اۋداندىق سوت ءتوراعاسىنىڭ ۇستىنەن قىلمىستىق ءىس قوزعالدى - قارجى پوليسياسى

استانا. قازاقپارات - قاراعاندى وبلىسىندا بۇقار جىراۋ اۋداندىق سوتىنىڭ ءتوراعاسى بولات ابدىكەروۆكە قاتىستى قىزمەتتىك وكىلەتتىگىن پايدالانا وتىرىپ، الاياقتىق جاساۋ فاكتىسىمەن قىلمىستىق ءىس قوزعالدى.

بۇل تۋرالى وبلىستىق قارجى پوليسياسى دەپارتامەنتىنىڭ باسپا ءسوز قىزمەتىنەن حابارلادى.

«18 - شىلدەدە ق ر باس پروكۋراتۋراسى قىزمەتتىك وكىلەتتىگىن پايدالانۋ ارقىلى الاياقتىق جاساۋ فاكتىسى بويىنشا سۋديا ب. ابدىكەروۆكە قاتىستى قىلمىستىق ءىس قوزعادى» ، - دەلىنگەن حابارلامادا.

بۇعان دەيىن حابارلانعانداي، 2014 - جىلعى 1 -شىلدەدە قاراعاندى وبلىستىق قارجى پوليسياسى دەپارتامەنتىنىڭ قىزمەتكەرلەرى وبلىس پروكۋرورىنىڭ سانكسياسىمەن ارنايى جەدەل ىزدەستىرۋ شارالارىن وتكىزدى. بەلگىلەنگەن تارتىپتە بۇقار جىراۋ اۋداندىق سوتىنىڭ ءتوراعاسى ب. ابدىكەروۆ ازاماتتىق ءىس بويىنشا ماسەلەنى وڭ شەشىپ بەرۋى ءۇشىن سوماسى 100 مىڭ تەڭگە كولەمىندە پارا العانى تۋرالى فاكتى تىركەلدى.

تەرگەۋالدى تەكسەرۋ ناتيجەلەرى نەگىزىندە قارجى پوليسياسى اگەنتتىگى ق ر باس پروكۋرورىنىڭ اتىنا پارا الۋ فاكتىسى بويىنشا ابدىكەروۆكە قاتىستى قىلمىستىق ءىس قوزعاۋ تۋرالى ءوتىنىش حات ەنگىزدى.

اۆتور: مارلان جيەمباي