قازاقستان كورشى ەلدەرمەن تىعىز اسكەري ىنتىماقتاستىققا مۇددەلى - ەلباسى

كەزدەسۋ بارىسىندا مەملەكەت باسشىسى ت م د ەلدەرىنىڭ قورعانىس ۆەدومستۆولارى باسشىلارىنىڭ تۇراقتى كەزدەسۋلەرىنىڭ ماڭىزدىلىعىن اتاپ ءوتتى.
- ءبىزدىڭ مەملەكەتتەرىمىزدىڭ بىرلەسكەن تاجىريبەسى، ادامي بايلانىستار، ورتاق ءبىلىم بەرۋدىڭ اسكەري سالانى دا قامتىعان ورتاق ءۇردىسى، قارۋ جاراقتىڭ ءبىرىڭعاي تۇرىمەن جابدىقتاۋ، سونداي- اق سىرتقى شەكارالاردى قورعاۋدىڭ ورتاق كەڭىستىگى - وسىنىڭ ءبارى تىعىز بايلانىستاردى بۇدان ءارى دە ساقتاۋ قاجەتتىگىن بىلدىرەدى، - دەدى قازاقستان پرەزيدەنتى.
نۇرسۇلتان نازاربايەۆ تۇراقسىز گەوساياسي احۋال مەن الەمدىك ەكونوميكانىڭ اۋمالى- توكپەلى جاعدايىندا قازاقستان كورشى ەلدەرمەن تىعىز اسكەري ىنتىماقتاستىققا مۇددەلى ەكەنىنە نازار اۋداردى.
- بىزدە ۇ ق ش ۇ اياسىندا وداقتاستىق قارىم- قاتىناستار، ءوزارا قورعاۋ، اۋە شابۋىلىنا قارسى ورتاق سىرتقى قورعانىس قالىپتاستى. بىزگە وسى قاتىناستاردى جانە ءبىر- بىرىمىزگە دەگەن سەنىمدى ساقتاۋ قاجەت، - دەدى مەملەكەت باسشىسى.
قازاقستان پرەزيدەنتى قورعانىس جانە اسكەري- تەحنيكالىق ىنتىماقتاستىقتى بۇدان ءارى دامىتۋدىڭ ماڭىزدىلىعىن دا ايتتى.
- ءبىز قازىر وزگە مەملەكەتتەرمەن بىرلەسىپ جۇزەگە اسىرۋ ءۇشىن اسكەري تەحنيكانىڭ ءبىرقاتار قۇرامداستارىنىڭ ءوندىرىسىن قازاقستانعا اكەلۋدى ويلاستىرۋدامىز. وسىعان بايلانىستى ءبىز بىرلەسكەن كاسىپورىن قۇرۋدى جان- جاقتى قولدايمىز. كورشى ەلدەردىڭ ەكونوميكالىق جانە ىشكى ساياسي احۋالدارى قازاقستانعا اسەر ەتەدى، سوندىقتان ءبىز كورشىلەرىمىزدە، وداقتاستارىمىزدا، سونىڭ ىشىندە دوستاستىق اياسىندا ءبارى جاقسى بولۋىنا شىنايى تىلەكتەسپىز، - دەدى نۇرسۇلتان نازاربايەۆ.
سوڭىندا مەملەكەت باسشىسى كەڭەسكە قاتىسۋشىلارعا تابىستى ءارى جەمىستى جۇمىس تىلەدى.