11:53, 16 - شىلدە 2014 | GMT +5
مەركەل مەن وباما تىڭشىلىققا قاتىستى جانجالدى تالقىعا سالدى
استانا. قازاقپارات - ا ق ش پرەزيدەنتى باراك وباما مەن گەرمانيا كانسلەرى انگەلا مەركەل تىڭشىلىق جانجال باستالعاننان بەرى العاش رەت تەلەفون ارقىلى سويلەستى، دەپ حابارلادى شەتەلدىك ب ا ق.
ايتا كەتەيىك، 2 - شىلدە كۇنى گەرمانيا سىرتقى بارلاۋ قىزمەتىنىڭ قىزمەتكەرى ا ق ش پايداسىنا تىڭشىلىق جاساعانى ءۇشىن تۇتقىنعا الىنعانى بەلگىلى بولعان ەدى. وسىدان كەيىن ا. مەركەل بۇل وقيعانىڭ ەكى ەل اراسىنداعى سەنىمگە سىزات تۇسىرگەنىن جاريالاعان- دى.
ال سارسەنبىگە قاراعان تۇندە نەمىس كانسلەرىمەن تىلدەسكەن ب. وباما ا ق ش- تىڭ گەرمانيامەن قۇپيا قىزمەتتەر، ونىڭ ىشىندە بارلاۋ دەڭگەيىندەگى ىنتىماقتاستىقتى جاقسارتۋعا ۇمتىلاتىندىعىنا سەندىرىپ باقتى.
«پرەزيدەنت پەن كانسلەر ا ق ش پەن گەرمانيانىڭ بارلاۋ سالاسىنداعى ىنتىماقتاستىعى بويىنشا پىكىر الماستى جانە ەكى ەلدىڭ كوشباسشىلارى بولاشاقتا ىنتىماقتاستىقتى جاقسارتۋ ءۇشىن تۇراقتى بايلانىستى بولادى» ، - دەلىنگەن اق ءۇي مالىمدەمەسىندە.
اۆتور: مارلان جيەمباي
