ۇلتتىق سپۋتنيكتىك جۇيە ەلىمىزدىڭ اقپاراتتىق قاۋىپسىزدىگىن قامتاماسىز ەتەدى - ت. مۇسابايەۆ
بۇگىن ماجىلىستە قازاقستاندا عارىش سالاسىن قۇرۋ تاقىرىبىنداعى ۇكىمەت ساعاتىندا ق ر ۇلتتىق عارىش اگەنتتىگىنىڭ ءتوراعاسى تالعات مۇسابايەۆ وسىلاي مالىمدەدى.
اگەنتتىك ءتوراعاسىنىڭ ايتۋىنشا، «KazSat» ۇلتتىق سپۋتنيكتىك جۇيەسى قازاقستاندىق سپۋتنيكتىك وپەراتورلار قىزمەتىن تۇتىنۋشىلاردىڭ سۇرانىسىن قاناعاتتاندىرۋ جانە ەلىمىزدىڭ اقپاراتتىق قاۋىپسىزدىگىن قامتاماسىز ەتۋ، سونىمەن بىرگە شەتەلدىك رەسۋرستاردى جالعا الۋ ارقىلى شەتەلدىك وپەراتورلارعا قارجى اعىنىن شەكتەي ءتۇسۋ ءۇشىن قۇرىلعان.
«بۇگىنگى كۇنى «KazSat-2» شتاتتىق رەجيمدە جۇمىس ىستەپ تۇر. ونىڭ جۇكتەمەسى جالپى اۋقىمنىڭ 66 پايىزىن قۇرايدى. 12 قازاقستاندىق سپۋتنيكتىك بايلانىس وپەراتورىنا 3,5 ميلليارد تەڭگەنىڭ قىزمەتى ۇسىنىلۋدا» ، - دەدى ت. مۇسابايەۆ.
سونىمەن قاتار، اگەنتتىك باسشىسى اعىمداعى جىلدىڭ 28 - ساۋىرىندە بايقوڭىر ايلاعىنان «KazSat-3» ۇلتتىق بايلانىس سپۋتنيگى ۇشىرىلعانىن ايتىپ، ونىڭ بەلگىلەنگەن عارىش نۇكتەسىنە ءوز ۋاقىتىندا شىققانىن اتاپ ءوتتى. «اعىمداعى جىلدىڭ قىركۇيەك ايىندا «KazSat-3» سپۋتنيگىن ۇشىرۋدىڭ ەسەپتىك سىناقتارى تولىق اياقتالىپ، ونى تولىعىمەن پايدالانۋ جوسپارلانىپ وتىر. «KazSat-3» سپۋتنيگىن پايدالدانۋدان كۇتىلەتىن ناتيجەلەرگە كەلسەك، جالپى «KazSat-2» مەن «KazSat-3» سپۋتنيكتەرى قازاقستاندىق وپەراتورلاردى ءوزارا رەزەرۆتەندىرۋدى قامتاماسىز ەتەدى.
بۇدان بولەك، جىلىنا يمپورتتىق قىزمەتتەردى تۇتىنۋ ءتورت ميلليارد تەڭگەگە تومەندەيدى. اقكول قالاسىندا جانە الماتى وبلىسىنىڭ ىلە اۋدانىندا عارىش اپپاراتتارىن جەردەن باسقارۋ قامتىلادى. وسىلايشا، «KazSat-3» سپۋتنيگىن ۇشىرۋ ارقىلى قازاقستان بايلانىستىڭ تولىققاندى جۇيەسىن يەلەنەتىن بولادى. ياعني، قازاقستان عارىشتىق بايلانىس سەكىلدى اسا ماڭىزدى سالادا سىرتقى كوزدەردەن تاۋەلسىزدىگىن جۇزەگە اسىرىپ وتىر دەگەن ءسوز. وسىلايشا، ءبىز ەلىمىزدىڭ اقپاراتتىق قاۋىپسىزدىگى جۇيەسىن تولىعىمەن قامتاماسىز ەتەتىن بولامىز» ، - دەدى ت. مۇسابايەۆ.
اگەنتتىك باسشىسىنىڭ ايتۋىنشا، بۇگىنگى كۇنى سالالىق مىندەتتەردى شەشۋ بارىسىندا جەردى قاشىقتىقتان زوندتاۋ مالىمەتتەرىن پايدالانۋعا مەملەكەتتىك ورگاندار تاراپى جوعارى قىزىعۋشىلىق تانىتىپ كەلەدى.
«الايدا، ولار مۇنى تەگىن نەگىزدە جۇزەگە اسىرۋدى ۇسىنادى. ال «قازعارىش» جەردى زوندتاۋ مالىمەتتەرىنىڭ تەگىن بەرىلۋىن قامتاماسىز ەتۋى ءۇشىن ۇلتتىق وپەراتوردى پايدالانۋ شىعىندارىن ۇستاپ تۇرۋدى بيۋدجەتتەن ءتيىستى قاراجات بولىنگەندە عانا جۇزەگە اسىرا الادى. اتاپ ايتقاندا، جەردى زوندتاۋ مالىمەتتەرى ءۇشىن عارىشتىق جۇيەگە شامامەن جىلىنا 2,5 ميلليارد تەڭگە قاجەت. بۇل تەك قانا جۇيەنىڭ جۇمىسقا قابىلەتتىلىگىن ۇستاپ تۇرۋعا كەتەتىن شىعىن» ، - دەدى ت. مۇسابايەۆ.
اۆتور: قانات مامەتقازى ۇلى
