يسلام كاريموۆتىڭ ۇلكەن قىزىنىڭ توڭىرەگىندەگى ادامدار سوتتالۋدا

استانا. قازاقپارات - وزبەكستاندا پرەزيدەنتتىڭ قىزى - گۇلنارا كارىموۆانىڭ اينالاسىنداعى ادامدار سوتتالدى، - دەپ حابارلايدى ريا نوۆوستي.

گۇلنارا كارىموۆانىڭ دوستارى رۋستام مادۋماروۆ پەن گايانە اۆاكيان بىرنەشە قىلمىس بويىنشا سوتتالىپ، 10 جانە 9 جىلعا باس بوستاندىعىنان ايىرىلعان. ءبىراق كەيىن جازا مەرزىمى ۇشتەن بىرگە قىسقارتىلدى.

مادۋماروۆ پەن اۆاكيان كۇنى كەشەگە دەيىن گۇلنارا كارىموۆانىڭ بيزنەستەگى سەنىمدى تۇلعالارى بولىپ كەلدى. مادۋماروۆ - فرانسيا، لاتۆيا، شۆەتسيا جانە شۆەيتساريا ەلدەرىنىڭ بيلىگى قارجى جىمقىرۋ جانە جەمقورلىق دەرەكتەرى بويىنشا قوزعاعان بىرنەشە قىلمىستىق ءىستىڭ فيگۋرانتى. اۆاكيان، بەيرەسمي مالىمەت بويىنشا، Takilant وفشور كومپانياسىنا يەلىك ەتەدى، ونىڭ TeliaSonera شۆەد-فينن تەلەكوممۋنيكاتسيالىق كونسەرنىنىڭ توڭىرەگىندەگى سىبايلاس جەمقورلىققا قاتىستى جانجالعا قاتىسى بار.

ەسكە سالا كەتەيىك، گۇلنارا كارىموۆانىڭ دوستارى - مادۋماروۆ، اۆاكيان مەن ەكاتەرينا كليۋيەۆالاردى 2014 - جىلدىڭ اقپان ايىندا تاشكەنتتە وزبەكستاننىڭ باس پروكۋراتۋراسىنىڭ قىزمەتكەرلەرى ۇستاعان بولاتىن. بۇل ۇشەۋىنە "شەتەل ۆاليۋتاسىن جاسىرۋ"، "سالىقتان جالتارۋ" باپتارى بويىنشا ايىپ تاعىلدى. كۇدىكتىلەر Terra Group, Prime Media, Gamma promotion جانە باسقا دا كومپانيالاردىڭ لاۋازىمدى تۇلعالارىنا قاتىستى قوزعالعان قىلمىستىق ىستەردىڭ شەڭبەرىندە قولعا ءتۇستى.

اقپارات قۇرالدارى رۋستام مادۋماروۆتى گۇلنارا كارىموۆانىڭ ازاماتتىق نەكەدەگى كۇيەۋى ەكەنىن ايتادى. گۋگۋشا (كارىموۆانىڭ ساحنالىق پسيەۆدونيمى) وتكەن جىلدىڭ كۇزىندە اناسى تاتيانا كارىموۆامەن، ءسىڭلىسى لولامەن جانە وزبەكستان ۇ ق ق باسشىسى رۋستام ينوياتوۆپەن جانجالداسقاننان كەيىن تەپەرىش كورە باستادى. ەلدە گۇلنارانىڭ ەسىمىمەن بايلانىستى كاسىپورىندار، قوعامدىق ۇيىمدار، تەلەارنالار مەن راديوستانسيالار جابىلىپ جاتىر.

دەرەككوز: tengrinews.kz