ءانشى الماتىداعى جەكەمەنشىك ەمحانادا بوسانعاننان كەيىن كوز جۇمدى

ال انگەلينانىڭ ارتىندا كۇنى كەشە عانا بوسانعان شاراناسى قالدى. ءسابيدىڭ دەنى ساۋ. كىشكەنتاي ەليزا وتباسىنداعى ەكىنشى ءسابي.
قايعىدان قان جۇتقان تۋىستارى بۇعان دارىگەرلەردى كىنالاپ وتىر. سەبەبى، جاس انا بىرنەشە كۇن بويى ەس- ءتۇسسىز جاتقان كورىنەدى. «سول كۇيى ەسىن جيماستان، باقيلىق بولدى» دەپ، جاقىندارى زار يلەۋدە. مارقۇمدى جەر قوينىنا تاپسىرعان تۋىستارى سالعىرتتىق تانىتقان دارىگەرلەرمەن سوتتاسامىز دەپ بەكىنىپ وتىر.
تۋىستارىنىڭ ايتۋىنشا، جاتىردىڭ ەندومەتريوزى بار كەلىنشەك №1- پەرزەنتحاناعا جاتقىزىلۋى ءتيىس ەدى. «ءبىراق سوڭعى ساتتە دارىگەرلەر ونى قابىلداۋدان باس تارتتى»، - دەيدى ولار.
«ءدال وسى الماتىعا اتى بەلگىلى دارىگەردىڭ جەكە مەنشىك مەديسينالىق ورتالىعى انگەلينانىڭ سوڭعى نۇكتەسى بولدى»، - دەيدى قۇربىسى. اياعى اۋىر كەلىنشەككە جوسپارلى كەسەر تىلىگىمەن وتا جاسالىنىپتى. ناركوزدان ويانعان ايەل ءوز- وزىنە كەلە باستاعان. «ءبىراق سول ءتۇنى جاعدايى كۇرت ناشارلادى»، - دەيدى تۋىستارى. بىردەن باسى اۋىرىپ، ساندىراقتاي باستاعان ساتتە قاسىنان دارىگەر تابىلمادى دەپ وتىر. ال كەلەسى كۇنى تاڭەرتەڭ انگەليناعا رەانيموبيل (مەديسينالىق جەدەل جاردەم كولىگى) شاقىرتىپ، انا مەن بالا دەنساۋلىعىن ساقتاۋ ورتالىعىنا جەتكىزىلىپتى. وندا وعان قايتا وپەراسيا جاسالىنعان ەكەن. «ءبىراق كەزەكتى وتا كومەگىن تيگىزبەدى»، - دەيدى قۇربىسى.