ەفير اۋرۋى دەگەن نە؟

استانا. قازاقپارات - «...ۇزاق جىل تەلەۆيزيا سالاسىندا جۇرگەندىكتەن ءوز باسىم وسىنداي اۋرۋدىڭ بار ەكەندىگىنە كۇمان كەلتىرمەيمىن. باعدارلاما جۇرگىزىپ، ەل اۋزىنا ءىلىنىپ قالعان ادامنىڭ ونسىز تۇرا المايتىندىعىنا سان مارتە كۋا بولدىم».
None
None

«كوك جاشىكتەن» تاعى كورىنۋ ءۇشىن ول ادام بارىنە بارادى. كوكەسىن سالادى.

تانىس، تامىرىن جاعالايدى. «كورىنبەي كەتتىڭ عوي» دەگەن ءسوزدى جۇرەگىنە اۋىر الىپ، جاتىپ قالاتىندارىن قايتەسىز. ول دارىندى اكتەر نەمەسە تالانتتى ءانشى بولۋى مۇمكىن.

ۇشقىر سيۋجەتتەر جاسايتىن كەرەمەت جۋرناليست تە بولۋى عاجاپ ەمەس. ەفيردىڭ ءدامىن تاتىپ قالعان ادام مۇنىڭ ءبارىن ۇمىتادى. وعان كيەلى ساحنادا ونەر كورسەتكەننەن تەلەۆيزوردا جىلتىڭداپ كورىنگەن الدەقايدا ارتىق.

ەفيردەن ايرىلعان ادام ەل نازارىن اۋدارتۋدىڭ سان ءتۇرلى امالدارىن جاسايتىنى دا بار. الىسقا بارماي-اق قويايىن. ءبىر كەزدەرى شاشىن تاقىرلاپ الىپ تاستاپ، ەلدىڭ ەسىن شىعارعان قىز قازىر نەگە ورامال تاعىپ، بارىمىزگە اقىل ايتۋعا كوشتى؟

تۇسىنگەن بولارسىزدار. سوندىقتان ازامات (ساتىبالدى) باۋىرىم وسى ءبىر «اۋرۋدان» ايىققان سەكىلدى. قۋانىشتىمىن! باسقالاردىڭ دا تەزىرەك ايىعىپ كەتۋىنە تىلەكتەسپىن. دۇرىسى سول بالەنىڭ الدىن الۋ عوي دەيمىن» دەگەن ارمان سقابىل ۇلىنىڭ الەۋمەتتىك جەلىلەردىڭ بىرىندەگى پىكىرى - اقىلدان تاسىنىپ ەمەس اشىنىپ، بارىنشا باتىرىپ ايتىلعان ەكەن عوي دەگەن ويدا قالدىردى.

ول كىسىنىڭ بۇگىنگى تەلەارنا اتاۋىنىڭ جاي-جاپسارى تۋراسىندا: «تەلەارنالاردا مەكتەپ دەيتىندەي مەكتەپ قالدى ما؟ باعدارلامالاردىڭ بارلىعى سىرتتا جاسالادى. وندا كىل جاستار. باسشىلارى قازاق ءتىلدى ەمەس. ولارعا اقىل ايتاتىن ەشكىم جوق. بىرەن-ساران جۋرناليستەرگە قولدان كەلگەنشە كومەكتەسۋگە، اقىل ايتۋعا تىرىسىپ جاتىرمىز.

ءبىراق، مۇنى مەكتەپ دەۋگە اۋزىم بارمايدى»، -  دەپ نالۋى وتە ورىندى. سەبەبى، جوقتان باردىڭ كەبىن كيگەن جاعداي وسىنداي بولىپ وتىر. وسىدان بارىپ، دايىن ونىمدەردى شىعارۋ باستى قىزمەتى سانالعان بۇگىنگى ارنالار - دارمەنسىز بە الدە قۇلىقسىز با؟ «جەكەمەنشىك پروداكشن ستۋديالار ونىمدەرىنىڭ ساپاسى سىن كوتەرە مە؟» دەگەن بەلى بۇكىر سۇراق تۋىندايدى. ونىڭ جاۋابىن مىنا سيپاتتامامەن انىقتاۋعا بولاتىن سياقتى. ەڭ الدىمەن قالتاسى قالىڭ، بەرىس-الىسى، سونىمەن قوسا، تانىسى بار ورىس ءتىلدى باسشىلاردىڭ قولداۋىمەن جارىققا شىعىپ جاتقان تەلەباعدارلامالاردىڭ كوبى دەرلىك حالىقتىڭ جۇرەگىنە جول تابامىز دەپ ەمەس، شوۋ جاساپ، رەيتينگ كوتەرەمىز دەگەن ويمەن شىعارىلىپ كەلەدى.

قۇرت-قۇمىرسقا جەپ، ايعايلاپ، شىڭعىرعاندى «قىزىق كورگەن» باعدارلامالاردىڭ كۇرت قاپتاپ كەتۋى، ەكى ءانشىنىڭ باسىن قوسىپ، ۇرىستىرىپ، جۇلىستىرىپ، حالىقتىڭ الدىندا قادىرىن كەتىرتىپ، عايباتتاپ وتىرۋىن تاماشالاۋعا ۇندەگەن باعدارلامالاردىڭ جاۋلاپ الۋى جەڭىل ويدىڭ كورسەتكەن قورلىعى. قازاق تەلەۆيزياسى تاريحىندا بۇرىن-سوڭدى شىققان باعدارلامالار دەڭگەيىمەن بۇگىنگى باعدارلامالاردى تىپتەن سالىستىرۋعا كەلمەيدى.

سانالى ۇرپاقتان سانالى كورەرمەن شىعارىپ، مەرەيىن ۇستەم ەتە بىلگەن «ۇيات بولماسىن» باعدارلاماسىندا ءانشى، اكتەر اتاۋلى بولمادى ەمەس بولدى، قاتىسپادى ەمەس، قاتىستى. اركىمنىڭ ءوز ورنى، بەرىلگەن ءرولى بار. قاتىسۋشىلار ءوز جونىمەن، جوسىعىمەن سويلەپ، حالىقتى ايعايسىز، شۋسىز، وسەك، اياڭسىز-اق وزىنە قاراتتى ەمەس پە؟ وسىدان كەلىپ، حالىق جادىندا جەڭىل-جەلپى، ءمانسىز-ماعىناسىز بوس دۇنيەدەن گورى، اقىلعا قونىمدى، ەرتەڭگە قالار ويى بار تىڭ جوبالاردىڭ ءقادىرلى بولاتىنىنا ۋاقىت كوزىمىزدى جەتكىزەدى.

اۆتور: ەركەجان جۇماتاي

«تۇركىستان»

سوڭعى جاڭالىقتار