قاسيەتتى ءتۇننىڭ قادىر اتالۋىنىڭ سەبەبى نە؟

استانا. قازاقپارات - بۇكىل ادامزاتقا قۇران تۇسە باستاعان ەرەكشە جانە قاسيەتتى ءتۇننىڭ قادىر اتالۋىنىڭ دا سەبەبى بار.

بۇل اراب تىلىندەگى «قادر» ءسوزى «ءمان-ماڭىز» جانە «ولشەم»، سونداي-اق «قۇدىرەت» دەگەن ماعىنالارعا كەلەدى.

ءتۇننىڭ «قادىر ءتۇنى» دەپ اتالۋىن يسلام عۇلامالارى بۇل تۇندە اللا تاعالا ادامداردىڭ كەلەسى جىلعى تاعدىرىن، ياعني ءومىرى مەن ءولىمىن، ريزىق-نەسىبەسىن، باقىتتى نەمەسە باقىتسىز بولۋىن سول سەكىلدى تاعى باسقالارىن جازاتىندىعىمەن بايلانىستىرادى.

«قادىر» جانە «تاعدىر» سوزدەرىنىڭ تۇبىرلەستىگىنەن دە وسىنى اڭعارۋعا بولادى. ءاناس يبن ماليك بىلاي ايتقان: «رامازان كەلگەندە، اللانىڭ ەلشىسى (س. ع. س.): «راسىندا، سەندەرگە بۇل اي كەلدى! وندا، مىڭ ايدان دا ارتىق ءبىر ءتۇن بار. سوندا كىم ول تۇننەن ماقرۇم قالسا، ونىڭ بارلىق يگىلىگىنەن ماقرۇم قالادى. ال ونىڭ يگىلىگىنەن تەك ناعىز عانا ماقرۇم ادام ايىرىلىپ قالادى!»، - دەدى» (يبن مدجاھ 1/289. سەنىمدىلىگىن حافيز ءال-مۋنزيري جانە شەيح ءال-ءالباني راستاعان. "ءاس- ءسيلسيلا ءاس-ساحيحا" 1307) . قادىر تۇنىندە جابىرەيىل مەن بۇكىل پەرىشتەلەر جەر بەتىنە تۇسەدى. اللانىڭ ەلشىسى (س. ع. س): «شىن مانىندە، قادىر ءتۇنى جەر بەتىندە، پەرىشتەلەر ۇساق تاستاردان دا كوپ بولادى»، - دەگەن.

پايعامبارىمىز (س. ع. س) : «باسقا ۋاقىتتاردا ءاربىر جاقسىلىقتىڭ ساۋابى ون ەسە بولسا، ەرەجەپ ايىندا جۇزدەن اسادى. شاعباندا ءۇش جۇزدەن اسىپ، رامازاندا مىڭ ەسەگە ارتادى، جۇما تۇندەرى مىڭ ەسەدەن اسىپ، قادىر تۇنىندە وتىز مىڭعا دەيىن جەتەدى»، - دەگەن. تاعى ءبىر حاديستە: «رامازان ايى بويىنشا اقشام جانە تاڭ نامازىن جاماعاتپەن وقىعان ادام قادىر تۇنىنەن كوپ نەسىبە الادى»، - دەگەن. ەندەشە ءقادىر ءتۇنى پايعامبارىمىزدىڭ (س. ع. س) ۇمبەتىنە دەگەن تەرەڭ سۇيىسپەنشىلىگىنەن تۋىنداعان دۇعاسىنىڭ قۇرمەتى ءۇشىن قابىل بولعان.