رەسەي، ق ح ر، بەلارۋس، وزبەكستان، ۋكراينا پرەزيدەنتتەرىنەن ەلباسىنىڭ اتىنا قۇتتىقتاۋلار كەلىپ ءتۇستى

بۇل تۋرالى اقوردانىڭ باسپا ءسوز قىزمەتىنەن حابارلادى.
رەسەي فەدەراتسياسىنىڭ پرەزيدەنتى ۆلاديمير پۋتيننىڭ قۇتتىقتاۋىندا قازاقستان تاريحىنداعى الەۋمەتتىك، ەكونوميكالىق جانە سىرتقى ساياسات سالاسىنداعى ايرىقشا تابىستارمەن ەستە قالاتىن تۇتاس ءبىر ءداۋىردىڭ نۇرسۇلتان نازاربايەۆ ەسىمىمەن تىعىز بايلانىستى ەكەنى ايتىلعان.
«رەسەي- قازاقستان دوستىق قارىم- قاتىناسى دامۋىنىڭ تاباندى جاقتاۋشىسى رەتىندە ءسىز ەلدەرىمىز اراسىنداعى ستراتەگيالىق سەرىكتەستىك پەن وداقتاستىقتى نىعايتۋعا جەكە زور ۇلەسىڭىزدى قوسىپ كەلەسىز. ەۋرازيالىق وداق جونىندەگى ءسىزدىڭ كورەگەن يدەياڭىزدىڭ جۇزەگە اسۋىنىڭ شىن مانىندە داۋىرلىك ماڭىزى بار»، - دەلىنگەن قۇتتىقتاۋدا.
قىتاي حالىق رەسپۋبليكاسىنىڭ ءتوراعاسى شي جينپيڭ ءوز قۇتتىقتاۋىندا قازاقستان پرەزيدەنتىنىڭ قولداۋىمەن شاڭحايدا ا ءو ى س ش ك IV سامميتى تابىستى ءوتىپ، ونىڭ قۇرىلىم جۇمىسىنىڭ جاڭا كەزەڭگە شىعۋىنا سەپتىگىن تيگىزگەنىن اتاپ وتكەن.
«قازاقستان-قىتاي قارىم-قاتىناسىنىڭ دامۋىن جوعارى باعالايمىن، سىزبەن ارامىزدا ورنىققان ىسكەرلىك قارىم- قاتىناس پەن بەرىك دوستىقتى قادىرلەيمىن، تىعىز بايلانىسىمىزدى ودان ءارى جالعاستىرۋ نيەتىندەمىن»، - دەلىنگەن قۇتتىقتاۋ حابارلاماسىندا.
بەلارۋس رەسپۋبليكاسىنىڭ پرەزيدەنتى الەكساندر لۋكاشەنكونىڭ قۇتتىقتاۋىندا قازاقستاننىڭ يگىلىگى مەن وركەندەۋى جولىنداعى نۇرسۇلتان نازاربايەۆتىڭ جان-جاقتى قىزمەتى مەن قاجىرلى ەڭبەگى اسا زور قۇرمەتكە لايىقتى ەكەنى اتاپ وتىلگەن.
«ەۋرازيالىق ەكونوميكالىق وداق قۇرۋ تۋرالى ءسىزدىڭ ۇسىنىسىڭىز ناقتى جۇزەگە استى. بۇل قادام بەلارۋس- قازاقستان ستراتەگيالىق سەرىكتەستىگىن نىعايتادى جانە ەكونوميكالىق الەۋەتىمىزدى، ازاماتتاردىڭ ءال-اۋقاتىن ارتتىرۋ ماقساتىندا دوستاس ەلدەرىمىزدىڭ ءتيىمدى ءوزارا ىقپالداستىعى ءۇشىن بۇدان دا قولايلى جاعدايلار تۋعىزاتىنىنا كۇمان جوق»، - دەيدى ا. لۋكاشەنكو.
مەملەكەت باسشىسىنا وزبەكستان رەسپۋبليكاسىنىڭ پرەزيدەنتى يسلام كاريموۆ ءوز قۇتتىقتاۋىن جولدادى، وندا مەملەكەت جانە قوعام قۇرۋ سالاسىنداعى قازاقستاننىڭ قول جەتكىزگەن تابىستارى، سونداي-اق حالىقتىڭ باقۋات تۇرمىسىن قامتاماسىز ەتۋگە باعىتتالعان اۋقىمدى الەۋمەتتىك-ەكونوميكالىق رەفورمالار نۇرسۇلتان نازاربايەۆتىڭ ەسىمىمەن تىعىز بايلانىستى ەكەنى ايتىلعان.
«عاسىرلاردان تامىر تارتاتىن دوستىققا، تاتۋ كورشىلەستىككە جانە ءوزارا قۇرمەتكە نەگىزدەلگەن وزبەكستان-قازاقستان ۇزاقمەرزىمدى ستراتەگيالىق قارىم-قاتىناسىنىڭ اياسى حالىقتارىمىزدىڭ مۇددەسى، وڭىردەگى بەيبىتشىلىك پەن تۇراقتىلىق جولىندا الداعى ۋاقىتتا دا بارعان سايىن كەڭەيىپ، تەرەڭدەي بەرەتىنىنە سەنىمدىمىن»، - دەلىنگەن قۇتتىقتاۋ ماتىنىندە.
قازاقستان پرەزيدەنتىنىڭ اتىنا سونداي-اق ۋكراينا پرەزيدەنتى پەتر پوروشەنكودان قۇتتىقتاۋ كەلىپ ءتۇستى، وندا قازاقستان مەن ۋكراينا بىرلەسكەن كۇش- جىگەر ارقىلى ەكىجاقتى ىنتىماقتاستىقتىڭ ىلگەرى قاراي دامۋىن، سونداي-اق حالىقارالىق ارەناداعى ءوزارا ءتيىمدى ىقپالداستىقتى قامتاماسىز ەتەتىنى ايتىلعان.
«ۋكراينادا ءبىزدىڭ مەملەكەتتەرىمىزدىڭ حالقىن بىرىكتىرەتىن بايىرعى تاريحي، مادەني جانە ەكونوميكالىق بايلانىستار جوعارى باعالانادى. ۋكراينا مەن قازاقستان اراسىنداعى سەرىكتەستىك قارىم- قاتىناستاردى ودان ءارى تەرەڭدەتۋ دوستاس ەكى ەلدىڭ مۇددەسىنە ساي كەلەدى»، - دەلىنگەن قۇتتىقتاۋدا.