كۇرەستەردىڭ ەڭ ۇلىسى، وزىڭمەن ءوزىڭ كۇرەسۋ، ءوز قاتەلىگىڭدى تۇزەۋ

استانا. قازاقپارات - سانيا ەرزات قىزى - ع. مۇسىرەپوۆ اتىنداعى بالالار مەن جاسوسپىرىمدەر تەاترىنىڭ اكتريساسى.
None
None

"التايدىڭ ار جاعىنان كەلگەن ارۋ" تەاتر قويىلىمدارىمەن قاتار بىرنەشە فيلمدەرگە ءتۇسىپ كورەرمەن كوزايىمىنا اينالدى.

ونەرىم-ءومىرىم دەپ، ساحناعا جان-تانىمەن بەرىلگەن تالانتتى اكتريسامەن بولعان سۇحباتتى نازارلارىڭىزعا ۇسىنامىز.

- سالەمەتسىز بە، سانيا اپاي، سۇحباتىمىزدى تۋعان جەر، وسكەن ورتاڭىزدان باستاساق...

-  تۋعان جەرىم قىتاي حالىق رەسپۋبليكاسى، شينجاڭ ۇيعىر اۆتونوميالى ولكەسى، التاي ايماعى، بۋرشىن اۋدانىندا تۋىلدىم. ورتا مەكتەپتى سول جاقتان ءبىتىرىپ، 2001 - جىلى الماتىعا وقۋعا كەلدىم. وتباسىندا ءتورت اعايىندىمىز.

مەن ءۇيدىڭ ۇلكەنىمىن. مەنەن كەيىن ءۇش ءسىڭىلىم بار. ءبىز مۇندا تەك اكەمنىڭ قارىنداسى، ءوزىمنىڭ تۋعان ءسىڭىلىم جانە مەن ۇشەۋىمىز عانا كەلدىك. ول جاقتا انام، اعايىن-تۋىس، باۋىرلارىمىز، اتا-اجەلەرىمىز قالىپ قويدى. انام قازاق ءتىلى مەن ادەبيەتى ءپانىنىڭ ءمۇعالىمى، ۇلاعاتتى ۇستاز. ال اكەمنىڭ ماماندىعى ينجەنەر-تەحنيك. وكىنىشكە وراي اكەم ءبىراز ۋاقىت بۇرىن قايتىس بولدى.

- ومىردە ەكى نارسەدەن قاتەلەسپەۋ كەرەك بولسا، سونىڭ ءبىرى - ماماندىق، ءسىز بولاشاق ماماندىعىڭىزدى قالاي تاڭدادىڭىز؟

- بۇل جاققا كەلگەن سوڭ ءبىر جىل شەت ەلدەن كەلگەن بالالاردى قازاق تىلىندە دايىندايتىن دايىندىق كۋرسىندا وقىدىم. بولاشاق ماماندىعىمىز تۋرالى سول جەردەگى ۇستازدارمەن اقىلداستىق. قانداي ماماندىقتى وقۋعا بولادى، قايدا تاپسىرامىز دەگەندەي. ءبىراق ەشقاشان اكتريسا بولام دەپ ويلاعان جوق ەدىم.

سەبەبى قىتايدا ءوزىڭ بىلەسىڭ قازاق تەاترى جوق. كوركەمونەردىڭ باسقا سالالارى جاقسى دامىعانىمەن، ءدال وسى تەاتر ونەرى كىشكەنە ارتتا قالعان. قىتايلاردىڭ وزدەرىنىڭ ماسكامەن وينايتىن تەاترلارى بار. ءبىراق قازاقتاردىڭ تەاترى جوق.

سوسىن بۇل جەرگە كەلگەن سوڭ ەكى ماماندىققا تاپسىردىم. اۋەلى، قاز ۇ ۋ-دىڭ شىعىستانۋ فاكۋلتەتىنە، ودان كەيىن ت. جۇرگەنوۆ اتىنداعى ونەر اكادەمياسىنا ءبي ماماندىعىنا تاپسىرۋعا باردىم. ءبىراق ول جەردە 4-5 جاسىنان باستاپ بيلەگەن، بالەت ونەرىنەن حابارى بار قىز-جىگىتتەردى الادى ەكەن. ال، مەن نەگىزى ۇلتتىق، ءداستۇرلى قازاق، ۇيعىر، وزبەك بيلەرىن بيلەپ جۇرەتىنمىن.

وسىلايشا تاۋىم شاعىلىپ، ءبيشى بولا المايتىن بولدىم دەپ كاريدوردا جىلاپ تۇر ەدىم، ءبىر كىسى كەلىپ: - قىزىم، ساعان نە بولدى، - دەپ سۇرادى. مەن ءبيشى بولعىم كەلگەنىن، ءبىراق وعان سەن تولىمدى ەمەسسىڭ دەپ قايتارىپ جىبەرگەنىن ايتتىم. جاڭاعى كىسى ماعان ءان ايتىپ، ولەڭ وقي الاسىڭ با دەپ سۇرادى. مەن ءيا دەپ جاۋاپ بەردىم. سەبەبى ازداپ ءان سالاتىن، ولەڭ جازاتىنىم دا بار ەدى. ونىڭ جاقسى ەكەن، بىزدە اكتەر دەگەن ماماندىق بار، نەگە سول ماماندىققا تاپسىرمايسىڭ دەدى. سوسىن ويلانىپ قالدىم، سويتسەم ول كىسى كينو جانە تەاتر اكتەرى فاكۋلتەتىنىڭ دەكانى بەكبولات قۇرمانعوجايەۆ دەگەن اعايىمىز ەكەن. مەن ول كىسىنى تانىمايمىن دا، اللانىڭ قالاۋى عوي. ءسويتىپ تەاتر جانە كينو اكتەرى ماماندىعى بويىنشا نۇرعانات جاقىپبايەۆ اعامىزدىڭ كۋرسىنا ءتۇسىپ، 4 جىل ساحنانىڭ قىرسىرىن ۇيرەنىپ شىقتىم.

ال، قاز ۇ ۋ-دىڭ شىعىستانۋ فاكۋلتەتىندە جاپون تىلىنە ءوتتىم. ءبىراق ول جەردە كرەديتتى وقۋ سيستەماسى بويىنشا تۇراقتى جىلجىمايتىن مۇلكىڭ، وتباسىڭ، بولۋ كەرەك ەكەن. ال، مەنىڭ وتباسىم قىتايدا قالىپ قويعان.

سوسىن بەلگىلى ءبىر كومپانياعا كەلىسىم شارتقا وتىرۋ كەرەك، وقۋ بىتىرگەن سوڭ ولارعا بىرنەشە جىل تەگىن جۇمىس جاسايسىز دەگەندەي...

ال، مەن ونەر اكادەمياسىندا گرانت يەگەرى بولىپ تۇردىم. سونىمەن بىزبەن بىرگە كەلگەن اپكەمىز /اكەمنىڭ قارىنداسى/ گرانتقا وقۋعا ءتۇسىپ تۇرسىڭ عوي نەگە سونى وقىماسقا دەدى، سونىمەن ونەردى تاڭداپ اكادەمياعا وقۋعا ءتۇستىم. باسىندا ءسال قينالدىم، بۇل ماماندىقتىڭ نە ەكەنىن شىنىمدى ايتسام، تۇسىنبەدىم. سونىمەن ع. مۇسىرەپوۆ اتىنداعى بالالار مەن جاسوسپىرىمدەر تەاترىنا، م. اۋەزوۆ اتىنداعى اكادەميالىق دراما تەاترعا بارىپ، ونداعى قويىلىمداردى ءجيى-ءجيى تاماشالاي بەردىم.

سولاي بىرتە-بىرتە تەاتر دەگەندى تۇسىنە باستادىم. ءسويتىپ اللاعا شۇكىر، ديپلومدىق قويىلىمداردى دا وتە جاقسى دەگەن ناتيجەمەن ءبىتىردىم. ءاربىر وقۋ ورنىندا ءبىر كوشباسشى كۋرستار بولادى عوي، سول سەكىلدى ونەر اكادەمياسىندا ءبىزدىڭ توپ 3-كۋرستان باستاپ كوشباسشى كۋرس بولدى.

ءبىزدى سول جىلداردان باستاپ اكادەميا موسكۆاعا، شەت ەلدەرگە كوپ شىعارىپ ءجۇردى. ول كەزدەگى ءبىزدىڭ رەكتورىمىز تىلەۋعالي اشىربەك ۇلى قىشقاشبايەۆ بولاتىن. وسىلايشا ونەردىڭ ءبىراز ءدامىن تاتىپ قالعاننان كەيىن نەگە ۇلكەن اكادەميالىق تەاتردا جۇمىس جاساماسقا دەگەن وي كەلدى.

4-كۋرستى بىتىرگەن كەزدە ءبىزدىڭ ديپلومدىق جۇمىستارىمىزعا وسى ع. مۇسىرەپوۆ تەاترىنان بارعان ءبىراز كىسىلەر كوميسسيا مۇشەسى بولدى. ول كىسىلەر ءۇش بالانى تاڭداپ الدى. ەكى ۇل، ءبىر قىز. سونىمەن تاڭداۋلى ۇشەۋىمىزدى وسى تەاترعا جۇمىسقا شاقىردى. سول 2006 - جىلدان بەرى مىنە، كوزدى اشىپ-جۇمعانشا سەگىز جىل ءوتىپ كەتىپتى.

- وتباسىم سول جاقتا قالىپ قويعان دەدىڭىز، ول كىسىلەر قاندايدا ءبىر قيىندىقتىڭ سالدارىنان ەلگە كەلە الماي وتىرعان جوق پا؟

-  جوق، كەلەم دەگەن ادامعا شىنىمەندە بىلەك سىبانىپ كىرىسسە ەبىن تابۋعا بولادى دەپ ويلايمىن. ءبىراق ول كىسىلەردىڭ قولىندا كىشكەنتاي بالالارى بار. سولار ءوسسىن، كىشكەنە وقىسىن دەيدى، ودان سوڭ 80 نىڭ ار جاق-بەر جاعىنا كەلىپ قالعان قارت اتا-اپالارىمىز بار. ول كىسىلەر سول جەرگە قاتتى ۇيرەنىسىپ قالعان كىسىلەر. وسىندا كەلگەن سوڭ ۇيرەنىسە الامىز با، ۇيرەنىسە المايمىز با دەگەن سياقتى ۇرەي دە جوق ەمەس. ءدام تارتسا تۋعان جەردىڭ توپىراعىمەن قاۋىشقانعا نە جەتسىن! بۇيىرتسا ءبارى كەلەدى دەپ ويلايمىن.

- ول جاقتاعى بالالىق شاعىڭىز قالاي ءوتتى؟

-  مەن ءۇيدىڭ ۇلكەنىمىن عوي، سوندىقتان دا اتام مەن اجەمنىڭ قولىندا ءوستىم. سول كىسىلەردىڭ تاربيەسىندە كوپ بولدىم. مەنىڭ اتام مەن اپام سەگىز بالانى ءوسىرىپ-تاربيەلەگەن، ۇلكەن وتباسى. ءالى ەسىمدە، اتامىز ءبىز كىشكەنتاي كۇنىمىزدە جازۋ-سىزۋدى، ءارىپ پەن الىپپەنى تانىماي تۇرعان كەزىمىزدە، ابايدىڭ قارا سوزدەرىن، تاڭجارىق جولدى ۇلىنىڭ ولەڭدەرىن ءبىر وقىعاننان جاتقا ايتىپ قۇلاعىمىزعا ءسىڭدىرىپ وتىراتىن. سول كىسىنىڭ اسەرى بولار دەپ ويلايمىن. بالا كۇنىمنەن ادەبيەتكە، كوركەمونەرگە جاقىن بولدىم. مەكتەپتە نەشە ءتۇرلى كونسەرتتەرگە قاتىسىپ، ءانشى دە بولدىق، ءبيشى دە بولدىق، ءبىر قىزىعى، ەشقاشان ونەر ادامى بولامىن دەپ ويلاعان جوقپىن. ويتكەنى بالا كۇنىمدە اتام سەن كەيىن ءبىر زاڭگەر بولساڭ ەكەن دەپ ايتاتىن.

-  تەاتر دەگەندى كەيىننەن عانا ءتۇسىندىم دەپ قالدىڭىز عوي، سوندا ءسىزدىڭ ويىڭىزشا تەاتر دەگەن نە ەكەن؟

- جالپى، تەاتر دەگەن "حاس سۇلۋدىڭ كوزىندەي مولدىرەگەن" نازىك، ءبىراق سونشالىقتى قاتال ماماندىق. ياعني، تابىسى از، قيىندىعى كوپ، جەمىسى وڭايلىقپەن قولعا تۇسپەيدى. تەاتر ونەرىنەن ماتەريالدىق بايلىق ىزدەگەن ادام قاتەلەسەدى، ول تەك رۋحاني بايلىق بەرەدى.

مىسالى، ءبىر ۇستاز ءبىر ساعاتتىق ساباعىندا وتىز بالاعا، جيىرما بالاعا نەنىڭ جاقسى، نەنىڭ جامان ەكەنىن، نەنىڭ دۇرىس نەنىڭ بۇرىس ەكەنىن ايتاتىن بولسا تەاتر دا ەكى ساعاتتىق بولماسا ءبىر جارىم ساعاتتىق قويىلىمدا 500-600 -700 كورەرمەندى يگىلىككە دارىپتەيدى. سوعان قاراعاندا مەنىڭ ويىمشا، تەاتر ونەرى ونىڭ ىشىندە اكتەر ماماندىعى ادام جانىنىڭ رۋحاني زەرتتەۋشىسى. تەاتر ول ءبىر ۇلكەن تۇتاس دەنە سەكىلدى، ماسەلەن، ونىڭ گريمەرشىسى، اكتەرى، كاستيۋمەرشىسى، رەجيسسەرى ، دراماتۋرگى، ادمينيستراتورى سەكىلدى بىرنەشە وكىلى بولادى. ءبىراق سولاردىڭ ىشىنەن حالىققا كورىنەتىنى تەك اكتەرلەر.

- قازىرگى قازاق قويىلىمدارىنىڭ جەتىسپەيتىن تۇستارى بار ما؟

- قازىرگى كەزدە جالپى تەاترلاردا مەنىڭ ءبىر قارنىم اشاتىنى، تانىمدىق قويىلىمدار وتە از. مىسالى، ءبىزدىڭ نەبىر تالانتتى، دارىندى، جازۋشىلارمىز، تاريحشىلارىمىز، نەبىر باتىرلارىمىز بار. ول كەشەگى يساتاي ماحامبەت بولسىن، قارا ولەڭنىڭ پايعامبارى بولعان اباي سياقتى ۇلى دانالارىمىز بولسىن، نەمەسە ماعجان جۇمابايەۆ م. ماقاتايەۆ سياقتى اقيىق اقىندارىمىز، باۋىرجان مومىش ۇلى سەكىلدى باتىرلارىمىز بولسىن. سولاردىڭ ونەگەلى ومىرىنەن سىر شەرتەتىن بالالارعا بولسىن، جاسوسپىرىمدەرگە بولسىن، تانىمدىق، قىزىقتى قويىلىمدار بولسا ەكەن دەيمىن. سەبەبى "ەل بولامىن دەسەڭ بەسىگىڭدى تۇزە" دەپ بەكەر ايتىلماعان عوي. بيىلعى جىلى ءبىزدىڭ تەاترىمىزدا مۇقاعاليدىڭ ءومىرى مەن شىعارماشىلىعىنا ارنالعان "مەن ۇمىتىلمايمىن...

" اتتى قويىلىم بولىپ ءوتتى. وسىنداي قويىلىمداردىڭ سانى ارتسا ەكەن دەيمىن. سەبەبى، باسقا ۇلتتارعا، باسقا حالىقتارعا قاراساڭىز وزدەرىنىڭ بولماشى عانا كورىنگەن ادامدارىن ءسۇت بەتىندەگى قايماقتار دەپ دارىپتەپ جاتادى. جالپى، دراماتۋرگتەر قاۋىمىنىڭ "قۇلاعىنا التىن سىرعا".

- قازىرگى جاستاردىڭ تەاتر ونەرىنە دەگەن قىزىعۋشىلىعىن قاي دەڭگەيدە دەپ باعالايسىز؟

- مەنىڭ ويىمشا، قازىرگى جاستار تەاترعا ۇلكەن سۇيىسپەنشىلىكپەن، ماحابباتپەن قارايدى. سەبەبى، عىلىم مەن تەحنيكا قانشالىقتى قارىشتاپ دامىسا دا، كومپيۋتەر، ينتەرنەت كەزەڭى دەسەكتە، سوعان قاراماستان بىزگە كەلىپ، ارنايى وسى قويىلىمدى كورسەك ەكەن دەپ كەلەتىن كورەرمەندەردىڭ جەتپىس پايىزى جاستار. سوعان قاراعاندا جاستار تەاتر ونەرىن باعالايدى، جاقسى كورەدى.

- تەاتر ساحناسىندا قانداي قويىلىمداردى ساحنالادىڭىز...

-  وسى تەاترعا جاڭادان كەلە سالعاندا ەڭ العاش ويناعان سپەكتاكلىم رەجيسسەر مۇرات احمانوۆتىڭ "جەلتوقسان جەلى" قويىلىمىندا اقمارالدىڭ بەينەسىن سومدادىم. بۇل وزدەرىڭىزگە بەلگىلى كەشەگى 1986 - جىلعى قازاقتىڭ قاسىرەتىن بەينەلەيتىن، سوندا قۇربان بولعان بوزداقتاردىڭ رۋحىنا ارنالعان قويىلىم بولعاندىقتان، ءارى ءوزىمنىڭ ەڭ العاشقى ءرولىم بولعاندىقتان بارىمدى سالىپ دايىندالدىم. ول قويىلىم بيىل سەگىز جىل بولدى، تەاتر ساحناسىنان ءالى تۇسپەي كەلەدى.

ودان كەيىنگى قويىلىمىم جانات حادجيەۆتىڭ رەجيسسەرلىعىمەن دايىندالعان تاحاۋي احتانوۆتىڭ "كۇشىك كۇيەۋ" كومەدياسىندا المانىڭ ءرولىن سومدادىم. سوسىن، ع. مۇسىرەپوۆتىڭ "اقان سەرى- اقتوقتى" قويىلىمىندا اقتوقتىنىڭ، "قوزى كورپەش-بايان سۇلۋدا" باياننىڭ بەينەسىن سومدادىم. م. احمانوۆتىڭ "كەلىندەر كوتەرىلىسىندە"  كىشى كەلىن - نەگورانىڭ ءرولىن وينادىم. تاعى دا باسقا كوپتەگەن رولدەردى سومدادىم. سونىمەن قاتار، بالالارعا ارنالعان قويىلىمداردا ءارتۇرلى جان-جانۋارلاردىڭ بەينەسىنە ەنىپ جاتامىز.

- تەاتردا ىستەپ جۇرگەنىمە 8  جىلدان استام ۋاقىت بولدى دەپ جاتىرسىز عوي، بۇل از دا ەمەس، كوپ تە ەمەس، وسى ۋاقىت ىشىندە تەاترعا نە بەرە الدىڭىز، تەاتردان نە الا الدىڭىز؟ ساراپتاپ كورىڭىزشى...

-  تەاترعا كەرەمەتتەي نارسە بەرە الدىم دەپ ايتا المايمىن. سەگىز جىلدا ىستەگەن ءىسىم، تەڭىزگە تامعان تامشىداي عانا. ال تەاتردان نە الا الدىم دەگەنگە كەلەر بولساق، ءوزىنىڭ ۇلتتىق مادەنيەتىن، ۇلتتىق ءداستۇرىن باعالاۋدى، قۇندىلىعىن سەزىنۋدى تەرەڭ ءتۇسىندىم. ءار ادام ءوزىنىڭ ۇلتتىق قۇندىلىعىن تەرەڭ باعالاي بىلگەن كەزدە عانا سول ۇلتتىڭ ادەبيەتى مەن مادەنيەتىنە قالتقىسىز قىزمەت ەتە الاتىندىعىن ءبىلدىم.

سونداي-اق، ونەر مايدانى بولسىن، ءومىر مايدانى بولسىن ادام ءوزىنىڭ رۋحاني تازالىعىن جوعالتپاۋى كەرەك. سەبەبى ادام بولىپ ومىرگە كەلۋ ءبىر باسقا، ادام بولىپ ءومىر ءسۇرۋ ءبىر باسقا. مەنىڭ ويىمشا، كۇرەستەردىڭ ەڭ ۇلىسى، وزىڭمەن ءوزىڭ كۇرەسۋ، ءوز قاتەلىگىڭدى تۇزەۋ. ءبىراق ول وڭاي دۇنيە ەمەس.

 تەاتر مەنى سول كۇرەسكە شىڭدادى.

- سول تەاتردا وزىڭىزگە كىمدەردى ۇلگى تۇتاسىز؟

- ەڭ اۋەلى ليديا كادەن قىزى اپايىمىزدى اسا قۇرمەتتەيمىن. ول كىسىمەن ساحنادا بىرنەشە قويىلىمداردا بىرگە بولدىم. ومىردە وتە اشىق-جارقىن، ادىلەتسىزدىككە توزبەيدى، جانى تازا ادام. سوسىن، ساعىزباي قارابالين، ساعات جىلگەلديەۆ سەكىلدى اعالارىمنىڭ ونەرىن ەرەكشە باعالايمىن. ال، رەجيسسەر اعالارىمىزدان مۇرات احمانوۆ، جانات حادجيەۆ اعالارىمىزدىڭ قويىلىمدارى جانىما ەرەكشە جاقىن. جالپى، بۇل كىسىلەر مەنىڭ اكادەميادان كەيىنگى - تەاترداعى ۇستازدارىم...

- تەاتر قويىلىمدارىنان بولەك، بىرنەشە كينوعا دا تۇسكەن ەكەنسىز...

- 2008 - جىلى "الىستان كەلگەن حات" دەگەن كينودا ەپيزودقا ءتۇستىم. سودان كەيىن، كىشىگىرىم ەپيزودتارعا، روليكتەرگە، جارنامالارعا ءتۇسىپ ءجۇردىم. سوسىن بىلتىرعى جىلى كۇلاش بايسەيىتوۆا اپامىزدىڭ ءومىرى مەن شىعارماشىلىعىنا ارنالعان 5 سەريالى "كۇلاش" دەگەن فيلم تۇسىرىلگەن بولاتىن. سول جەردە، قازاقتىڭ ەڭ العاشقى ءبيشى قىزى بولىپ تاريحتا قالعان شارا جيەنقۇلوۆا اپامىزدىڭ ءرولىن سومدادىم.

ءبىر اي ورال قالاسىندا بولىپ، ءتۇسىرىپ كەلدىك. ول "حابار" تەلەارناسىنىڭ تاپسىرىسى بويىنشا تۇسىرىلگەن بولاتىن. قازىر حالىققا ءبىراز تەلەارنالار ارقىلى تاراتىلدى. ودان كەيىن، قازىرگى ۋاقىتتا "قازاقستان" تەلەارناسىنىڭ تاپسىرىسىمەن دايىندالعان "قارا شاڭىراق" دەپ اتالاتىن ءجۇز سەريالى كينوعا ءتۇسىپ جاتىرمىن.

بۇل تەلەحيكايانىڭ ايتار ويى، ماقساتى - ءبىزدىڭ ۇلكەن وتباسىلارىمىزدىڭ ۇلتتىق قۇندىلىقتارىمىزدان الشاقتاپ بارا جاتقاندىعىنا دەگەن ءبىر وكىنىشتەن تۋعان وي. قازىرگى تاڭدا، ءبىزدىڭ ەلدى كورەي، تۇرىك، ءۇندى فيلمدەرى باسىپ الدى دا، سولاردىڭ سالت-ساناسى، جات تاربيەسى ءسىڭىستى بولىپ بارا جاتىر.

كەرەك دەسەڭىز سول ۇلتتاردىڭ دىنىنە دەيىن بىزگە ۋاعىزداپ جاتىر. سونداي كەرەعار دۇنيەگە وزىمىزشە قارسىلىق ءبىلدىرىپ، ءبىزدىڭ حالىقتىڭ مادەنيەتى، سالت-ساناسى ەشبىر ەلدەن كەم ەمەستىگىن كورسەتۋ. بۇل جەردە بىرنەشە جاس جىگىتتەر ەكى-ءۇش توپقا ءبولىنىپ جۇمىس جاساپ جاتىر. اتقارۋشى پروديۋسەرى اقان ساتايەۆ. سول كينودا مەدبيكە قىزدىڭ بەينەسىن سومدايمىن. اللا بۇيىرتسا الداعى كۇزدە كورەرمەنگە جول تارتادى. ودان كەيىن وتكەن جىلى ش. ايمانوۆ اتىنداعى قازاق فيلم كينوستۋدياسىنىڭ تاپسىرىسىمەن "ارال" دەگەن كينو تۇسىرىلگەن. ول كينودا حاديشا دەگەن كەلىنشەكتىڭ ءرولىن وينادىم. ول كينودا الداعى ۋاقىتتا كورەرمەنمەنگە جول تارتادى. وسىلايشا كينو سالاسىندا دا ازداپ جۇمىستار اتقارىپ جاتىرمىن.

- اڭگىمەمىزدى جەكە ومىرىڭىزگە بۇرساق...

- تەاترعا كەلىپ جۇمىس جاساعاننان كەيىن ەكى جىلدان سوڭ اكادەميانى وزىمىزدەن ءبىر كۋرس جوعارى وقىپ، ءبىتىرىپ كەلگەن بەيبىت كامارانوۆ دەگەن اكتەر بولدى. ءبىز اكادەمياعا ءتۇسىپ سول جاقتا وقىعاننان باستاپ ءبىر-ءبىرىمىزدى تانىپ بىلدىك. سونىمەن اللا بۇيىرتىپ، 2008 - جىلدىڭ كوكتەمىندە وتباسىن قۇردىق.

اللاعا شۇكىر قازىر ءبىر ۇل، ءبىر قىزىمىز بار. ەكەۋمىزدە ءبىر ساحنادا وينايمىز، كەيدە ءبىر-بىرىمىزگە قاراما-قارسى رولدەر بولىپ قالادى، كەيدە ول ءبىر اكتريسامەن ماحابباتتى ويناۋىنا تۋرا كەلەدى، نەمەسە كەرىسىنشە مەن ءبىر اكتەرمەن ماحابباتى ويناپ جاتامىز. قىزعانىش بولادى. ءبىراق بۇل - ونەر! سوندىقتان قىزعانىشتى اقىلعا جەڭدىرىپ جاتامىز.

ال، بالالارىم بولسا، ۇلىم بۇيىرتسا بەسكە كەلەدى، قازاق بالالار باقشاسىنا بارادى، قىزىم ەكىدە. ءالى كىشكەنتاي بولعان سوڭ شىعار، ونەرگە اسا جاقىندىعىن بايقاماپپىن. نەگىزىنەن عىلىم مەن تەحنيكاعا جاقىن بولعانىن قالايمىن. سەبەبى، باسقا دامىعان ەلدەرگە قاراعاندا ءبىزدىڭ قازەكەم ءالى ءان سالىپ، توي تويلاۋمەن ءجۇر. سوندىقتان بالالارىمنىڭ عىلىممەن، بولماسا سپورتپەن اينالىسقاندارىن قالايمىن. ەگەر تالانتى تاس جارىپ بارا جاتسا، ونەرگە كەلۋىنە دە قارسىلىق بىلدىرمەس ەدىم. ءبىراق بولاشاقتا كىم بولاتىندارىن الداعى ءومىر كورسەتەر.

- "الاش ايناسى" وقىرماندارىنا تىلەگىڭىزدى بىلدىرسەڭىز...

-  "الاش ايناسى" ءوزىنىڭ اتىنا ساي بار قازاق وسى باسىلىم ارقىلى ءوزىن تانىسىن. "الاش ايناسى" ارقىلى ۇلتتىق قۇندىلىقتارىمىزدى دارىپتەپ، حالىققا قالتقىسىز قىزمەت ەتە بەرىڭىزدەر! سىزدەردەن باعىت-باعدار الار وقىرماندارىڭىز كوبەيسىن!

- سۇحباتىڭىزعا ۇلكەن راحمەت!

اۆتور: نۇربيكە بەكسۇلتان قىزى

سوڭعى جاڭالىقتار