ەركەكتى باعىندىرۋدىڭ امالدارى

ولارعا اڭگىمەنىڭ توق ەتەرى كەرەك. ازاننان كەشكە دەيىن قۇلاقتىڭ قۇرىش ەتىن جەپ، ارا قۇساپ ىزىڭداي بەرگەننەن دە ولار جالىعادى. شارشايدى. ءتىپتى، بەزىپ، بەز تەرىپ كەتۋگە بار. ولاردىڭ قۇلاققا قوناتىنىن عانا تىڭداپ، قالعانىنا ءمان بەرمەي سۇلەسوق قارايتىنى تاعى دا راس. ونىڭ ۇستىنە ەركەك دەگەن ەركىندىكتى ۇناتادى. ءوزىنىڭ وتباسىنداعى باسيە ەكەندىگىن دالەلدەۋدى، قاشاندا ءوزىنىڭ ايتقانى ورىندالاتىنىن ولار ءاماندا ماقتانىش تۇتادى. سوندىقتان ايەلىنىڭ ءامىر بەرگەنىن ولار قالامايدى. مۇنى ولار قوجايىندىعىما قول سۇعۋ دەپ بىلەدى. ونىڭ ويىنشا ايەل تەك ورىنداۋشى، ەكىنشى ورىنداعى ادام. ءاماندا ايەلىنىڭ ءامىر بەرۋى ابدەن جۇيكەسىن جۇقارتقاندا اۋزىنان ءسوزى، قوينىنان ءبوزى ءتۇسىپ قالعان دەگەن ەركەگىڭنىڭ ءوزى دە ءبىر كۇنى بومبا قۇساپ «جارىلادى» .
پسيحولوگتاردىڭ پايىمداۋىنشا، ەر مەن ايەلدىڭ اراسىن جاقىنداستىرىپ، جىمداستىرىپ جىبەرۋدىڭ سان-ءتۇرلى امال ايلاسى جەتىپ ارتىلادى ەكەن. مۇنىڭ ءبارى دە بولاشاققا بىرگە ۇشىپ بارۋ ءۇشىن قاجەت قاعيدالار.
ەندەشە:
ايەل كۇلسە، الەم كۇلەدى
قاباعىڭىزدى قارس ءتۇيىپ، تۇنجىراڭقى ءجۇرۋ وتاعاسىنىڭ جۇيكەسىنە تيەدى. كۇندەلىكتى كۇيبەڭ تىرشىلىكتەن ءبىر ءسات تە بولسا سەرپىلىپ، كۇيەۋىڭىزگە كەرەمەت «كليمات» سىيلاۋ قيىن ەمەس. ول ءۇشىن جۇمىستان شارشاپ، شالدىعىپ كەلگەندە، الدىنان كۇندەي كۇلىمدەپ شىقساڭىز بولعانى. ونىڭ ەكى ەزۋى ەكى قۇلاعىنا جەتىپ، مۇز سياقتى ەل- سەل بولىپ ەرىپ جۇرە بەرۋى ءاپ-ساتتە. «ايەل كۇلسە، الەم كۇلەدى» دەگەندى ءبىر ءسات تە ۇمىتپاعان ءجون.
«ەركەك اسقازانى ارقىلى سۇيەدى»
ول راس. تۇزى تاتىماعان، ءدامسىز تاماقتان جالىققان كۇيەۋىڭىز قولى ەپسەكتى، ءتىل ۇيىرەر ءتاتتى تاماق پىسىرەتىندەرگە اڭسارى اۋۋى عاجاپ ەمەس. سوندىقتان دا، اسىعىس ۇسىگىس، ءجۇردىم باردىم ايتەۋىر بىردەڭەنى شىج-بىج ىستەي سالعان دۇرىس ەمەس. اسىرەسە، كۇيەۋىڭىز ءسۇيسىنىپ جەيتىن تاعامداردى بار ونەرىڭىزدى سالىپ دايىنداۋدى ۇيرەنىپ الۋدىڭ ەش ارتىقتىعى جوق. ول ءۇشىن ىقىلاس بولسا بولعانى. كىتاپ دەگەن جەتەرلىك. ونىڭ ۇستىنە تەلەديداردا دا اس ءپىسىرۋدىڭ قىر-سىرىن ۇيرەتەتىن باعدارلامالار دا كومەكتەسە الادى. ءتىپتى، بولماسا بارماعىنان بال تامعان اسپازداردان اقىل كەڭەس العاننىڭ دا ارتىقتىعى جوق.
«بۇيرىق تالقىلانبايدى، ورىندالادى»
وتاعاسىنىڭ ايتقانىن ەكى ەتپەي ورىنداۋعا ۇمتىلساڭىز، ۇتىلمايسىز. «ولاي ەمەس، بۇلاي بولۋى كەرەك» دەپ قارسى مايدانعا شىعۋدىڭ قاجەتى جوق. وندايدا كۇيەۋىڭىزدىڭ قىزۋى 40 گرادۋسقا كوتەرىلىپ كەتۋى مۇمكىن. اشۋلانعان ەركەكتى ەشقاشاندا ايقايلاسىپ جەڭە المايسىز. ونىڭ دا كوڭىلىن قالدىراسىز، ءوزىڭىزدىڭ دە جۇيكەڭىز توزادى. اشۋى باسىلعاسىن، «باسەكە، بىلاي ەتسەك قالاي بولار ەكەن؟» دەپ ويىڭىزدىڭ تۋرا ەكەنىن دالەلدەي بىلسەڭىز، ول جايىلىپ سالا بەرەدى.
«قايراتى قايتپاسىن...»
مايدا-شۇيدەگە دەيىن ءمان بەرىڭىز. كەيدە قولىم تيمەي جاتىر دەپ ونىڭ قولىنا وجاۋ ۇستاتۋدىڭ قاجەتى جوق. ونىڭ ينە ۇستاپ وتىرعانىن، كىر جۋعانىن قالاپ تۇرساڭىز دا، وعان جول بەرمەڭىز. بىرىنشىدەن، قازان وشاققا جولاعان ەركەكتىڭ قايراتى قايتادى. ەكىنشىدەن، اسحانادا مىقشىڭداۋدى ەشقانداي ەركەك قالامايدى. ولار ءۇشىن بۇل ۇساق-تۇيەك.
«ەلدىڭ ەركەگى...» دەۋدىڭ قاجەتى جوق
قىمبات تون العىڭىز كەلدى. قۇربىلارىڭىزدىڭ ءبارى كيىپ ءجۇر. سىزدە عانا جوق. بۇل جەردە «ەلدىڭ ەركەگىن كوردىڭ بە؟» دەۋدىڭ ءتىپتى دە قاجەتى جوق. وزىنەن مىقتى شىققانىن ەش ەركەك جاراتپايدى. ودان دا بيپازداپ وتىرىپ، كوزىن جەتكىزىپ ايتساڭىز عانا ءمان بەرەدى. ءارى قىمبات تونعا دەگەن قىزىعۋشىلىعىڭىزدى «كوردىڭ بە، پالەنشە ايەلىنە پالەن مىڭنىڭ تونىن اپەرىپتى دەپ ەل ەرتەڭ شۋلايدى» دەسەڭىز جايىلىپ تۇسەدى.
ول بار جەردە كەرەگەنىڭ كەڭ سياقتى ەكەنىن سەزىنۋ ءۇشىن وعان ۇنەمى دەم بەرىپ وتىرعان ءجون.. .
اۆتور: جۇماگۇل جۇماش
«الاش ايناسى»