۆكينگە جەكپە-جەك اياقتالعاننان كەيىن بىردەن تابىستالدى، دەپ حابارلادى ق ر سىرتقى ىستەر مينيسترلىگىنىڭ باسپا ءسوز قىزمەتىنەن.

«ءبىزدىڭ مەملەكەت باسشىمىز نۇرسۇلتان ءابىش ۇلى نازاربايەۆقا قولداۋ كورسەتىپ، تۇسىنىستىكپەن قاراعانى ءۇشىن شەكسىز ريزامىن. بۇل - مەن ءۇشىن زور مارتەبە. مەنىڭ جەكپە-جەگىمدى كورگەنى ءۇشىن قۋانىشتىمىن. بۇل - بارشا قازاقستاننىڭ جەڭىسى. ءبىزدىڭ تۋمىز كوتەرىلىپ، ءان ۇرانىمىز شىرقالدى. ءبىزدىڭ ەلىمىز تاماشا. مەن بارشا قازاقستاندىقتارعا دەنساۋلىق پەن زور تابىس تىلەيمىن»، - دەيدى گ. گولوۆكين.

«جەكپە-جەك قارساڭىندا وتە قاۋىرت جۇمىستار جۇرگىزىلدى. گەننادي 12 كەلى سالماق، ونىڭ 2,5 كەلىسىن سوڭعى ءۇش كۇننىڭ ىشىندە ءتۇسىرۋى ءتيىس ەدى. پرەزيدەنت نۇرسۇلتان نازاربايەۆتان جەدەلحات الۋ گەنناديدى قاناتتاندىرا ءتۇستى»، - دەيدى گ. گولوۆكيننىڭ قاسىندا سوڭعى بەس كۇن بويى بولعان مۇحتار تىنىكەيەۆ.

ايتا كەتەيىك، ۇلت كوشباسشىسى نۇرسۇلتان نازاربايەۆ قازاقستاندىق بوكسشى گەنناديي گولوۆكينگە 2014 - جىلى 26- شىلدەدە اۆستراليالىق دەنيەل گيلمەن وتەتىن جەكپە-جەكتە جەڭىس تىلەگەن جەدەلحاتىن بوكسشىعا نيۋ-يوركتەگى ق ر باس كونسۋلدىعى تابىس ەتكەن بولاتىن.

سونىمەن قاتار ەلباسى بوكستان WBA جانە IBO تۇجىرىمى بويىنشا كاسىپقويلار اراسىنداعى الەم چەمپيونى اتاعىن قورعاپ قالعانى ءۇشىن گەننادي گولوۆكينگە قۇتتىقتاۋ جەدەلحاتىن جولدادى. مەملەكەت باسشىسى گ. گولوۆكيننىڭ جەڭىسى بوكستى سۇيەتىن كوپشىلىك قاۋىم جانە بارشا قازاقستاندىق جانكۇيەرلەر ءۇشىن تاماشا تارتۋ بولعانىن اتاپ ءوتتى.

«لايىقتى قارسىلاسپەن ادال باسەكەدە سەن جاۋىنگەرلىك مىنەز، قايسار رۋح تانىتىپ، دايىندىعىڭنىڭ مىقتى ەكەنىن كورسەتتىڭ، ءوزىڭنىڭ ۇزدىك ەكەنىڭدى تاعى دا دالەلدەدىڭ، قازاقستاننىڭ حالىقارالىق دەڭگەيدەگى ابىروي-بەدەلىن ارتتىردىڭ. ءبىز سەنىڭ جەڭىسىڭدى ماقتان ەتەمىز»، - دەلىنگەن جەدەلحاتتا.

ەستەرىڭىزگە سالا كەتەيىك، كەشە بوكستان ورتا سالماق دارەجەسىندە WBA Super مەن IBO بويىنشا الەم چەمپيونى قازاقستاندىق گەننادي گولوۆكين اۆستراليالىق بوكسشى دەنيەل گيلدى 3- راۋندتا سۇلاتىپ سالدى. 33 جاستاعى دەنيەل گيلگە قارسى كەزدەسۋ 27-شىلدەدە نيۋ-يوركتەگى 20 مىڭ ورىندىق Madison Square Garden ارەناسىندا ءوتتى. جەكپە-جەك HBO تەلەارناسى ارقىلى 100 دەن استام ەلدە كورسەتىلدى. بۇل گەنناديدىڭ كاسىپقوي بوكستاعى 30- كەزدەسۋى. ال WBA چەمپيونى تيتۋلىن 11- رەت قورعادى.

اۆتور: مارلان جيەمباي