كەيۋانانى كەمسەڭدەتكەن كىم؟

 استانا.قازاقپارات - ەڭكىلدەپ جىلاپ كەلە جاتقان اجەيدى سونادايدان كوزىم شالعان. ءبىراق، «مۇنداي كارىلىك تيگەن شاعىندا ونى ەشكىم رەنجىتە قويماس»، - دەپ ىشتەي جاماندىققا قيماي تۇردىم. ءبىراق، وبالىما نە كەرەك، كۇدىگىم راس بوپ شىقتى.
None
None

جۇپىنى كيىنگەن قارت كەمپىر بەلى بۇكىرەيىپ، ەكى قولىن ارتىنا سالعان كۇيى اقساڭداپ بولسا دا، تەز جۇرۋگە ۇمتىلىپ كەلە جاتىر. اۋىق-اۋىق كوز جاسىن ورامالىنىڭ شەتىنە ءسۇرتىپ قويادى. جاقىنداعان سايىن مەن ونىڭ كىم ەكەنىن شىرامىتا باستادىم.

بىردە وسى اجەي اۆتوبۋسقا مىنگەن بولاتىن. سوندا ىشتە وتىرعان ءبىر كەلىنشەك كەلەمەجدەپ «و- ە- بۋ، مىنا كەمپىرلەر باياعى ءبىزدىڭ بالا كەزىمىزدەگى ادەمى كەلىنشەكتەر عوي»، - دەپ بەتىن شىمشىپ، ەرنىن پىپ ەتكىزگەن. اجەمىز سول كۇنى كوڭىلدى بولدى ما، ايتەۋىر لەزدە «ءيا، ادەمى كەزىمىزدى كوردىڭدەر عوي، ەندى جامان كەزىمىزدى دە كورىڭدەر» دەپ قۋارعان يەگىن كەمسەڭدەتىپ، ءبارىمىزدى كۇلكىگە بولەگەن ەدى. ال ەندى بۇگىنگى كۇيى تىپتەن بولەك.

انانىڭ قايعىسى

مەن ايالدامادا اۆتوبۋس كۇتىپ تۇرعاننان بەرى جانىمدا جاسى 70  كە تاقاپ قالعان كىسى تۇرعان بولاتىن («ايالداما» دەگەن اتاۋى بولماسا، ءبىزدىڭ اۋىلدا اۆتوبۋس تۇراعى جوق. ءبىر ادام تۇرسا بولعانى، جانىنا ەكىنشىمىز كەلىپ قوسىلىپ، وزىمىزشە ايالدامانىڭ ستاتۋسىن الىپ الامىز). سول كىسى الگى اجەيدىڭ كورشىسى ەكەن. «اپا، نە بولدى؟ » دەگەنى سول ەدى، اجەيدىڭ قايعىسى ارتا ءتۇستى مە، ودان بەتەر ەڭكىلدەپ قويا بەردى.

قارتتاردىڭ جىلاعانى مۇنشالىق، ايانىشتى بولار ما ەدى. جۇرەگىڭ قارس ايرىلادى ەكەن. «بالام كوپتەن بەرى اۋزى قۇرعاماستان اراق ءىشىپ ءجۇر. ءۇش كۇن ۇيدە تۇنەمەي، قۇلاعىم تىنىشتالىپ قالىپ ەدى، ەندى بۇگىن كەلىپ، بولمەلەردىڭ تاس-تالقانىن شىعارىپ جاتىر. ىدىستان ىدىس قالمادى. سىندىرىپ جاتىر. اراققا اقشا سۇرايدى. مەندە قايدان اقشا بولسىن؟ ءوزىم سول بالانىڭ قولىنا قاراپ وتىرمىن عوي. قورىققاننان قاشىپ بارا جاتىرمىن. قايدا باراتىنىمدى بىلمەيمىن»، - دەدى.

الگى جاي-كۇيدى سۇراپ تۇرعان اعامىز اجەيدىڭ بالاسىن جاقسى تانيتىن سياقتى. ءبىراق، ۇيىنە بارىپ، وعان اقىل ايتۋعا جۇرەگى داۋالامادى. بۇل كىسىدەن دە قايىر بولمايتىنىن تۇسىنگەن قارت انا بەتى اۋعان جاققا قاراي جۇرە جونەلدى.

اعامىزدىڭ اڭگىمەسى

بۇل اپامىز شالى باردا وتە جاقسى تۇردى. وسى اۋىلدىڭ الدى ەدى. اعامىز قىزمەت ىستەدى. ۇيىنەن قوناق ارىلمايتىن. كىلەڭ باستىق سىماقتار. ءبىراق ىشكەندەرى اراق بولاتىن. «مادەنيەتتى ءىشىپ وتىرمىز»، - دەيتىن. اراق ىشىلگەسىن، ونىڭ مادەنيەتتى-مادەنيەتسىزى بولسىن با؟ قويش!

 سونىمەن بۇلاردىڭ ەكى بالاسى بار. ءبىرى قىز. قازىر تۇرمىستا. ءبىراق مۇندا تۇرمايدى. ەكىنشىسى - مىنا ۇلى. ءالى ۇيلەنگەن جوق. جاسى بولسا قىرىقتان استى. جۇرگەن ءبىر القاش. اپتانىڭ سەگىزىنشى كۇنى بولسا، سول كۇندى دە اراقسىز وتكىزبەيتىن شىعار. ەكى بالاسى دا ەش تارشىلىق كورمەدى. نە جەيمىن، نە ىشەمىن دەمەدى. ەندى بۇگىنگى اتا-اناسىنا ايتقان راحمەتى وسى بوپ تۇر...

تەرەڭ وي

اۆتوبۋسقا قالاي مىنگەنىمدى بىلمەيمىن. جول بويى ۇلكەن ويمەن بولدىم. اجەي قاي جەردەن قاتە جىبەردى، قاي جەردەن شالىس باستى ەكەن؟ بالالارىنىڭ بار جاعدايىن جاساعان بولسا، ولار نەگە مۇنداي قاتىگەز بولىپ ءوستى؟ كوپ ويىمنىڭ سوڭى ءبىر جەرگە توقتادى. ول-يمانسىزدىق. يمانسىزدىق بارشا جاماندىقتىڭ باسى.

ادەتتە ءبىز يماندى ناماز وقىپ، ورازا ۇستاۋ دەپ قانا قابىلدايمىز. ءبىراق، يمان - (نامازدى ايتپاعاننىڭ وزىندە) تاربيە، قارىم-قاتىناس، بالانى ەڭبەككە باۋلۋ، جاقسىلىققا ۇيرەتۋ ەمەس پە؟ باستىسى، سول ۇيرەتىپ جاتقان نارسەگە اتا-انانىڭ ءوزى لايىقتى بولۋ. ءوزىڭىزدىڭ ادام سۇيەر قىلىعىڭىز بولماسا، بالاڭىزعا ادامگەرشىلىك تۋرالى اڭگىمە ايتۋ جاراسا ما؟ ال ايتتىڭىز.

اراق قۇيىلعان ستاقان ۇستاپ وتىرىپ، «بالام، ال، مىناۋ تۋعان كۇنىڭ قۇتتى بولسىن! اناۋ دا، مىناۋ»، - دەپ اۋزىڭىزدان اراق مۇڭكىپ، ەسىڭىزدى جارتىلاي ءبىلىپ، مىلجىڭداپ وتىرسىز. بالاڭىز بولسا «ءاۋمين، ءاۋمين»، - دەپ باس شۇلعىپ وتىر. وسىنى جاستايىنان كورگەن بالا وسە كەلە ورتادان ءبىر ءدىن شىعارادى. وزىنە اۋىزشا «مۇسىلمان» دەگەن اتاق تاعىپ، ال قولىنا ستاقان ۇستاۋعا مۇمكىندىگى بار ەكەنىن ۇعادى. ويتپەگەندە ءقايتسىن؟ كورگەنى سول بولسا! ال «اراقتى ءبىر ءىشۋ قيىن ەمەس، ەكىنشى رەت ىشپەۋ مۇمكىن»، - ەمەس دەگەن رەسمي بەكىتىلمەگەن ماقال بار قوعامدا. ءبىر ءىشىپ كورۋدىڭ ارتى القاشتىققا ۇلاسپاۋىنا ەش كەپىل جوق.

و دۇنيەگە قامدانۋ

بۇل وقيعانىڭ قارت اجەيگە قاتىسى جوق. ءبىراق، ونى دا وسى قاسىرەت كۇتىپ تۇرماسا جارار ەدى.

 جاقىندا بەيىت جاقتان ىرگەتاسى قۇيىلعان، ءبىراق ادامى ءالى جەرلەنبەگەن كوپتەگەن ورىن كوردىم. ءدال وسى ورىنداردى بىرنەشە ايدان بەرى بايقاپ جۇرگەنمىن. سويتسەم ءبىزدىڭ اۋىلدا اقشاعا ادام جالداپ، ءوز بەيىتتەرىن قامداپ قوياتىندار پايدا بوپتى. بالالارىنان ەش قايىر بولماسىن ءبىلىپ جۇرگەن كەيبىر قارتتار ولگەننەن سوڭعى جايلارىن وسى باستان ويلاپ، زەينەتاقىلارىنان جىرىپ، ىرگەتاس قۇيدىرتىپ قويادى ەكەن. نەتكەن قورقىنىشتى! اكە- شەشەسىن سوڭعى ساپارعا اتتاندىرۋعا دا جاراماعان بالادان قورقىنىشتى بۇل ومىردە نە بار ەكەن؟

jaqsy.kz 

سوڭعى جاڭالىقتار