الەكساندر ياكوۆليەۆ: قۇرمەتتى پۋتين مىرزا، ءبىزدى قورعايتىن ءوز پرەزيدەنتىمىز بار

ويتكەنى ول، بىزدىڭشە قيىن-قىستاۋ تاريحي كەزەڭدە ازاماتتىق پوزيتسياسىن اشىق ءبىلدىرىپ، ءوزىن ناعىز پاتريوت ەكەنىن كورسەتىپ بەرىپ وتىر.
پۋتينگە دەگەن حاتىندا ساشا ءوزىنىڭ قازاقستاندا تۇراتىن ورىس ەكەندىگىن، ءبىراق ر ف پرەزيدەنتىنىڭ كومەگىنە ءزارۋ ەمەستىگىن، ونى قورعايتىن ءوز پرەزيدەنتى بارىن جازىپتى.
وسى حاتتان سوڭ ساشانىڭ بلوگىنا تىركەلۋشىلەر سانى كۇرت ارتقان. وتانداستارىنىڭ بارلىعى الەكساندردى قولداپ، ەلى مەن جەرى ءۇشىن الاڭداۋشىلىق بىلدىرگەنى ءۇشىن العىس ايتىپ جاتىر.
ءوز كەزەگىمىزدە ءبىز دە «وتانىم ماعان نە بەردى ەمەس، مەن وتانىما نە بەرە الامىن» دەپ ءوسىپ كەلە جاتقان ۇرپاقتىڭ كۋاسى بولۋعا قاتتى قۋانىپ، ساشانىڭ حاتىن وزگەلەرگە ۇلگى-ونەگە رەتىندە سول قالپىندا بەرۋدى ءجون كورىپ وتىرمىز!..
قۇرمەتتى ۆلاديمير ۆلاديميروۆيچ!
سوڭعى كەزدەرى ءسىزدىڭ اۋزىڭىزدان كورشىلەس جاتقان ەلدەرگە قاتىستى جاۋلاسۋشى سوزدەردى ءجيى ەستىپ قاپ ءجۇرمىز. ءسىز باسقا مەملەكەتتەردە تۇرىپ جاتقان ورىستار قۇقىعىنىڭ تاپتالىپ جاتقاندىعى تۋرالى ءجيى ايتاسىز.
الايدا «باسقا مەملەكەتتەردە ءومىر ءسۇرىپ جاتقان ورىستار» - سول مەملەكەتتىڭ تولىققاندى ازاماتى ەكەنىن ءسىزدىڭ ەسىڭىزگە سالا وتىرىپ، شەتەلدىكتەردى قالاي قورعاماقسىز دەپ سۇراعىم كەلەدى. ەڭ باستىسى، سوندا كىمنەن؟
مەن قازاقستاندا تۋدىم جانە ونى ماقتان ەتەمىن! ورىس ءتىلىن بۇل ارادا ەشكىم قورلامايدى، كەرىسىنشە، قازاق ءتىلى - ۇنەمى ەكىنشى قاتاردا. وسى ەلدىڭ ازاماتى رەتىندە بۇل جايت مەنى جابىرقاتادى. سوندىقتان مەن مەملەكەتتىك ءتىلدى يگەرۋ ءوزىمنىڭ پارىزىم دەپ ساناپ، ونى ۇيرەنىپ الدىم. وعان مەنى، باسقا ورىستاردى دا ەشكىم ماجبۇرلەگەن جوق. ءبىزدىڭ ۇلى مەملەكەتتىڭ باسقا ازاماتتارى دا وسى جولدى ۇلگى ەتەدى دەپ سەنەمىن.
قۇرمەتتى پۋتين مىرزا، رەسەي تەرريتورياسىندا تۇراتىن ورىستاردى، ياعني ءوز ازاماتتارىڭىزدى قورعاڭىز. ولار شىنىمەن دە ءسىزدىڭ كومەگىڭىزگە اسا ءزارۋ.
ال ءبىزدى قورعايتىن ءوز پرەزيدەنتىمىز بار!
قۇرمەتپەن،
الەكساندر ياكوۆليەۆ، قازاق
«الاش ايناسى»