پرەمەر- مينيستر سىبايلاس جەمقورلىق پەن «كولەڭكەلى» ەكونوميكامەن كۇرەستىڭ تاسىلدەرىن ءتۇسىندىردى

ەسكە سالا كەتەيىك، بىرلەسكەن وتىرىستا ۇكىمەتتىڭ بىلتىرعى جىلعى بيۋدجەتتىڭ اتقارىلۋى تۋرالى ەسەبى تالقىلانعان بولاتىن.
جيىن بارىسىندا دەپۋتاتتار قويعان ساۋالعا توقتالا كەلە ك. ءماسىموۆ ەكى ماڭىزدى ماسەلەنى اتاپ ءوتتى. ونىڭ ءبىرى «كولەڭكەلى» ەكونوميكا بولسا، ەكىنشىسى سىبايلاس جەمقورلىقپەن كۇرەس ماسەلەسى بولاتىن. «كولەڭكەلى ەكونوميكا 19,2 پايىز دەپ ءجۇر، بالكىم بۇل بۇدان ازىراق نەمەسە كوبىرەك تە شىعار. ەڭ باستىسى، ءبىز كولەڭكەلى ەكونوميكانىڭ بارلىق ەلدەردە بار ەكەنىن بىلەمىز. ەندەشە سىبايلاس جەمقورلىقپەن قالاي كۇرەسەمىز، كولەڭكەلى ەكونوميكادان قاراجاتتى قالاي الىپ شىعامىز دەگەن ماسەلە كۇن تارتىبىندە اسا وزەكتى. وبرازدى تۇردە ايتىپ كورسەك، ەگەر قابىرعادا قانداي دا ءبىر تەسىك پايدا بولسا، ول تەسىك ۇرىنى وزىنە تارتپاي قويمايدى. ەندەشە، ونىمەن كۇرەسەتىن ەكى جول بار: ءبىرىنشىسى - سول تەسىككە كۇزەتشى قويىپ، ۇرىنى ۇستاۋ. بۇنى قاتاڭ جازالاۋ ءتاسىلى. ەكىنشى ءتاسىل - سىبايلاس جەمقورلىق ارەكەتتەرگە مۇمكىندىكتى بولدىرماۋ، كولەڭكەلى ەكونوميكا ۇلەسىن تومەندەتۋ ءۇشىن الگى تەسىكتى جابۋ» ، - دەدى ۇكىمەت باسشىسى.
پرەمەردىڭ پايىمىنشا، ءبىز ءۇشىن ەڭ ىڭعايلى ءتاسىل ەكىنشىسى، ياعني قابىرعاداعى «تەسىكتى» جابۋ ءتاسىلى. بۇل نەنى بىلدىرەدى؟ «بۇل دەگەنىڭىز - بيزنەستى، ەكونوميكانى جۇرگىزۋ ءۇشىن پروتسەدۋرالاردى وڭتايلاندىرۋ، جەڭىلدەتۋ دەگەن ءسوز. وسىعان وراي، بىزدە ءبىرقاتار باستامالار، ونىڭ ىشىندە زاڭنامالىق باستامالار دا بار. وسى زاڭنامالار ارقىلى جاعدايدى تۇبەگەيلى وزگەرتەتىن بولامىز. مىسالى، اۋىل شارۋاشىلىعىنداعى سالىق سالۋدى الايىق. كەيدە سالىق سالۋ، ەسەپتىلىك ماسەلەسى كۇردەلى بولاتىنى سونشالىقتى، شاعىن اۋىل شارۋاشىلىعى تاۋارىن وندىرۋشىلەرى ءۇشىن زاڭدى جۇمىستان گورى كولەڭكەدە قىزمەت ەتۋ وڭايعا سوعاتىن ءتارىزدى. ءبىز سوندىقتان دا، پروبلەمانى ازايتۋ ءۇشىن ۇدەرىستەردى جەڭىلدەتەتىن ۇسىنىسپەن پارلامەنتكە كەلمەكپىز» ، - دەدى ك. ءماسىموۆ.
اۆتور: قانات مامەتقازى ۇلى