لۋ شۇننىڭ قويىن داپتەرىنەن
اسا كورنەكتى اڭگىمە جازۋ شەبەرى. موپاسسان، چەحوۆ، بەيىمبەت مايلين سىندى قابىرعالى قالامگەرلەرمەن يىق تىرەستىرە الادى.
ق ح ر جى جياڭ ولكەسىندە تۋعان. ول ءوز تۋعان حالقىنا جۋرناليست، ويشىل رەتىندە دە تانىمال.
جازۋشى تولعانىستارى
بولاشاق دەپ اتالاتىن نارسە ءسوز جوق جەتىپ كەلەدى. امال نە، ول كەزگە كەلگەندە، ول سول كەزدىڭ «قازىرگى شاعى» بولىپ قالادى. دەگەنمەن ادامدار مۇنداي سارى ۋايىمعا سالىنباۋى كەرەك. «سول كەزدىڭ قازىرگى شاعى» «قازىرگى كەزدىڭ قازىرگى شاعىنان» جاقسىراق بولسا بولعانى، مۇنىڭ ءوزى العا باسقاندىق بولىپ سانالادى.
1925 - جىل 28 - ناۋرىز
گازەتحانالارعا ماقالا جىبەرۋدە جۇلدىزى وڭىنان تۋاتىن كەزدەر دە بولادى. بىرىنشىدەن، رەداكتور مىرزالار دەگەنمەن توپاستاۋ كەلەدى. ەكىنشىدەن، ماقالالار كوبەيگەن سايىن ادامنىڭ باسىن اينالدىرىپ، كوزىن شۇبارتىپ جىبەرەدى. مەن تاياۋدان بەرى ۇنەمى ماقالا كورىپ جاتىرمىن، بوس ۋاقىت جوق ەكەنىن بىلاي قويعاندا، دىڭكەم ابدەن قۇرىپ ءبىتتى.
1925 -جىل 31 - ناۋرىز
ءبىر ادامنىڭ ءوزىن وزەك ەتۋى ەكىتالاي. كەيدە وزگە ادامدار ونىڭ وزەگىنە اينالىپ قالادى. سوندىقتان، وزگەلەر ءۇشىن دەپ اۋىزدا ايتقانىمەن، شىنىن قۋعاندا ءوزى ءۇشىن بولىپ شىعادى. وسى سەبەپتى، «ءوزى كەسىپ، ءوزى پىشە المايتىن» ىستەر دە ءار قاشان كەزدەسىپ وتىرادى.
1926 -جىل 15 - قاراشا
بۇرىن ماحاببات تۋرالى وقتا-تەكتە ويلاپ قالعاندا بۇل مەنىڭ نە تەڭىم دەگەندەي قاشان دا وزىمنەن ءوزىم قىسىلىپ، ۇيالىپ قالاتىنمىن. سونىمەن پالەندەي ءبىر ادامعا ىڭكارلىق بىلدىرۋگە باتىلىم جەتپەگەن ەدى. ءبىراق، ولاردىڭ ءسوز-ارەكەتتەرىنىڭ، وي-پىكىرلەرىنىڭ ىشكى سىرىن انىق كورگەن سوڭ، مەن ءوزىمدى سونشالىق دارەجەدە تومەندەتىپ جىبەرۋگە ءتيىستى ەمەس ەكەندىگىمە كوزىم جەتتى. مەنىڭ دە سۇيۋىمە بولادى!
1926 -جىل 11 - قاراشا
ادەبيەتپەن شۇعىلدانعىسى كەلەتىندەر، ءبىرىنشى، شىدامدى، ەكىنشى، مۇقيات، ءۇشىنشى، تاباندى بولسا بولعانى، كەيبىرەۋلەردىڭ ازىپ كەتكەنى ءۇشىن سارى ۋايىمعا سالىنۋعا بولمايدى. ادەبيەت پەن قوعامنىڭ قاتىناسى، ەڭ اۋەلى، ادەبيەت قوعامدى سەزىمتالدىقپەن سۋرەتتەپ بەرەدى. ەگەر پارمەندى بولسا، قايتا اينالىپ كەلىپ قوعامعا ىقپال جاساپ، وزگەرىس تۋعىزادى. بۇل كۇنباعىس مايىنىڭ كۇنباعىستان الىناتىنى، ونان سوڭ ماي جاسالاتىنى سياقتى.
1933 -جىل 20 - جەلتوقسان
كوركەمونەردەگى شىندىق تاريحي شىندىق ەمەس ەكەندىگىن ەستىگەنىمىز بار. ويتكەنى، سوڭعىسىندا وقيعانىڭ ءوزى بولۋى كەرەك. ال جاسامپازدىقتا قيىستىرۋعا، سۋرەتتەۋگە ابدەن بولادى. شىندىقتان اينىماي كەلسە بولعانى. شىن وقيعانىڭ ءوزى قاجەت ەمەس. ال ونىڭ قيىستىرىپ، سۋرەتتەپ شىققاندارى قوعامدىق بولمىستان تىس بولمايدى. وي قورىتۋ جولىمەن وسى كوز الداعى ادامداردى، وقيعالاردى ونان ءارى توپشىلاپ، ورىستەتە تۇسەدى. بۇل بەينە ساۋەگەيلىككە ۇقسايدى.
دايىنداعان: مەيىرجان اۋەلحان ۇلى
