قايرات نۇرتاستى ارانداتۋعا نەگە قۇمارمىز؟

قايراتتىڭ سۋرەتى بار افيشالاردى كورسەك، «ايتەۋىر تىنىشتىق بولسا ەكەن» دەيتىن بولدىق. قايراتتىڭ جولىن كەس-كەستەگىسى كەلەتىندەر ەل الدىندا ونىڭ بەدەلىن تۇسىرگىسى كەلە مە، نەدە بولسا، «جاعىمسىز پيار» بەلەڭ الىپ كەتتى.
قايرات نۇرتاس قانداي دا ءبىر سالتاناتتى شاراعا قوناق رەتىندە شاقىرىلىسا، ونىڭ تىڭدارماندارى ءانشىنىڭ جەكە كونسەرتى وتەتىندەي جينالادى. سوندىقتان تىڭدارمانى كوپ، ۇلكەن-كىشىنىڭ ەرەكشە ىقىلاسىنا بولەنگەن جۇلدىزدى ءانشى كوپتەگەن سالتاناتتى ءىس-شارالارعا، كونسەرتتەرگە، تويلارعا ءجيى شاقىرتۋ الادى. ءانشىنىڭ اناسى گۇلزيرانىڭ ايتۋىنشا، قايرات شاماسى كەلگەنشە ءوزىنىڭ تىڭدارماندارىنىڭ كوڭىلىن قالدىرماۋ ءۇشىن ۇيىمداستىرۋشىلارمەن كەلىسىمشارقا وتىرىپ، كەلىسكەن جەرگە بارادى.
بۇل جولى دا ءانشى الماتىداعى МСKZ جاڭا مۋزىكالىق ارنانىڭ اشىلۋ سالتاناتىنا قوناق رەتىندە شاقىرىلعان. الايدا ۇيىمداستىرۋشىلار سوڭعى ساتتە اتالعان ءىس-شارانىڭ وتەتىن ورنىن بالۋان شولاق سپورت سارايىنان قاراپايىم مەيرامحاناعا اۋىستىرىپ تاستاعان. وسى جاعدايعا بايلانىستى ءانشىنىڭ فاناتتارى وزدەرىنىڭ نارازىلىعىن بىلدىرگەن. سالتاناتتى شارا باستالاتىن ۋاقىتتا ءانشىنىڭ تىڭدارماندارى سپورت سارايىنىڭ الدىنا جينالعاندا ولار عيماراتتىڭ الدىنداعى حابارلامانى كورەدى. وندا مەرەكەلىك شارانىڭ باسقا جەرگە اۋىستىرىلعانى جازىلعان.
كەيىننەن بەلگىلى بولعانداي، ۇيىمداستىرۋشىلار تيىسىنشە بيلەت ساتا الماعان. سوندىقتان شارانى سپورت سارايىنان مەيرامحاناعا اۋىستىرىپتى. الايدا جينالعان قاۋىم مەيرامحاناعا سىيماي قالدى. ويتكەنى زال 300 ادامعا عانا ارنالعان، ال ساتىلعان بيلەت سانى 700. وسى كەزدە كورەرمەندەر دە، پروديۋسەرلەر دە ۇيىمداستىرۋشىلاردى تابا المادى.
قايرات نۇرتاستىڭ اناسى بۇل جاعدايدى ادەيى ارانداتۋ دەپ سانايدى. «ۇيىمداستىرۋشىلاردىڭ ءبارى قاشىپ كەتتى، ەشكىم ولاردى تاپپاي قالدى. بىزدەن باسقا ەشكىم جوق. ولار بىزگە ۇشاققا بيلەت الىپ بەرمەكشى بولعان. مەنىڭ تۇسىنگەنىم، بۇل قايراتقا قارسى ۇيىمداستىرىلعان ارانداتۋشىلىق. حالىقتىڭ الدىندا ۇياتقا قالماۋ ءۇشىن ءبىز ءوزىمىز ۇشاققا بيلەت الىپ، ۇشىپ كەلدىك»، دەيدى گۇلزيرا ايداربەكوۆا.
الايدا سپورت سارايىنداعىلاردىڭ ايتۋىنشا، ۇيىمداستىرۋشىلار МСKZ مۋزىكالىق ارناسىنىڭ اشىلۋىنا بايلانىستى ءانشىنىڭ قاتىسۋىمەن وتەتىن كونسەرتتىك شارانىڭ بۇل جەردە وتپەيتىنىن الدىن الا بىلگەن. «ولار 4 ىنە دەيىن جالعا الۋ قۇنىن تولەۋ كەرەك بولعان. سودان كەيىن عانا ءبىز ولاردى كىرگىزۋ كەرەكپىز. ولار 2 سى كۇنى باس تارتتى. سوندىقتان ءبىز وتكىزىلەتىن شارانىڭ مۇندا بولمايتىنىن حابارلادىق»، دەيدى سپورت سارايىنىڭ ديرەكتورى سەرىك قاناعات.
ەڭ قىنجىلتاتىنى، كوپتەگەن مەرەكەلىك شارالاردى ۇيىمداستىرۋشىلار ءانشىنىڭ بەدەلىنە نۇقسان كەلەدى-اۋ، سونشا اقشاعا بيلەت ساتىپ العان قاراپايىم حالىققا وبال-اۋ دەگەندى ويلارىنا دا المايدى، تەك وزدەرىنىڭ قارا باستارى مەن قالتالارىنىڭ قامىن عانا ويلايدى. وسى جولى ارنانىڭ ارباۋىنا تۇسكەن ءانشى دە، جينالعان قاۋىم دا كىمگە كىنا تاعارلارىن بىلمەي دال بولىپ قالدى. قايتا قايرات ءوزىنىڭ ابىرويىن ودان ءارى ءتۇسىرىپ الماۋ ءۇشىن دە، حالىقتىڭ نارازىلىعىن ودان ءارى كۇشەيتپەۋ ءۇشىن تار جەردە قينالسا دا 2 ساعات ءان شىرقادى. سوندىقتان قايرات تانىمال انشىگە لايىق كۇتىلمەي قالدىم، قۇرمەتكە يە بولا المادىم، ۇيىمداستىرۋشىلار سوزىندە تۇرعان جوق، الداندىم دەمەسە، نەگىزىنەن حالىقتىڭ الدىندا ابىرويىن تۇسىرگەن جوق. ىڭعايسىز جاعدايعا تۇسسە دە رەيتينگىسىن تاعى ءبىر ساتىعا كوتەردى.
«قايرات نۇرتاس تۇشكىرسە دە حيت» دەپ پاروديست ولجاس ايتپاقشى، بۇگىندە قايراتتىڭ اتى اتالسا، جارناما.
«ءماسساعان، مەن الداندىم!»
اتاعى جەر جاراتىن انشىلەر الاياقتارعا جاقسى تابىس بولدى. نەگە دەسەڭىز، سوڭعى كەزدە اۋىل-ايماقتاردا، شاعىن قالالاردا حالىقتىڭ جاقسى كورەتىن انشىلەرىنىڭ ادەمى سۋرەتتەرىن افيشاعا سالىپ، «بالەن» كۇنى كونسەرتى بولادى دەپ جاريالاپ، جالعان بيلەتتەر ساتىپ، اقشانى جيناپ العاننان كەيىن كونسەرت تە، ءانشى دە، اقشا دا جوق، قاراپايىم حالىقتى تاقىرعا وتىرعىزىپ، ءانشىنى جاماناتتى ەتەتىن الاياقتار كوبەيگەن.
بەلگىلى ءانشى روزا ءالقوجا جاقىندا وسىنداي وقيعاعا تاپ بولىپتى. تالدىقورعان ماڭىنداعى اۋدان ورتالىقتارىنىڭ بىرىنە روزانىڭ اتىنان بىرەۋلەر بارىپ، اۋداندىق مادەنيەت ۇيىمەن كونسەرت وتكىزۋ تۋرالى كەلىسىم-شارت جاساسىپ، بيلەتتەر بەرىپ كەتەدى. ءبىراز ۋاقىتتان كەيىن ساتىلعان بيلەتتەردىڭ اقشاسىن بارىپ الادى. ال كونسەرت جاقىنداعاندا الگى الاياقتار تەلەفوندارىن ءوشىرىپ تايىپ تۇرعان. وسى وقيعادان كەيىن مادەنيەت ءۇيىنىڭ باسشىلىعى روزانىڭ وزىنە حابارلاسادى. ارينە، ءانشى كونسەرت تۋرالى بىلمەيدى دە.
ءدال وسى سەكىلدى وقيعالاي تالاي ءانشىنىڭ باسىنان وتكەن. سونداي-اق كەيبىر الاياقتار انشىلەرمەن كەلىسىم-شارت جاساسقاندا قالام اقىسىن، جول اقىسىن، كورسەتىلەتىن قىزمەت تۇرلەرىن تۇگەل ءوز مويىندارىنا الاتىندارىن ايتىپ، ءانشىنىڭ كەلىسىمىن العاننان كەيىن تۋرا كونسەرت بولاتىن كۇنى سوزدەرىندە تۇرمايتىندارى ءجيى كەزدەسەدى. بۇعان اشۋلانعان انشىلەر كونسەرت بەرۋدەن باس تارتادى. ال ورتادا قاراپايىم حالىق زارداپ شەگەدى. وسىنداي جاعدايعا 2011 - جىلى اقتوبەدە كونسەرت بەرەردە الىشەر كارىموۆ تاپ بولعان ەدى.
وسى ورايدا ەلىمىزدىڭ تۇكپىر-تۇكپىرىندەگى مادەنيەت وشاقتارىنا «ساق بولىڭىزدار!» دەگىمىز كەلەدى. ءانشىنىڭ اتىنان كەلگەن پروديۋسەردىڭ الاياق ەمەس ەكەنىنە كوز جەتكىزۋگە تىرىسىڭىز، كەلىسىم-شارت جاساسۋدا ءانشىنىڭ ءمورىن سۇراڭىز.
جالپى اتاقتى ادامداردى پايدالانىپ تابىسقا كەنەلۋ بارلىق ەلدەردە بار الاياقتىق ءتۇرى. ءتىپتى اتاعى جەر جارعان مادوننا سەكىلدى انشىلەر دە تالاي الاياققا الدانعان كورىنەدى.
مامانداردىڭ ايتۋىنشا، ءوزىنىڭ باعاسىن بىلەتىن ونەر يەلەرى كەز كەلگەن ءىس-شاراعا شاقىرتۋ العاندا ۇيىمداستىرۋشىلارعا الدىمەن وزدەرىنىڭ تالاپتارىن قويادى. مىسالى، اتاقتى رەسەيلىك ءانشى فيليپپ كيركوروۆ قاي جەرگە بارسا دا ونى جول پوليتسياسىنىڭ ينسپەكتورلارى كۇتىپ الادى، ول ۇشاق تراپىنان تۇسە سالا-اق ليمۋزينگە وتىرادى، ءوزىنىڭ جانىنداعى مۋزىكانتتارىنا مەرسەدەس ماركالى اۆتوبۋس سۇرايدى. ەڭ قىمبات قوناق ۇيلەردەگى پرەزيدەنتتىك نومىرلەرگە عانا توقتايدى. ول ءوزىنىڭ ءىشىپ-جەيتىن اسىنا قاتتى ءمان بەرەتىنىن سونشالىق، جەكە اسپازىن ەرتىپ جۇرەدى ەكەن.
ال ءبىزدىڭ ەلدىڭ انشىلەرى، ونەرپازدارى ءالى مۇنداي قۇرمەتكە يە بولا الماسا كەرەك، ءبىز ءبىر ءانشىنىڭ نەمەسە بەلگىلى ادامنىڭ اتاعى ءسال شىعىپ بارا جاتسا اياعىنان شالىپ، ونىڭ سۇرىنگەنىنە ءماز بولامىز. ءجايى كەلسە، ءانشىڭدى دە، قالىڭ حالىقتى دا الداپ سوعامىز!!!
اۆتور: اينۇر سەنبايەۆا