ۆ. پۋتين: نۇرسۇلتان نازاربايەۆ - كورەگەن ساياساتكەر، ءوز ەلىنىڭ ناعىز كوشباسشىسى

رەسەي پرەزيدەنتى ءوز قۇتتىقتاۋىندا ن. ءا. نازاربايەۆتىڭ وتانداستارىنىڭ شىنايى قۇرمەتىنە بولەنگەنىن، سونداي-اق پاراساتتى ءارى تاجىريبەلى ساياساتكەر، ءوز ەلىنىڭ ناعىز كوشباسشىسى رەتىندە جوعارى حالىقارالىق بەدەلگە يە ەكەنىن اتاپ وتكەن.
ۆ. پۋتين سونىمەن بىرگە، قازاقستان تاريحىنداعى الەۋمەتتىك، ەكونوميكالىق جانە سىرتقى ساياسي جەتىستىكتەرگە تولى تۇتاس ءبىر كەزەڭنىڭ ن. نازاربايەۆتىڭ ەسىمىمەن بايلانىستى ەكەنىن اتاپ ءوتتى.
سونىمەن بىرگە، ۆ. پۋتين ن. ءا. نازاربايەۆتىڭ رەسەي مەن قازاقستان اراسىنداعى ستراتەگيالىق ارىپتەستىك پەن وداقتاستىقتى نىعايتۋعا قوسقان ۇلكەن ۇلەسىنە دە توقتالىپ وتكەن.
رەسەي پرەزيدەنتى ن. ءا. نازاربايەۆتىڭ ەۋرازيالىق وداق قۇرۋ تۋرالى يدەياسى تاريحي مانگە يە دەپ اتاپ ءوتتى. ۆ. پۋتين 2015 - جىلدىڭ 1 - قاڭتارىنان ىسكە قوسىلاتىن ە ا ە و-نى قۇرۋ تۋرالى ورتاق شەشىم وداققا كىرەتىن ەلدەردەگى حالىقتىڭ ءال-اۋقاتىن ارتتىرۋعا مۇمكىندىك بەرەتىندىگىنە سەنىم ءبىلدىردى.
ءسوزىنىڭ قورىتىندىسىندا ۆ. ۆ. پۋتين قازاقستان پرەزيدەنتىمەن اراداعى سەنىمدى، ورنىققان دوستىق قارىم-قاتىناستى جوعارى باعالايتىنىن جانە ەكى ەلدىڭ بولاشاعى ءۇشىن بىرلەسكەن جۇمىستار جالعاسا بەرەتىنىنە ءۇمىتتى ەكەنىن جەتكىزدى.
بۇعان دەيىن حابارلاعانىمىزداي، بۇگىن قازاقستان مەن رەسەي باسشىلارى تەلەفون ارقىلى سويلەسكەن بولاتىن. وندا رەسەي پرەزيدەنتى ۆ. پۋتين ۇلت كوشباسشىسى ن. نازاربايەۆتى تۋعان كۇنىمەن تاعى ءبىر مارتە قۇتتىقتاعان ەدى.