ا. سەيىتحانوۆ، سپورت شولۋشىسى: ءبىزدىڭ سپورتشىلار قازاقشا سويلەي المايدى

استانا. قازاقپارات - - سپورتتى كەرەمەت سۇيەتىنىڭىزدى بىلەمىز. نەگە سپورتشى بولماي سپورت شولۋشىسى ماماندىعىن تاڭدادىڭىز؟

- بۇل ماماندىقتى ءوزىم تاڭداعان جوقپىن. قاز م ۋ-دە 1-كۋرستا وقىپ جۇرگەن كەزىمدە سول كەزدەگى اقپارات جانە مۇراعات كوميتەتىنىڭ ءتوراعاسى، «جاس الاش» گازەتىندە جۇمىس ىستەگەن باۋىرجان وماروۆ بىزگە ارنايى كۋرستان ساباق بەرگەن بولاتىن. سودان ساباق بارىسىندا «مەن سەنى ۇيىرىڭە قوسامىن» دەپ بۇرىنعى «لەنينشىل جاس» گازەتىنىڭ ءبولىم مەڭگەرۋشىسى نەسىپ جۇنىسبايەۆقا الىپ باردى. «مىنا بالا سىزگە شاكىرتتىككە جارايتىن سىقىلدى. مەن تانىپ تۇرمىن، سىزگە تاڭداۋلى شاكىرت بولادى» دەدى. نەساعا «مۇندايلار كوپ. كورەيىك مۇنى دا» دەپ قاسىنا الدى. ءبىر اپتادان كەيىن باردىم. «شالقامنان قۇلايىن با؟» دەپ باسىن شالقايتىپ تۇرىپ، بويىن قايتادان تىكتەدى. قۇلاعان جوق. «سەن قۇلاتۋىڭ كەرەك. ىزدەنىسىڭ بار ەكەن. قايتادان قاراپ كەل» دەپ جىبەردى. سوسىن «قايراتتىڭ وبالى كىمگە؟» دەگەن ماقالا جازدىم. «قايرات» قۇرىدى عوي قازىر. سول كەزدە دە قۇريىن دەپ تۇرعان.

سول ماقالا شىققاننان كەيىن نەسىپ اعاعا شاكىرت بولدىم. «سپورت» گازەتىنە اۋىسقانىمدا 1994 - جىلى رابات جانىبەكوۆ قازاق تەلەديدارىنا شاقىردى. شاقىرعاندا دا قىزىق، سىرتىمنان بۇيرىق شىعارىپ جىبەرىپتى. نەسىپ اعا «ءبىزدى نەگە ساتىپ كەتەسىڭ؟» دەپ ماعان رەنجىدى. شىنىندا مەن ولاي ەتكەن جوق ەدىم. بۇيرىقتى ماعان ايتپاي سىرتىمنان شىعارىپ جىبەرگەن عوي. سوسىن امال جوق اۋىسۋىما تۋرا كەلدى. 1997 - جىلدان باستاپ «حابار» اگەنتتىگىندە قىزمەت ەتىپ كەلەمىن.

- بەدەلدى ارنانىڭ بەلدى قىزمەتكەرى اتانۋ دا وڭايعا سوقپاعان بولار؟

- ەندى ءوزىمدى سونشالىقتى كەرەمەتپىن دەپ ويلامايمىن. قولىمنان كەلگەنىنشە جۇمىس ىستەپ ءجۇرمىن. جوعارى دارەجەگە كوتەرىلسەم ماعان وڭ قاباق تانىتقان اعالارىمنىڭ ارقاسى شىعار. كوپتەگەن جاقسى اعالارىم بولدى. نەسىپ جۇنىسبايەۆ، باۋىرجان وماروۆ، بۇكىل جىلنامالىق ماسەلەلەردى جادىنا جاتتاپ جۇرەتىن ءجۇسىپ قيسىموۆ ماعان ۇستاز بولدى. بار جاقسى قاسيەتتى ۇيرەتتى. بويىما ءسىڭىردى. ءبىر سالانى تۇبەگەيلى زەرتتەۋدى، تاڭداعان كاسىبىڭدى جان تانىڭمەن سۇيە ءبىلۋدى سولاردان ۇيرەندىم.

- سپورت شولۋشىلارىنا ايتىلار سىن كوپ. اسىرەسە الەمدىك وليمپيادالاردان رەپورتاج بەرەتىن شولۋشىلاردىڭ كىسەندەۋلى اتتاي كىبىرتىكتەي بەرەتىندىگى جاسىرىن ەمەس...

- ەندى ول اركىمنىڭ تابيعي دارىنىنا بايلانىستى نارسە عوي. كەيدە اسىعىستىق بولادى، كەيدە ءارتۇرلى جاعدايلار بولادى...

-  ەلىمىزدە ارنايى تەك سپورت سالاسىنا ارنالعان تەلەارنا اشۋعا بۇرىن تەك ارمان عانا بولاتىن...

-  سپورت ارناسى بۇرىن تەك كابەلدىك تەلەتاراتىلىم ارقىلى تارايتىن-دى. كەيىنىرەك اۋقىمى كەڭەيدى... ال، ەندى ءدىني ارنانىڭ بولعانىن قولدايمىن. ويتكەنى قازىر يماندىلىققا بەت بۇرۋىمىز قاجەت. سوڭعى الەتتە جاسىرارى جوق تىم دورەكى، تىم تۇرپايى بولىپ كەتتىك. ادامگەرشىلىكتى ۇعا المايتىن حالگە جەتتىك. وسىنىڭ ءبارى يمانسىزدىقتان. ءدىني ارنالاردا دۇرىس ناسيحات بولسا وتە جاقسى. پايعامبارىمىزدىڭ حاديسىندە «دىنگە تەرەڭدەسەڭ اداساسىڭ» دەيدى.

ءدىننىڭ نە ەكەنىن بىلمەي جاتىپ ءدىن تۋرالى پىكىر ايتاتىندار كوبەيدى. وسىنى دا ويلانامىن. بۇل قانشالىقتى اسەر ەتەدى ءبىزدىڭ قوعامعا؟ ءدىن دەگەن نە؟ ول - يمان. ول - ادامگەرشىلىك. اللاعا قۇلشىلىق ەتۋ عوي. اللانىڭ ءبىر ەكەنىن ءبارىمىز بىلەمىز. ءبىراق اللانى تاني الدىق پا، ماسەلە سوعان كەلىپ تىرەلەدى. ول ۇلكەن تانىم، ول ۇلكەن پايىم. ول قازاق ۇلتىنىڭ ۇستاناتىن ۇستىنى. ءبىز ءبىر-ءبىرىمىزدى جاقسى كورۋدى ۇيرەنۋىمىز كەرەك. «تاس تۇسكەن جەرىنە اۋىر» دەگەن ماقالدى وزىمىزگە جاقىنداتىپ الۋىمىز قاجەت. ويتكەنى تاس تۇسسە بۇكىل ۇلتقا تيەدى. جەكە كوزقاراس ەمەس، كەز-كەلگەن ماسەلەدە ۇلت بولىپ ۇيىسۋ كەرەك. مۇمكىندىگىنشە قازاقتى قازاق جاقسى كورۋگە، قازاقتى قازاق تۇسىنۋگە تىرىسۋ قاجەت. ءار ادام وسىدان ساباق، عيبرات الاتىن بولسا نۇر ۇستىنە نۇر بولار ەدى. وقۋ كەرەك. قازاق وقىمايتىن حالگە جەتتى عوي. وقىماعان حالىقتى جاقسى ايتپايدى. كەيدە نادان دەپ تە جىبەرەدى. بۇل جاقسى ءسوز ەمەس.

ءبىردى ايتىپ ەكىگە كەتىپ جاتقانىم ەمەس، وقۋ ارقىلى، تۇسىنىك ارقىلى، پايىم ارقىلى عوي قاي نارسە دە. قۇراننىڭ وزىندە وقۋعا كوپ ءمان بەرىلگەن. سوندىقتان ءبىز وقۋىمىز كەرەك. بىلەك كۇشىمىزبەن ەمەس، بىلىمىمىزبەن الۋىمىز كەرەك قاي اسۋدى دا. زەردەنى بەكىتە ءتۇسۋىمىز كەرەك. جادىنى جاقسارتا ءتۇسۋىمىز كەرەك. سوندا عانا مەملەكەتىمىز مىقتى، ىرگەسى بەكەم بولادى. اياقتى جورعاداي تۇگەل تۇتاسىپ تۇرعان جوقپىز. سوندىقتان وقۋ، اعارتۋ ماسەلەسىنە كوپ ءمان بەرۋىمىز قاجەت.

باياعىدا ءمىرجاقىپ، احمەت اتالارىمىز «نەگە «ويان، قازاق» دەپ شىرىلدايدى؟» دەپ ويلايتىنمىن. سويتسەم ۇلتىم، حالقىم بيىكتەن كورىنسە دەيدى ەكەن عوي. بىزدەن دە كوزى اشىق بولعان عوي ول كىسىلەردىڭ. قازاقتىڭ كوپ نارسەدەن قالىپ بارا جاتقاندىعىنا اشىنادى ەكەن. تەحنيكالىق ماسەلەلەردە شەتىن دۇنيەلەرگە بويلاي المايمىز. ول دا راس. تۇپتەپ كەلگەندە قازاق بيىكتە بولۋى كەرەك. مەنىڭ ۇستاناتىن باعىتىم وسى. كەز-كەلگەن سۇراعىڭىزعا جاۋاپ بەرە وتىرىپ مەن وسى ۇلت ماسەلەسىنە جەتەلەپ الىپ كەلۋىم مۇمكىن. ويتكەنى تامىر دەيدى عوي، ءتۇپ نەگىز. نەگىز بولۋى كەرەك. سوندا عانا قازاق قازاق بولادى دەپ ويلايمىن.

- قازاقتىڭ قارا ءسوزىنىڭ مايىن تامىزىپ سويلەيتىن شەشەندىگىڭىزبەن كوپ كوزگە تۇسەسىز. ءوزىڭىز ايتقانداي نەگىز، ءتۇپ-تامىر دەدىڭىز عوي، سول اتا-بابالارىڭىز دا وت اۋىزدى، وراق ءتىلدى شەشەن بولعان-اۋ شاماسى...

- بابالارىم ءار سالانىڭ ءجونىن بىلگەن. وزىپ تا كەلگەن. ارعى اتامىز تەمىربەك ءوز زامانىندا اعا سۇلتان بولىپتى. ونىڭ بالاسى سەيىتحان مەنىڭ اتام اكىم بولعان. بۇگىنگى اكىم ەمەس باسقا وبرازداعى، باسقا تيپتەگى اكىم بولعان. ول تۋرالى كوز كورگەندەر ءالى كۇنگە دەيىن جىر قىلىپ ايتادى. سولاردان جەتكەن قاسيەت شىعار دەپ ەسەپتەيمىن.

مەن ءوزىم ۇلكەن كىسىلەردىڭ قولىندا، ياعني اتا-اجەمنىڭ قولىندا وسكەم. سولار مەنى قاتتى باۋلىدى. 7 جاسىمدا قابانباي باتىردىڭ جىرىن جاتتاپ العان بولاتىنمىن. بالالارىنا كەز-كەلگەن كىتاپتى وقىپ تۇراتىن. كەيدە ەرىنەمىز عوي. ويناعىڭ كەلەدى دەگەندەي. 70-بەتتى وقىپ تۇرىپ تەز بىتىرەيىن دەپ بىردەن 78-بەتكە اۋىسىپ كەتسەڭ «ءاي، ءاي توقتا، انا كىتابىڭنىڭ بەتى جىرتىلىپ قالعان جوق پا؟ قيىسپاي كەتتى عوي...» دەيتىن. مەن تاڭ قالاتىنمىن. ايتپەسە حات تانىمايتىن كىسىلەر. ول كىسىلەردىڭ كوكىرەگى وياۋ بولعانى عوي. ءارىپ تانىماعانىمەن. سويلەمنىڭ قۇرىلىمىن، لوگيكانى جاقسى بىلگەنى عوي. اۋىلدىڭ شالدارىنا ەرتىپ اپارىپ سولاردىڭ اڭگىمەسىن تىڭداتاتىن. 80 - جىلدارى قابانباي باتىردى ءوز بەتىمشە زەرتتەيىن دەپ اۋىلدىڭ شالدارىنا باردىم. سويتسەم ولار «بالام لەنيندى وقۋ كەرەك قوي، قابانبايدى قايتەيىن دەپ ەدىڭ؟» دەپ تالاي شىعارىپ سالعان. سول اقساقالدار قابانباي باتىردىڭ 300  جىلدىعىندا ۇلكەن ۇلكەن ماقالالار جازدى...

ءبىزدىڭ اۋىلدا ۇلكەن اقىندار بولدى. اۋعان جاقسىلىق ۇلى دەگەن اقىن بولدى. تىزە بەرسەڭ وتە كوپ. كىشكەنتاي كەزىمنەن كىتاپقۇمار بولىپ ءوستىم. 4-سىنىپتا وقىپ جۇرگەنىمدە «اباي جولىن» وقيتىنمىن. سوندا مۇعالىمدەر «سەن ول كىتاپتى وقي المايسىڭ. ءالى كىشكەنتايسىڭ» دەيتىن. ءبىراق مەن ول كىتاپتى وقىعانىمدى دالەلدەدىم. 6-سىنىپتا اۋىلدىڭ كىتاپحاناسىنداعى ءوزىم قىزىعاتىن كىتاپتىڭ ءبارىن وقىپ شىقتىم. كوپ ۇيرەندىم. ومىرلىك ساباق الدىم. كىتاپتى كوپ وقىعاندىعىمنىڭ پايداسىن دا كوپ كوردىم.

ماسەلەن، ساكەن جۇنىسوۆكە «جارالى گۇلدەر» اتتى كىتابىڭىزدى ءبىلۋشى ەدىم» دەگەندە ول كىسى «باسقا يدەولوگياداعى جازىلىم ەدى عوي» دەپ تاڭ قالعان. بىلمەيمىن، ءبىراق مەن سونى وقىدىم. ول كەزدە 3-كۋرس ستۋدەنتىمىن. كەيدە نەسىپ اعا «ەسىكتى قاتتى جاپپاڭدار» دەپ ءجاي عانا ەسكەرتەتىن. وسى اڭگىمەنى قازىرگى ستۋدەنتتەرگە ايتىپ كورىڭىزشى، قالاي قابىلدار ەكەن؟ ال مەن سوعان كادىمگىدەي ۇيالىپ قالۋشى ەدىم. ۇلكەن ۇستازدارىمىزدىڭ الدىن قيا باسىپ وتپەي وسكەن ۇرپاقتىڭ سوڭعىسى ءبىز شىعارمىز دەگەن وي كەلەدى كەيدە...

اقىلدىڭ الىپپەسىنەن باستاپ ءمولدىر بۇلاعىنا سۋسىنداتقان سول اعالارىما ايتار العىسىم شەكسىز. سولاردىڭ ايتقان اقىلىن تىڭداعاننان ءبىز كەم بوپ قالعان جوقپىز. قايتا كوپ جەردە كومەگى ءتيدى. قازاقتىڭ مىقتى ازاماتتارىنىڭ قاسىندا جۇردىك. تاربيەسىن الدىق. سونىڭ دا شاراپاتى شىعار.

- سپورتتىڭ ۇڭعىل-شۇڭعىلىن بىلەتىن بەساسپاپ مامان رەتىندە قازاق سپورتىنىڭ بولاشاعى تۋرالى نە ايتاسىز؟ فۋتبولدان نەگە كەنجەلەپ قالدىق، بوكستان دا بيىكتەن كورىنىپ ءجۇر ەدىك، كوز ءتيدى مە، ءسوز ءتيدى مە ونىڭ دا اقساپ جاتقان جايى بار...

-  نەگىزى سپورتتىڭ ۇڭعىل-شۇڭعىلىنا دەيىن بىلگەن زيان. ويتكەنى اقپارات تاسقىنى كوپ. ونى ايتساڭ ءبىراز ادامدار رەنجىپ قالۋى مۇمكىن. ول قورقىنىشتان ەمەس. جالپى قازاق سپورتىنا قارنىم اشادى. فۋتبولدى ءبىز بىتىردىك. فۋتبولدى ءبىز بۇدان 10  جىل بۇرىن تەرىس جولعا بۇردىق. سودان ءالى شىعارا الماي كەلەمىز.

ويتكەنى وندا ول سالانى بىلمەيتىندەر جۇمىس ىستەيدى. مىقتى مامانداردى ءبىز پايدالانا المايمىز. سول سياقتى مىقتىلار ءار وبلىستا، ءار قالادا بار. سولاردى پايدالانا المايمىز. نەگە؟ ويتكەنى بۇل سالانىڭ باسىندا پىسىقتاۋ جىگىتتەر جۇرەدى. سولار اكىمگە جاقىنداۋ بولادى. ءتىلىن تابا بىلەدى. فۋتبول ماسەلەسىن سولار شەشىپ كەتەدى كەيدە. بوكستا دا قازىر شىنىندا قيىن تيەتىن ءتۇرى بار. سەبەبى ءتىل تابىسا المايتىندار بوكستىڭ جالىنا جارماسىپ ءجۇر.

ول كەرەمەت باپكەر بولۋى مۇمكىن. ول كەرەمەت بوكسشى بولۋى مۇمكىن. ءبىراق قاراپايىم ادامي قاسيەتى بولماعاننان كەيىن ول بوكستىڭ تىزگىنىن الىپ جۇرە المايدى. مەن ق ۇلىباۆتى ايتىپ وتىرعان جوقپىن. ودان باسقالارىن. ق ۇلىبايەۆ ول اقشا بەرەتىن ادام. قايتا ونى پايدالانۋ كەرەك ەدى. ول ەشقاشان بارىپ تورەشىلەرمەن، باسقالارىمەن جۇمىس ىستەمەيدى. ءبىراق ق ۇلىبايەۆ بەرگەن اقشانى بەرجاعىنداعىلار دۇرىس پايدالانۋى كەرەك. ونى جەكە مۇددەگە ەمەس، تۇتاس ماقساتقا پايدالانۋ كەرەك. مىنە، سوندا عانا بوكس وركەندەيدى. وسى بولمايىنشا ءبىزدىڭ بوكسىمىز قۇردىمعا كەتكەنى كەتكەن.

- كەزىندە بوكس قۇراماسىنىڭ باس باپكەرلىگىنەن كەتكەن دامير بۋدانبەكوۆتىڭ تۋرالى نە ايتاسىز؟

-  بۋدانبەكوۆتى جالپى جەك كورمەيمىن. جامبىل وبلىسىنا كوپ ەڭبەك ءسىڭىردى. جاقسى شاكىرتتەر تاربيەلەدى. بۋدانبەكوۆ مىقتى مامان بولعانىمەن مىقتى پسيحولوگ ەمەس. ونى ءداميردىڭ وزىنە دە ايتقام. كەرەمەت ءتىل تابىسا المايدى. بۇل مەنىڭ جەكە پىكىرىم.

كەزىندە بوكس قۇراماسىنىڭ ءبىر باس باپكەرى بولدى.

جۇرگەن جەرىندە جومارتتىعىمەن كوزگە تۇسەتىن. مىسال ءۇشىن الەم چەمپيوناتىنا بارعان كەزدە ءبىر مەيرامحانادا ونشاقتى باپكەر وتىرسا سولاردىڭ ءشايىن اپەرە سالادى. بىلاي قاراساڭ ەشتەڭە ەمەس. ارى كەتكەندە 100 دوللار بولار. ءبىراق سولارمەن ءتىل تابىسا الادى. ولار ونى سىيلايدى. ونىڭ جولىن كەسەتىن تورەشىلەر از بولادى. ونىڭ جەڭىسىن قىزعاناتىن باپكەرلەر از كەزدەسەدى. نەگە؟ ويتكەنى ول سولارمەن ءتىل تابىسا بىلەدى.

- شەتەلدەن باپكەر شاقىرتۋعا قالاي قارايسىز؟

-  باياعىدا داۋلەت تۇرلىحانوۆ اعاسى قايرات تۇرلىحانوۆ ەكەۋى بولگاريادان باپكەر الدىرعان. ودان ونى تۇركيا ساتىپ الدى. تۇركيادان قازاقستان ساتىپ الدى. سول تۇركىلەر كەلگەلى قازاق اۋىر اتلەتيكاسى وڭالدى. دزيۋدودان كوماتو كودزي دەگەن ول كەلدى. ناتيجەسىندە ءومىرى بولماعان ءبىر التىن مەدال قانجىعاعا بايلاندى. ولار كەرەك بىزگە.

تاەكۆوندودان داۋلەت تۇرلىحانوۆ كارىستى اكەلدى. مىنە تاەكۆوندودان تاعى دا ءبىر مەدال قورجىنعا ءتۇستى. وسىنداي وسىنداي جەتىستىكتەر بار. ءبىزدىڭ جىگىتتەردى فۋتبولداعى سياقتى شەتەلگە اپارىپ وقىتۋ دەگەندى مەن تۇسىنە المايمىن. ازىرشە. وعان ءسوز جەتپەيدى. مۇمكىن ول دۇرىس ەمەس شىعار. قايتا سول 20 بالاعا كەتكەن اقشاعا قازاقستانعا باپكەر شاقىرتۋ كەرەك پە ەدى؟

- قاي ءوڭىردىڭ تۋماسىسىز؟

- تۋعان جەرىم سەمەي وبلىسى، ماقانشى اۋدانى. وتباسىمدا ءۇش بالام بار. جۇبايىمنىڭ اتى - نازگۇل. بالالارىم - ەراسىل، گۇلدانا، بەكاسىل. قىزىم كەيدە ءان ايتادى. ۇلىم فۋتبولعا بارعاندى جاقسى كورەدى. مەن ۇيدە ءتىپتى نان تۋراي المايمىن.

جۇبايىم تۋراعانشا قاراپ وتىرامىن. ۇيدە جوق بوپ قالسا جۇگىرىپ بارىپ ءوزى اكەلەدى. وتباسىنداعى شارۋاشىلىق، الەۋمەتتىك ماسەلەلەردىڭ ءبارى سونىڭ موينىندا. قوناقتاردىڭ ءبارىن سول كۇتىپ الىپ شىعارىپ سالىپ جاتادى. ول باردا مەنى ەشكىم ىزدەڭكىرەمەيدى. ول باردا مەن ەشتەڭەگە الاڭدامايمىن. وتباسىلىق باقىت دەگەنىڭ دە وسى شىعار...

- ازامات رەتىندە ءسىزدى قوعامىمىزداعى قانداي ماسەلەلەر تولعاندىرادى؟

- بىرىنشىدەن، ءبىزدىڭ سپورتشىلار قازاقشا سويلەمەيدى. سوعان قانىڭ قاينايدى كادىمگىدەي. بىرەۋىنەن سۇحبات الۋعا بارساڭ «يزۆينيتە» دەپ وتە شىعادى. ورىسشا سويلەتسەڭ سايرايدى عوي ارينە. سولار قاي مەملەكەتتىڭ اتىنان جارىسقا بارا جاتقانىن دا بىلمەيدى-اۋ دەپ كەيدە تاڭ قالامىن دا. ون اۋىز ورىسشا بىلگەننەن گورى قازاقشا ۇيرەنگەنى ايىپ پا؟ وسى ەلدىڭ نانى جاقسى، مەدالى مىقتى، اقشاسى ءتىپتى ءتاتتى. ال، ءتىلى نەگە اشى بولۋى كەرەك؟ مەن سونى تۇسىنە الماي-اق قويدىم. ءتىل ۇيرەنۋ قيىن ەمەس قوي.

ماسەلەن، انگلياعا نەمەسە يسپانياعا اپارىپ تاستاسا ون ءسوز ايتامىز. ءبىر ايدان كەيىن نان سۇراپ جەرلىك ءتىلىن ءتاپ-ءتاۋىر مەڭگەرىپ الامىز. ويتكەنى بۇل ماجبۇرلىك. ءبىزدىڭ ەلدە ءتىل ۇيرەنۋگە ماجبۇرلىك جوق. سوندىقتان دا ولار ۇيرەنگىسى كەلمەيدى. ءبىراق ولارعا «بۇلارىڭ ۇيات قوي» دەپ ەشكىم ەسكەرتپەيدى. ەلدىڭ نامىسىن قورعايتىن سپورتشىلاردا ۇلتتىق سانا بولمايىنشا الار اسۋ الاسالاۋ بولىپ قالا بەرەدى-اۋ.

- ەستەن كەتپەس ەرەكشە وقيعاڭىز...

- يراكپەن ىرىكتەۋ ماتچىنا باردىق. ءبىرىنشى اقپارات بەرۋشى مەن پوچتامپتقا بارامىن. الماتىعا تەلەفون سوعۋ ءۇشىن. سويلەسىپ بولعان سوڭ باعاسىن سۇراسام 20 دوللار دەيدى. ەكىنشى كۇنى ودان دا از تولەيتىن شىعارمىن دەپ ەدىم 68 دوللار دەپ جازىپ بەردى. «نەگە بۇلاي؟» دەسەم ادامشا سويلەسپەيدى. قارۋىن كەزەنەدى. سوعىستىڭ الدىنداعى كەز ەدى. قازاقستان يراكپەن 1:1 بولىپ تەڭ وينادى. جانكۇيەرلەر زەڭبىرەكتەرىن، تانكىلەرىن الىپ كەلىپ ستاديوندى قورشاپ الدى. شىعا الماي وتىردىق ەكى ساعاتتاي. سولار ابدەن تاراعاننان كەيىن جەرگىلىكتى اسكەريلەر شىعارىپ سالدى. يراكتا جۇرگەندە ەشكىم ەشكىمگە ازىلدەگەن جوق. يراكتان سيرياعا كەپ قونعاننان كەيىن ەلدىڭ ءبارى ءبىر-بىرىمەن كوڭىلدى سويلەسۋگە كوشتى. سوندا ءومىر-اي، ەركىندىككە ەشتەڭە جەتپەيدى ەكەن عوي دەگەن ويعا قالدىم...

- جەڭىستى كۇندەردە جۇزدەسكەنشە!

اۆتور: گۇلجان كوشەروۆا

«الاش ايناسى»