ومىرگە ەكىنشى رەت كەلگەن تەمىرتاۋ قالاسىنىڭ تۇرعىنى

ءيا، ءتىرىلدى دە، تەلەبيزىردەن سۇحبات بەرىپ، ءوزىنىڭ بار ەكەنىن كورسەتتى.
بۇل ەشقانداي فانتاستيكا نەمەسە قيالدان تۋعان دۇنيە ەمەس. ومىردە بولعان وقيعا.
بريانسك قالاسىندا دۇنيەگە كەلىپ، تەمىرتاۋ قالاسىنىڭ تۇرعىنىنا اينالعان لەونيد دانچەنكو ەسىمدى ەر ازامات، ءبىر كەزدەرى اۋعان سوعىسىنا قاتىسىپ، «ەرلىگى ءۇشىن» مەدالىمەن ماراپاتتالعان.
سوعىستان ورالعان سوڭ، تەمىرتاۋ قالاسىنداعى مەتاللۋرگيالىق كومبيناتقا كەلىپ، قىزمەتكە ورنالاسادى. وسى ارادا ءجۇرىپ ۇيلەنەدى، ۇكىمەتتىڭ بەرگەن ءتورت بولمەلى ءۇيىن يەلەنەدى. ءسويتىپ، باقىتتى عۇمىر كەشىپ كەلە جاتادى دا، بولماي قالادى.
ادام الجاسام دەسە ءاپ ساتتە ەكەن-اۋ. باقىتتان باسى اينالعان جىگىت، قولىنداعى بارىن باعالاماي، سايتاننىڭ زارىنە اۋەستەنەدى. وسىلاي ءجۇرىپ اۋەلى جۇمىسىنان ايىرىلادى. ونان سوڭ، قاتىن-بالاسى، داڭعاراداي ۇيدە جالعىز ءوزىن قالدىرىپ كەتىپ قالادى.
ءاي دەيتىن اجە، قوي دەيتىن قوجا بولماعان لەونيد، كۇننەن كۇنگە، قۋ اراقتىڭ سوڭىنا ءتۇسىپ، بار دۇنيەسىنەن، كەيىننەن باسپاناسى مەن قۇجاتتارىنا ايىرىپ، بارىن جوعالتىپتى. ءبىراق، لەونيد بارىنەن ايىرىلدىم دەپ ويلاعاندا قاتەلەسكەن ەدى. ول ءوزىنىڭ ومىردەن دە ايىرىلعانىن بىلمەيتىن. بايعۇس جىگىتتى تانىستارى 2002 - جىلدىڭ 5 - تامىزىندا، ولدىگە جورىپ، كومىپ تاستاعان ەكەن. ال بۇل بولسا، بومج بولىپ، كوشەدە تايراڭداپ جۇرە بەرگەن. ءوزىنىڭ ءولىپ قالعاندىعىن كەزدەيسوق جاعدايدا بىلەدى.
ادەتتەگىندەي قىشقىلداپ الىپ، كوشەدە كەلە جاتقان جىگىتتى، پوليتسيا قىزمەتكەرلەرى ۇستاپ الادى. قالتاسىندا قۇجاتى جوق جىگىتتى بولىمشەگە اپارىپ، جەكە باسىن انىقتاعان كەزدە ونىڭ تىرىلەر قاتارىندا جوق ەكەنىن كورگەن سوڭ، بوساتىپ قويا بەرگەن.
جانە قۇجاتتارىن جيناپ، ءتىرى دەگەن انىقتاما الۋعا كەڭەستەرىن بەرەدى. سول كەزدە عانا بايعۇسقا اقىل كىرىپ، قۇجاتتارىن رەتتەستىرۋگە كوشەدى. جاقىندا بولاتىن سوت وتىرىنى كەزىندە، تانىستارى شاقىرىلىپ، بۇل جىگىتتىڭ شىن مانىندە ءولدى دەپ سانالىپ جۇرگەن لەونيد دانچەنكو ەسىمدى ازامات ەكەندىگىن ايعاقتاۋ كەرەك. ال ءتورت بولمەلى پاتەرىن بوگدە بىرەۋلەر ساتىپ جىبەرگەن. ءبىراق، قوعامدا ادام تاعدىرىنا بەي-جاي قارامايتىن جاناشىر توپتار بار. وسىنداي توپتار، ارداگەردىڭ قۇجاتتارىن رەتتەپ، جاڭا ءومىر باستاۋىنا قولداۋ كورسەتپەكشى. بۇل ارينە قۇپتارلىق ءىس. ەگەر ەرىك-جىگەرى مىقتى بولسا، ەلۋگە كەلگەن جاسىندا دا لەونيدتىڭ، ءومىرىن قايتا باستاۋعا تولىق مۇمكىندىگى بار. قانشا دەگەنمەن، ومىرگە ەكىنشى رەت كەلىپ جاتىر عوي.
blogtime.kz