ساۋد ارابيالىق وقۋشىنى قازاقستانداعى داستۇرگە دەگەن ۇقىپتىلىق تاڭقالدىردى
بۇل جايىندا ول قازاقپارات تىلشىسىنە بەرگەن سۇحباتىندا ايتتى.
«قازاقستانعا كەلگەنىمىزگە بىرنەشە كۇن ءوتتى. وسى ۋاقىت ىشىندە جەرگىلىكتى مادەنيەتپەن تانىسىپ ۇلگەردىك. اتاپ ايتقاندا، حالىقتىڭ ءوزىنىڭ داستۇرىنە مۇقيات قاراۋى تاڭقالدىرادى. سىزدەر سالتتارىڭىزدى وسى ۋاقىتقا دەيىن جاقسى ساقتاپ كەلگەنسىزدەر. قازىرگى زامانعى جاعدايدا كوپتەگەن ەلدەردە ءداستۇردى ۇمىتپاي، جاس ۇرپاققا جەتكىزۋ - قيىن ماسەلە» ، - دەيدى ز. ءال-حاريبي.
سونىمەن قاتار ساۋد ارابياسىنان كەلگەن مەيمان استاناداعى ءبىلىم وليمپياداسىنىڭ ۇيىمداستىرىلۋىنا جەكە توقتالدى.
«بۇل وليمپيادا بارشا الەمنەن كەلگەن وقۋشىلار ءۇشىن ناعىز مەرەكەگە اينالدى. ءبىز تەز دوستاسىپ الدىق. باسىمىز قوسىلا قالسا، تەك فيزيكا جايىندا عانا ەمەس، سونىمەن قاتار وزگە تاقىرىپتاردا دا پىكىر الماسۋدامىز. ءار ەلدەن كەلگەن ادامداردىڭ دوستاسۋى ءۇشىن جاقسى جاعداي جاساعانىنا ۇيىمداستىرۋشىلارعا ۇلكەن العىسىمدى ايتقىم كەلەدى. استاناداعى وليمپيادادا ءبىز ناعىز باقىتتى جاستىق شاعىمىزدى وتكىزۋدەمىز»، - دەدى ول.
ايتا كەتەيىك، فيزيكا بويىنشا 45- حالىقارالىق وليمپياداعا الەمنىڭ 85 ەلىنەن دەلەگاتتار قاتىسۋدا.
بىرنەشە كۇننەن بەرى جاس فيزيكتەر 2 تۋرعا قاتىسىپ، تەوريالىق جانە ەكسپەريمەنتتىك تۇرعىدا قازىرگى زامانعى فيزيكا سالاسىندا وزدەرىنىڭ ءبىلىم دەڭگەيىن كورسەتتى. ەكى تۋردىڭ قورىتىندىسى بويىنشا 45-شى IPhO- نىڭ حالىقارالىق قازىلار القاسى جەڭىمپازدار مەن جۇلدەگەرلەردى انىقتادى.
جەڭىمپازداردىڭ ەسىمدەرى بۇگىن تۇستەن كەيىن بەيبىتشىلىك جانە كەلىسىم سارايىندا ماراپاتتاۋ راسىمىندە بەلگىلى بولادى.
