استانادا يۋنەسكو كەڭەسىنىڭ مۇشەلەرى ۇلى دالا كوشپەندىلەرىنىڭ مادەنيەتىنە تاڭدانىس بىلدىرۋدە
كوشپەندىلەردىڭ كونە ءداستۇرى جاڭعىرىپ، ەجەلگى كاسىپ جاندانعان ەتنواۋىلداعى باعدارلامانى تاماشالاۋعا اعىلىپ كەلگەن مەيماندار ات قۇلاعىندا ويناعان قازاق جىگىتتەرىنىڭ ونەرىنە ءتانتى بولدى.
«نوماد» اكتەرلىك توبى الەمنىڭ ءار تۇكپىرىنەن كەلگەن دەلەگاتسيا مۇشەلەرىنە قازاقتىڭ عانا ەمەس، ءتۇبى ءبىر تۇركى جۇرتىنىڭ ۇلتتىق سپورت پەن ويىن تۇرلەرىن كورسەتكەندە تاڭداي قاقپاعان جان بولعان جوق. تەمىردى يلەپ يەتىن، اعاشتان ءتۇيىن تۇيەتىن ۇستالاردىڭ كوزدىڭ جاۋىن الاتىن ونەرى مەن زەرگەرلىك بۇيىمدارى دا ۇلكەن قىزىعۋشىلىق تۋدىردى.
ۇلتتىق مازىردەن ءدام تاتىسقان بارشا قوناق قازاق مادەنيەتىن تانىپ، ءبىلىسىپ جاتتى. ۇلى دالانى مەكەندەگەن ۇلتتاردىڭ تاريحى مەن مادەنيەتىن پاش ەتەتىن ساحنالىق قويىلىمدار مەن ءان مەن جىر كەشتەرى كوپتەپ كورىنىس بەردى.
«حان شاتىر» ساۋدا ويىن- ساۋىق ورتالىعى الدىنداعى الاڭعا 50 گە جۋىق اقشاڭقاي كيىز ءۇي تىگىلىپ، تۇتاس باي اۋىلى كوشىپ كەلگەندەي بولدى. بايقاعانىمىز، قازاقتىڭ ۇلتتىق مادەنيەتىمەن تانىسامىن دەگەن نيەتپەن اتاعى الىسقا كەتكەن ەلدەردەن مەيماندار ارنايى كەلىپتى. بۇل دا قازاقتىڭ الەمدىك قاۋىمداستىق الدىندا ارتىپ كەلە جاتقان ابىرويىنىڭ ءبىر كورىنىسى بولار.
ەسكە سالا كەتەيىك، بۇگىن ەلوردادا يۋنەسكو ىستەرى جونىندەگى ۇلتتىق كوميسسيالاردىڭ ايماق ارالىق 1 - كەڭەسى ءوز جۇمىسىن باستادى.
شاراعا يۋنەسكو- نىڭ بارلىق بەس وڭىرلىك توپتارىنان، اتاپ ايتقاندا، اراب مەملەكەتتەرى، ازيا جانە تىنىق مۇحيتى، ەۋروپا جانە سولتۇستىك امەريكا، لاتىن امەريكاسى مەن كاريب باسسەينى ەلدەرىنەن 125 مەملەكەتتىڭ ۇلتتىق كوميسسيالارىنىڭ وكىلدەرى كەلگەن.
كەڭەس اياسىندا سەگىز قازاقستاندىق نىساننىڭ (الماتى وبلىسىنداعى قايالىق، قارامەرگەن، تالعار جانە جامبىل وبلىسىنداعى اقتوبە (ستەپنينسكوە) ، اقىرتاس، قۇلان، قوستوبە، ورنەك) قىرعىزستان جانە قىتاي تاراپتارىمەن بىرگە دايىندالعان «ۇلى جىبەك جولى: جىبەك جولىنىڭ باستاپقى بولىگى، تيان- شان ءدالىزى باعىتتارىنىڭ جۇيەسى» جونىندەگى سەريالىق ترانسشەكارالىق نوميناتسياسىنىڭ يۋنەسكو بۇكىلالەمدىك مۇرا تىزىمىنە ەنگىزىلۋىنە، سونىمەن قاتار ەكى قازاقستاندىق تابيعي رەزەرۆاتتاردىڭ - «قاتونقاراعاي» مەملەكەتتىك ۇلتتىق تابيعي پاركى مەن «اقجايىق» بيوسفەرالىق اۋماعىنىڭ يۋنەسكو بۇكىلالەمدىك بيوسفەرالىق رەزەرۆاتتار جۇيەسىنە ەنگىزىلۋىنە بايلانىستى ارنايى سەرتيفيكاتتاردى تابىستاۋ سالتاناتى ءوتتى.
سونىمەن بىرگە يۋنەسكو باس ديرەكتورى ي. بوكوۆانىڭ شەشىمىنە سايكەس استانا قالاسىنىڭ اكىمى ي. تاسماعامبەتوۆ يۋنەسكو مەن قازاقستان اراسىنداعى قارىم- قاتىناستىڭ نىعايۋىنا، سونداي- اق ۇلى جىبەك جولى مۇراسىن ساقتاۋعا اسا كورنەكتى ۇلەس قوسقانى ءۇشىن ۇلتتىق كوميسسياسىنىڭ قۇرمەتتى مەدالىمەن ماراپاتتالدى.
اۆتور: جاسۇلان جولدىبايەۆ
