پرەزيدەنت الماتى وبلىسىندا فەرمەرلىك شارۋاشىلىق جۇمىسىمەن تانىستى

مەملەكەت باسشىسى شارۋاشىلىق بازاسىندا قازاق ۇلتتىق اۋىل شارۋاشىلىعى ۋنيۆەرسيتەتىمەن بىرلەسىپ قۇرعان «بايسەركە-اگرو» عىلىمي-وندىرىستىك وقىتۋ ورتالىعى جۇمىسىمەن تانىستى.
قازاقستان پرەزيدەنتىنە ءداندى داقىلداردىڭ جاڭا سورتتارى، پەستيتسيدتەر مەن بيوتىڭايتقىشتاردىڭ سان الۋان ءتۇرى، سونداي-اق قازاقستان عالىمدارى «بايسەركە-اگرو» ع ءو و و بازاسىندا جاساپ شىعارعان ۆەتەرينارلىق پرەپاراتتار كورسەتىلدى. سونىمەن قاتار، نۇرسۇلتان نازاربايەۆ اۋىل شارۋاشىلىعى تەحنيكاسىنىڭ جەتىلدىرىلگەن ءارقيلى تۇرلەرى مەن مال شارۋاشىلىعى نىساندارىن ارالاپ كوردى.
مەملەكەت باسشىسى وتاندىق جوعارى وقۋ ورىندارى وقىتۋ ۇدەرىسىن عىلىممەن جانە وندىرىسپەن ۇشتاستىرۋ تاجىريبەسىن قولدانۋى قاجەتتىگىنە نازار اۋداردى.
- بارلىق ۋنيۆەرسيتەتتەر عىلىممەن اينالىسۋعا ءتيىس. ولاردا زەرتحانالار اشىپ، كەيىن ءوندىرىس ۇيىمداستىرۋ ءۇشىن قاجەت بولاتىن تاجىريبەلىك- ونەركاسىپتىك جۇمىستاردى جۇرگىزۋگە ارنالعان تەحنيكالىق بازا قۇرعان ءجون، - دەدى نۇرسۇلتان نازاربايەۆ.
مەملەكەت باسشىسى ەلدەگى اۋىل شارۋاشىلىعى كەشەنىن ءتيىمدى دامىتۋ ءىسى بۇل سالادا زاماناۋي عىلىمي ادىستەمەلەر مەن ازىرلەمەلەردى قولدانۋدى تالاپ ەتەتىنىن ايتتى.
- ازىق-تۇلىك ءوندىرىسى ەلىمىزدى دامىتۋدىڭ باستى فاكتورىنا اينالىپ كەلەدى. 2050 - جىلعا الەمدە حالىق سانى قاراي 9 ميللياردقا دەيىن وسەدى، ول اۋىل شارۋاشىلىعى ونىمدەرىن ءوندىرۋدى ەكى ەسەگە ارتتىرۋدى قاجەت ەتەتىن بولادى. قازاقستاننىڭ، وراسان كەڭ القاپتاردى قوسا العاندا، سول ورىندى يەلەنۋگە بارلىق مۇمكىندىگى بار. بۇل رەتتە اۋىل شارۋاشىلىعى جاڭا تەحنولوگيالاردىڭ كومەگىنسىز ودان ءارى دامي المايدى. عىلىمنىڭ بار كۇشىن پايدالانۋ كەرەك، تەك سوندا عانا ءبىز اۋىل شارۋاشىلىعى سالاسىندا ىلگەرىلەي الامىز، - دەدى قازاقستان پرەزيدەنتى.
«بايسەركە-اگرو» وندىرىستىك شارۋاشىلىعى ەگىن شارۋاشىلىعىمەن، مال شارۋاشىلىعىمەن، ەت جانە ءسۇت وڭدەۋمەن اينالىسادى. اۋىل شارۋاشىلىعى داقىلدارىن ءوسىرۋ بارىسىندا وتاندىق عالىمدار ازىرلەگەن يننوۆاتسيالىق تەحنولوگيالار بەلسەندى تۇردە قولدانىلادى. شارۋاشىلىق قۇرامىنا ەكى ۆەتەرينارلىق پاتولوگيا- اناتوميالىق زەرتحاناسى، جەم-ءشوپتى زووتەحنيكالىق تالداۋدان وتكىزەتىن زەرتحاناسى جانە اگروحيميا زەرتحاناسى بار عىلىمي- وندىرىستىك وقىتۋ ورتالىعى كىرەدى.