قازاقستان وتاندىق عارىش سالاسىن قالىپتاستىرۋدا ۇلكەن قادام جاسادى
بۇگىن ماجىلىستە قازاقستاندا عارىش سالاسىن قۇرۋ تاقىرىبىنداعى ۇكىمەت ساعاتىندا ق ر ۇلتتىق عارىش اگەنتتىگىنىڭ ءتوراعاسى تالعات مۇسابايەۆ وسىلاي مالىمدەدى.
«بيىلعى جىلى ەل تاريحىندا العاش رەت ءۇش عارىش اپپاراتى ۇشىرىلعانى بارشاڭىزعا بەلگىلى. ءبىر بايلانىس اپپاراتى مەن جەردى قاشىقتىقتان زوندتايتىن جوعارى جانە ورتا اپپاراتتار. ءبىز ءۇشىن بۇل اۋقىمدى جەڭىس جانە وتاندىق عارىش سالاسىن قالىپتاستىرۋداعى ۇلكەن قادام. سونىمەن بىرگە، ەل ەكونوميكاسىنداعى كوپتەگەن ءوندىرىس سالالارى عارىش قىزمەتىمەن تىكەلەي بايلانىستى ەكەنى ءمالىم. مىسالى، جاھاندىق تەلەفونيا، ينتەرنەت جەلىسىنە قول جەتكىزەتىن سپۋتنيك جۇيەلەرى، تىكەلەي ساندىق جانە تەلەراديوحابار تاراتۋدىڭ عارىشتىق تەحنيكاسىن پايدالانۋ ونسىز مۇمكىن ەمەس بولار ەدى» ، - دەدى جيىندا بايانداما جاساعان اگەنتتىك باسشىسى.
سونىمەن قاتار، اگەنتتىك ءتوراعاسى ەلباسى جولداۋىنا توقتالا كەلە، وندا تولىققاندى وتاندىق عارىش سالاسىن قۇرۋ ماڭىزدىلىعى اتاپ وتىلگەن. بۇل رەتتە «قازعارىش» ءبىرقاتار جوبالاردى ىسكە اسىرا باستاعان. ولار «KazSat» سپۋتنيكتىك اپاراتتارىن قۇرۋ، جەردى قاشىقتىقتان زوندتاۋ عارىش جۇيەسىن قۇرۋ، عارىش اپپاراتتارىن قۇراستىرۋ- سىناۋ كەشەنى، عىلىمي- تەحنولوگيالىق ماقساتتاعى عارىش جۇيەسىن قۇرۋ، دالدىگى جوعارى سپۋتنيكتىك ناۆيگاتسيانىڭ جەرۇستى ينفراقۇرىلىمىن قۇرۋ، بايقوڭىر ايلاعىندا زەنيت زىمىران تاسىعىشتىعىن، ەكولوگيالىق تازا «بايتەرەك» زىمىران تاسىعىشىن قۇرۋ جانە تاعى باسقالار.
ۇكىمەت ساعاتى اياسىندا اگەنتتىك باسشىسى وسى جوبالاردىڭ ءارقايسىسىنا توقتالىپ ءوتتى.
اۆتور: قانات مامەتقازى ۇلى
