وڭتۇستىكتە تونالماي ساقتالعان اسا قۇندى جادىگەرلەر تابىلدى - فوتو

استانا. قازاقپارات - وڭتۇستىكتىڭ ارحەولوگتارى بۇرىن-سوڭدى كەزدەسپەگەن تاريحي جادىگەرلەرگە تاپ بولدى.

ورداباسى اۋدانى، سارى ارىق اۋىلىنداعى كۇلتوبە ماڭىنان تاريح جاناشىرلارى وسىدان 2 مىڭ جىل بۇرىن ءومىر سۇرگەن قاڭلى تايپاسى مەن سارمات تايپالارىنىڭ داۋىرىنە قاتىستى ادامداردىڭ قورىمىن اشتى.

 

ۇڭگىر ەتىپ قازىلعان (كاتاكومبا) 3 قورىمنان جالپى سانى 12 ادامدىڭ مۇردەسىن انىقتاعان ماماندار ولاردى ب. ز. د  Ⅱ - ب. ز. IV عاسىرلارعا تيەسىلى دەيدى. قورىمدا ايەلدىڭ دە، ەر ادامنىڭ دا مۇردەسى بار. قاڭقالارعا جىنىسىنا قاراي ءتۇرلى اشەكەي زاتتار مەن بۇيىمدار تاعىلعان.

 

تاريح جاناشىرلارىن ەڭ تاڭ قالدىرعانى - ونداعى اشەكەي بۇيىمدارىنىڭ اسا كۇردەلى ءارى جوعارى ساپادا جاسالعانى. ماسەلەن، قورىمنىڭ بىرىندە ايەل ادامنىڭ تىزبەك مونشاعى بار.

 

انىقتاپ زەر سالساڭىز، تاستار تاۋ حرۋستالىنان جاسالىنعان. ارحەولوگتاردىڭ دەرەگىنە سۇيەنسەك، حرۋستال تاسىن وڭدەۋ ءۇشىن مىندەتتى تۇردە لازەرلىك ساۋلە قاجەت ەكەن. ال ونىڭ قاسىندا جان-جاعى التىنمەن كومكەرىلگەن ورتاسىندا لاعىل تاس ورناتىلعان مويىنالقا (كۋلون) دا بار.

 

عالىم الەكساندر پودۋشكين بۇل لاعىل تاستىڭ نارىقتا 100 مىڭ ەۆرو تۇراتىنىن ايتادى. دەگەنمەن، ماسەلە قۇندى زاتتاردىڭ باعاسىندا ەمەس دەيدى پروفەسسور. سونداي كۇردەلى دە جوعارى ساپادا بۇيىم جاساي العان ءبىزدىڭ اتا-بابامىزدىڭ ونەرلىلىگى مەن بىلىمدىلىگى تاڭ قالدىرادى.

ال ەكىنشى قورىمدا جالعىز جاتقان ايەل ادامىنىڭ قاڭقاسى بار. مۇنداعى ادام سۇيەكتەرى سارمات تايپاسىنا تيەسىلى بولۋى مۇمكىن دەيدى ا. پودۋشكين.

قاڭقانىڭ اينالاسى ءتۇرلى زاتتارعا تولى. قولادان جاسالعان اينا، ءدىني راسىمدەردى اتقاراتىن زاتتار، ءتۇرلى اشەكەي بۇيىمدار مەن، ءتىپتى، قوي اسىعى دا بار. جانە كەۋدە تۇسىندا تسيليندرلى ۇلگىدەگى 82 دانادان تۇراتىن مونشاق تا بار.

 

ونى ارحەولوگ كيىمگە جاپسىرا تىگىلگەن بولۋى مۇمكىن دەپ بولجايدى. بۇل سول زامانداعى باقۋاتتى وتباسىنان شىققان ايەلدىڭ دەنەسى بولۋى مۇمكىن. وسىنداي جادىگەرلەرگە قاراپ مامان سول داۋىردەگى حالىقتىڭ الەۋمەتتىك تۇرمىستىق سالتىنىڭ جوعارى، ەكونوميكاسى قارقىن العان ەل ەكەنىن العا تارتادى.

BAQ. KZ