اعىلشىندار بالانى قۇتقارىپ قالعان مىسىقتى اسپەتتەپ جاتىر

استانا. قازاقپارات - انگليانىڭ دونكاستەر قالاسىندا بالانى بۇزاقىلاردان قورعاپ قالعان سمادج اتتى مىسىققا «بريتانيانىڭ جىل مىسىعى» اتاعىن بەرۋ ۇسىنىلىپ وتىر.

بەس جاسار يتان فەنتون ىنىسىمەن اۋلادا ويناپ جۇرگەن كەزدە ولارعا ەرەسەكتەۋ ءۇش بالا كەلىپ، تيىسە باستايدى. ءمان بەرمەگەن يتاندى بۇزاقىلاردىڭ بىرەۋى يتەرىپ جىبەرەدى. وسىنى تەرەزەدەن كورگەن انالارى جۇگىرىپ جەتكەنشە، مىسىق بالاعا اراشا تۇسكەن. وقشا اتىلعان مىسىق بۇزاقىلاردىڭ بىرەۋىنە جابىسادى. بۇدان قاتتى قورىققان ءزابىر كورسەتۋشى جىلاپ جىبەرىپتى. وسىلايشا، مىسىق يەسىنە ادالدىق تانىتىپ، ونى اراشالاپ قالعان.

ءۇي جانۋارى بۇعان دەيىن مۇنداي «ەرلىگىمەن» ەرەكشەلەنبەپتى. ءبىر قىزىعى، وسى وقيعادان كەيىن ول بالانىڭ قاسىنان شىقپايدى ەكەن. كەي ادامداردىڭ قولىنان كەلمەيتىن ادالدىقتى مىسىقتان كورگەن بريتاندىقتار وعان ءدان ريزا، دەپ جازادى لەنتا. رۋ.