قىتايدا وبا شىققان كەنتتە كارانتين جاريالاندى

استانا. قازاقپارات - قىتايدىڭ سولتۇستىك-باتىسىنداعى يۋمەن كەنتىندە بەزدەن تيەتىن وبا دەرتىنەن ءبىر تۇرعىن قايتىس بولعان سوڭ بيلىك ورىندارى كارانتين جاريالاپ، ەلدى مەكەندەگى 30 مىڭعا جۋىق تۇرعىننىڭ كەنتتەن شىعۋىنا تىيىم سالدى.

پوليتسيا كەنت ارقىلى وتەتىن جولداردى جاۋىپ، وتكىنشى كولىكتەردى باسقا باعىتقا سالىپ جاتىر. يۋمەنمەن ىرگەلەس تاعى بىرنەشە ەلدىمەكەندە كارانتين جاريالانعان.

قىتاي اقپارات قۇرالدارىنىڭ حابارلاۋىنشا، 38 جاستاعى جەرگىلىكتى تۇرعىن ولگەن سۋىردى يتىنە بەرگەن. سول كۇنى قىزۋى كوتەرىلىپ، دەنەسى قالتىراعان الگى ادام اۋرۋحاناعا جاتقىزىلىپ، 16- شىلدە كۇنى قايتىس بولعان.

قازىرگى ۋاقىتتا دارىگەرلەر يۋمەننىڭ 151 تۇرعىنىن وقشاۋلاپ، باقىلاۋعا العان. ازىرشە ولاردىڭ ەشقايسىسىندا قاۋىپتى دەرتتىڭ بەلگىسى بايقالماعانى تۋرالى حابارلاندى.
«ازاتتىق»