ارگەنتينا قۇراماسىنىڭ الماتىلىق فاناتى تەرەزەدەن سەكىرىپ كەتتى
ەر ادام الەم چەمپيوناتىنىڭ فينالىنان كەيىن ومىرىمەن قوش ايتىسپاق بولعان.
تەلەارنانىڭ حابارلاۋىنشا، فينالدىق ويىندى جىگىت ءوزىنىڭ دوستارىمەن بىرگە تاماشالاعان. كورشىلەر جىگىتتەردىڭ ءوزارا جانجالداسقانىنا، ولاردىڭ ءبىرىنىڭ ءتورتىنشى قاباتتاعى تەرەزەدەن سەكىرۋگە تىرىسقانىنا كۋا بولعان. وقيعا ورنىنا كەلگەن پوليتسەيلەر مەن دارىگەرلەر جەردە جاتقان ەر ادامدى كورەدى. ول ءتىرى بولعانىمەن، ەس-تۇسىنەن ايىرىلعان.
پاترۋل پوليتسەيلەرى زارداپ شەگۋشىنىڭ پاتەرىن بىردەن تاپتى. شاشىلىپ جاتقان پاتەر قابىرعالارىندا قان ءىزى بولدى. "ءبىز جاي عانا جانجالداستىق، پاتەردىڭ قان بولاتىن سەبەبى، مەن قولىمدى كەسىپ الدىم. ونىڭ نەگە تەرەزەدەن قۇلاپ كەتكەنىن بىلمەيمىن، ول كەزدە مەن دارەتحانادا بولعانمىن"، - دەيدى وسى پاتەردە بولعانداردىڭ ءبىرى.
"مەن اشۋلانىپ، اينەكتى سىندىردىم، ويتكەنى ارگەنتينا قۇراماسى ۇتىلىپ قالدى"، - دەيدى زارداپ شەگۋشىنىڭ تانىسى. تەلەارنانىڭ حابارلاۋىنشا، بۇل جىگىتتەردىڭ ءبارى ماس بولعان، قازىر المالى اۋداندىق ىشكى ىستەر ءبولىمىنىڭ قىزمەتكەرلەرى وقيعانىڭ جاي-جاپسارىن انىقتاۋعا كىرىستى.
ەسكە سالا كەتەيىك، مۇنىڭ الدىندا ارگەنتينا فۋتبول قۇراماسىنىڭ الەم چەمپيوناتىنداعى جەڭىلىسىنەن سوڭ بىشكەك تۇرعىنىنىڭ اسىلىپ قالعانى حابارلانعان بولاتىن.
BAQ. KZ
