12:07, 21 - شىلدە 2014 | GMT +5
تۇركيا كەدەندىك وداقپەن ەركىن ساۋدا ايماعىن قۇرۋى ىقتيمال
استانا. قازاقپارات - تۇركيا كەدەندىك وداق ەلدەرى، رەسەي، بەلارۋس جانە قازاقستانمەن ارادا ەركىن ساۋدا ايماعىن قۇرۋى تۋرالى باستاما كوتەردى، دەپ جازادى 24.kz.
مۇنداي مالىمەتتى رەسەيدىڭ ەكونوميكالىق دامۋ ءمينيسترى الەكسەي ۋليۋكايەۆقا سىلتەمە جاساعان ر ي ا نوۆوستي اقپارات قۇرالى تاراتتى.
اۆستراليالىق سيدنەيدە بولعان G20 ساۋدا مينيسترلەرىنىڭ كەزدەسۋ الاڭىندا ۋليۋكايەۆ: «ءبىز بولۋى ىقتيمال ىنتىماقتاستىقتىڭ فورماسىن، سونىمەن قوسا تۇركيا مەن كەدەندىك وداق اراسىندا ەركىن ساۋدا ايماعىن قۇرۋ ماسەلەسىن تالقىلادىق. ءتيىستى جۇمىس توبىن قۇرۋعا جانە قىركۇيەك ايىندا بۇل ماسەلەنى تۇبەگەيلى تالقىلاۋعا كەلىستىك» ، - دەدى.
ۋليۋكايەۆتىڭ سوزىنە قاراعاندا تۇركيا ءمينيسترى كەدەندىك وداقپەن تىعىز قارىم- قاتىناستا بولۋ تۋرالى ۇسىنىس ايتقان كورىنەدى. قازىرگى ۋاقىتتا تۇركيا مەن ەۋرو وداق اراسىندا ەركىن ساۋدا ايماعى بويىنشا كەلىسىم بار.
