12:33, 30 - ماۋسىم 2014 | GMT +5
جەمقورلىقپەن كۇرەس جونىندەگى كوميسسيا ساياسي مەملەكەتتىك قىزمەتشىلەردىڭ دە ءىسىن قارايتىن بولادى
استانا. قازاقپارات - ق ر پرەزيدەنتى جانىنداعى جەمقورلىقپەن كۇرەس جونىندەگى كوميسسيا ساياسي مەملەكەتتىك قىزمەتشىلەردىڭ دە ءىسىن قارايتىن بولادى.

بۇل تۋرالى بۇگىن اقوردادا اتالعان كوميسسيانىڭ كەڭەيتىلگەن وتىرىسىندا ق ر مەملەكەتتىك حاتشىسى ادىلبەك جاقسىبەكوۆ ءمالىم ەتتى.
«وزدەرىڭىزدە بىلەتىندەي، كوميسسيا قىزمەتتىك تەكسەرۋ جۇرگىزۋ نەگىزىن، شارتىن جانە ءتارتىبىن رەگلامەنتتەيتىن نورمانىڭ بولماۋىنان جەمقورلىققا قارسى زاڭنامانىڭ جانە قىزمەتتىك ادەپ نورمالارىنىڭ بۇزىلۋىنا جول بەرگەن ساياسي مەملەكەتتىك قىزمەتشىگە قاتىستى ءىس قاراعان جوق» ، - دەدى ءا. جاقسىبەكوۆ.
مەملەكەتتىك حاتشىنىڭ اتاپ وتۋىنشە، قازىرگى ۋاقىتتا كوميسسياعا اتالعان وكىلەتتىكتى جۇزەگە اسىرۋعا مۇمكىندىك بەرەتىن سايكەسىنشە تۇزەتۋلەردى نورماتيۆتىك بازاعا ەنگىزۋ جۇمىستارى جۇرگىزىلۋدە.
اۆتور: مارلان جيەمباي