كارىم ءماسىموۆ پەن قايرات كەلىمبەتوۆ پرەزيدەنتكە ەكونوميكا دامۋىنىڭ قورىتىندىلارى جايلى باياندادى

كەزدەسۋ بارىسىندا ۇكىمەت باسشىسى ەلباسىنا ۇستىمىزدەگى جىلدىڭ العاشقى جارتى جىلدىعىندا ەلدەگى الەۋمەتتىك، ەكونوميكالىق دامۋدىڭ قورىتىندىلارىن باياندادى.
قازاقستان پرەزيدەنتى ۇكىمەت باسشىسىنىڭ بايانداماسىن تىڭداپ بولعان سوڭ، ەلدەگى نەگىزگى ماكروەكونوميكالىق كورسەتكىشتەردىڭ، ۆاليۋتا نارىعىنداعى جاعدايدىڭ تۇراقتىلىعىن بارىنشا قامتاماسىز ەتۋ كەرەكتىگىن اتاپ ءوتتى. سونداي-اق مەملەكەت باسشىسى قازىرگى تاڭدا الەمدىك قارجى نارىعىندا ورىن العان جاعدايدى ەسكەرە وتىرىپ، ەكونوميكا سالاسىنداعى بارلىق جۇيەلىك تاۋەكەلدەرگە جان-جاقتى ساراپتاما جۇرگىزۋ كەرەكتىگىن ەسكەرتتى.
ءوز كەزەگىندە ق ر ۇلتتىق بانك ءتوراعاسى قايرات كەلىمبەتوۆ ەلدەگى بانك جۇيەسى مەن قارجى سەكتورىنداعى احۋال تۋرالى باياندادى. كەزدەسۋ بارىسىندا ۇلتتىق بانكتىڭ جۇرگىزىپ جاتقان اقشا- نەسيە ساياساتى دا ءسوز بولدى.
ۇلتتىق بانك ءتوراعاسىنىڭ مالىمدەمەسى بويىنشا، 2014 - جىلدىڭ العاشقى توقسانىندا جالپى ىشكى ءونىمنىڭ ناقتى ءوسىمى 3,8 پايىزدى قۇراعان. ال تاۋار ەكسپورتى وتكەن جىلدىڭ العاشقى توقسانىمەن سالىستىرعاندا 10,8 پايىزعا ءوسىپ، 22,7 ميلليارد دوللارعا جەتىپ وتىر.
ال يمپورت 14,6 پايىزعا تومەندەپ، 8,7 ميلليارد دوللاردى قۇرادى.
الدىن الا مالىمەتتەر بويىنشا ۇلتتىق قوردىڭ كولەمى 77 ميلليارد دوللارعا جەتتى.
كەزدەسۋ سوڭىندا مەملەكەت باسشىسى ەلدەگى قارجى جۇيەسىنىڭ تۇراقتىلىعى مەن ەكونوميكانىڭ دامۋ قارقىنىن ساقتاۋدى قامتاماسىز ەتۋ كەرەكتىگى بويىنشا ءبىرقاتار مىندەتتەر جۇكتەدى.
اۆتور: جاپپاربەرگەن ايبوتا