پۋتين بالالارى تۇرىپ جاتقان گوللانديا ەلىمەن ارا قاتىناستى ۋشىقتىرماۋعا تىرىسادى

استانا. قازاقپارات - مالايزيانىڭ جولاۋشىلار ۇشاعىن كىمنىڭ اتىپ تۇسىرگەندىگىن انىقتاۋ ءۇشىن،   ماماندار  دۇنيە جۇزىنەن ۋكرايناعا اعىلىپ جاتىر. دەسە دە و باستا حالىقارالىق دەپ جاريالانعان زەرتتەۋ جۇمىستارىندا كىمنىڭ جەتەكشىلىك ەتەتىنى ءالى بەلگىسىز.

بىرنەشە  كيلومەتر جەرگە شاشىلىپ كەتكەن ۇشاق بولشەكتەرىن ۋكراينانىڭ توتەنشە جاعدايلار مينيسترلىگىنىڭ قىزمەتكەرلەرى تىرنەكتەپ جيناپ ءجۇر.

 تەمىر تەرسەك، جولاۋشىلاردىڭ جەكە زاتتارى مەن لاينەر قۇجاتتاماسى. ءاربىر بولماشى دەتالدىڭ ءوزى ۇشاق اپاتتىڭ سەبەبىن انىقتاۋعا كومەگىن تيگىزۋى مۇمكىن. ارنايى انگار دايىنداپ قويدىق، وعان قوسىمشا تابىلعان ادامداردىڭ دەنەلەرىن، ۇشاق بولشەكتەرى مەن وقيعا ورنىنان تابىلعان قيراندىلاردى جينايتىن بولامىز.  

بۇنىمەن قويماي، سەپاراتيستەر وقيعا ورنىندا قازا تاپقان ادامنىڭ مايىتتەرى تيەلگەن ۆاگونداردى دا ءوز قاداعالاۋىنا الىپ، تورەز ستانساسىندا قارۋلانعان ادامدارمەن كۇزەتىپ تۇر. ايتۋلارىنشا، ۆاگوندار حالىقارالىق اۋە كومميسيالارى كەلگەننەن كەيىن عانا كيەۆكە جەتكىزىلمەك. ال ازىرشە، شىلىڭگىر شىلدەنىڭ ىستىعىنا قاراماستان رەفريجەراتور  ورناتىلعان (توڭازىتىلعان) ۆاگوندار مىزعىماي ءبىر توراپتى تەمىر جول ۇستىندە تۇر.

ونسىز دا اگرەسسور اتانىپ وتىرعان رەسەيدىڭ وسى وقيعادان كەيىن حالىقارالىق قاۋىمداستىقپەن قاتىناسى شيەلەنىسە تۇسەتىنى حاق. اسىرەسە گوللانديا ەلىنىڭ رەسەي باسشىسىنا ءتىس قايراپ وتىرعانى انىق. سەبەبى كوكتەن اتىپ تۇسىرىلگەن ۇشاقتىڭ بورتىندا جولاۋشىلاردىڭ تەڭ جارتىسى وسى مەملەكەت ازاماتتارى ەدى. الايدا ساپارشىلاردىڭ پىكىرىنشە، پۋتين گوللانديا بيلىگىمەن ەكى ارا قاتىناستى ۋشىقتىرماۋعا بارىنشا جانىن سالماق. سەبەبى رەسەي پرەزيدەنتىنىڭ ۇلكەن قىزى كۇيەۋى، بالالارىمەن بىرگە بىرنەشە جىلدان بەرى ءدال وسى گوللانديا ەلىندە تۇرىپ جاتىر.

«31- ارنا»