08:27, 23 - شىلدە 2014 | GMT +5
استانادا قازاقستان مەن قىتاي كوماندالارىنىڭ جولداستىق كەزدەسۋى وتەدى
استانا. قازاقپارات - ق ر دەنە شىنىقتىرۋ جانە سپورت ىستەرى اگەنتتىگى ۇستىمىزدەگى جىلدىڭ 26- شىلدەسىندە استانادا كيكبوكسينگتەن قازاقستان مەن قىتاي كوماندالارىنىڭ جولداستىق كەزدەسۋىن وتكىزگەلى وتىر، دەپ حابارلادى اگەنتتىك باسپا ءسوز قىزمەتىنەن.
ماقسات - ەكى ەل اراسىنداعى مادەني- گۋمانيتارلىق، سپورتتىق قارىم-قاتىناستى نىعايتۋعا ۇلەس قوسۋ. جاستار اراسىندا سالاماتتى ءومىر سالتىن ۇستانۋدى، سپورتپەن شۇعىلدانۋدى ناسيحاتتاۋ.
جەتى جەكپە-جەكتەن تۇراتىن سايىستا ەكى ەلدىڭ ەڭ ۇزدىك كيكبوكسشىلارى باق سىنايدى.
ءدۇبىرلى دودادا الەم كۋبوگىنىڭ جەڭىمپازى ەرسايىن قاسامبايەۆ، الەم چەمپيوناتىنىڭ كۇمىس جۇلدەگەرى بابىر ارتىقبايەۆ، الەم چەمپيوناتىنىڭ قولا جۇلدەگەرى شىڭعىسحان تىلەمىسوۆ، الەم كۋبوگىنىڭ قولا جۇلدەگەرلەرى قاناعات نۇرعاليەۆ پەن ارتۋر ساۋىربايەۆ، قازاقستان چەمپيوندارى مەرگەن ءبىلالوۆ پەن اسحات جانتۇرسىنوۆ ەل نامىسىن قورعايدى.
جارىس استانا قالاسى «داۋلەت» ۇلتتىق تەننيس ورتالىعىندا وتەدى.
