ەلباسى: نازاربايەۆ ورتالىعى عيماراتى - ەنەرگيا ۇنەمدەۋدى دامىتۋ باعىتىندا ماڭىزدى نىسان

ايتا كەتەيىك، يندۋستريالدىق نىسانداردى ىسكە قوسۋعا ارنالعان بۇل شارا نازاربايەۆ ورتالىعى عيماراتىندا ءوتىپ جاتىر.
«وسى نىساندى مادەني ورتالىق دەپ ساناۋ كەرەك. عيماراتتىڭ ساۋلەتى - ەلىمىزدىڭ داۋلەتى مەن الەۋەتىن، ارمانى مەن تاڭداۋىن ايگىلەپ تۇرعانىن كورىپ وتىرسىزدار. باس قالانىڭ كوركىن ودان ءارى قاراي اشا بەرەتىن يگىلىكتى حالىققا قىزمەت ىستەيتىن ۇلكەن شاڭىراق بولسىن دەپ تىلەيمىز» ، - دەدى مەملەكەت باسشىسى.
وسى ورايدا ەلباسى بۇل نىسان استانانىڭ كۇنىنە تاعى دا ءبىر تاماشا سىيلىق ەكەنىن اتاپ ءوتتى. عيماراتتىڭ قۇرىلىسىندا پايدالانىلعان اينەكتەردەن تۇسەتىن كۇننىڭ جىلۋى ەنەرگيانى ۇنەمدەۋگە سەپتىگىن تيگىزەدى.
پرەزيدەنت بۇل تۇرعىدا 30 مىڭ شارشى مەترلىك 9 قاباتتى بۇل عيمارات ەنەرگيا ۇنەمدەۋدى دامىتۋدا «جاسىل ەكونوميكا» باعىتىنداعى ەلىمىزدە جۇزەگە اسىرىلعان ماڭىزدى نىسان ەكەنىن ايتتى.
«بۇل عيماراتتىڭ پايدالانۋعا بەرىلۋى «ەكسپو-2017» حالىقارالىق كورمەسىنە دايىندىق اياسىندا ءبىزدىڭ ماقساتتار تۇرعىسىندا وتە ماڭىزدى» ، - دەدى ن. نازاربايەۆ.