الماتىدا ەلباسى اتىنان اۋىزاشار بەرىلدى - فوتو
بۇل تۋرالى ق م د ب باسپا ءسوز حاتشىسى اعابەك قونارباي ۇلى حابارلادى.
يگى شاراعا قالا اكىمى احمەتجان ەسىموۆ پەن باس ءمۇفتي ەرجان قاجى مالعاجى ۇلى قاتىسىپ، ءدىن مەن ءدىلىمىزدىڭ جاناشىر تۇلعالارىن رامازان ايىمەن قۇتتىقتاپ، ىزگى تىلەكتەرىن ءبىلدىردى. الماتى قالاسىنىڭ باس يمامى نۇربەك ەسماعانبەت قۇران وقىپ، باس ءمۇفتي باتا جاسادى.
«وتىز كۇن ورازا - تاربيە مەكتەبى، ادامنىڭ سابىرىن شىڭدايتىن، ادالدىق پەن ادامگەرشىلىككە، مەيىرىمدىلىك پەن قايىرىمدىلىققا جەتەلەيتىن قۇلشىلىق. پايعامبارىمىزدىڭ (س. ع. س. ) : «ورازاعا تەڭ كەلەر قۇلشىلىق جوق» ، - دەگەن حاديسىنىڭ ءمانى مەن ماڭىزى زور. اللاعا شۇكىر، حالقىمىزدىڭ دارحان مىنەز، كەڭپەيىل نيەتىنىڭ ارقاسىندا ەلىمىزدەگى ۇلتتار مەن ۇلىستار ىنتىماققا ۇيىسىپ، ءومىر سۇرۋدە. بۇگىندە مەشىتتەرىمىزدە وتكىزىلىپ جاتقان اۋىزاشارلار، قايىرىمدىلىق اكتسيالار اعايىننىڭ اراسىن جاقىنداتا تۇسەتىن، ۇلت وكىلدەرىن بىرلىككە باستايتىن يگى شاراعا اينالدى. اللا تاعالا ۇستاعان ورازامىز بەن قاسيەتتى ايداعى دۇعا- تىلەكتەرىمىزدى قابىل ەتكەي» ، - دەدى باس ءمۇفتي ەرجان قاجى مالعاجى ۇلى.
اۋىزاشار داستارحانىندا قازاقستان مۇسىلماندارى ءدىني باسقارماسى ءوز قىزمەتى اياسىندا بيىلعى جىلدى «ءدىن مەن ءداستۇر» جىلى دەپ جاريالاۋىنا وراي، عيبراتتى تەرمە- تولعاۋلار ورىندالىپ، وتاندى سۇيۋگە، تۋعان جەردى قادىرلەۋگە ۇندەيتىن اندەر شىرقالدى. ق م د ب جالپى جانە جاستار ءبولىمنىڭ مەڭگەرۋشىسى التىنبەك ۇتىسحان ۇلى جينالعان جاماعاتقا ۋاعىز ايتتى.
