استانادا «ماڭگىلىك ەل مۇراتى جانە ەر جانىبەك» اتتى عىلىمي- تاجىريبەلىك كونفەرەنسيا ءوتتى

جوڭعار شاپقىنشىلىعى تۇسىندا قول باستاعان، قازاقتىڭ اتاقتى باتىرلارىنىڭ ءبىرى ەر جانىبەك بەرداۋلەت ۇلىنىڭ تاريحتاعى ەرلىك ىزدەرىمەن، ۇنەگەلى ءومىرىن زەردەلەگەن عىلىمي كونفەرەنسيا اقۇشتاپ باقتىكەرەيەۆا ءسوزىن جازعان، جولامان تۇرسىنبايەۆتىڭ «ەر جانىبەك- ۇرانىم!» انىمەن اشىلدى.
حالىقارالىق دەڭگەيدە ءوتىپ وتىرعان كونفەرەنسياعا قازاقستاندىق جانە شەتەلدەن كەلگەن قوناقتار مەن عالىمدار قاتىستى.
جيىن باسىندا پارلامەنت ءماجىلىسىنىڭ ءتوراعاسى قابيبوللا جاقىپوۆ، اقمولا وبلىسىنىڭ اكىمى سەرگەي كۋلاگين، «اق جول» دەموكراتيالىق پارتياسىنىڭ ءتوراعاسى ازات پەرۋاشيەۆتىڭ وسى القالى باس قوسۋعا ارنالعان ارنايى قۇتتىقتاۋلارى وقىلدى.
كونفەرەنسيادا فيلولوگيا عىلىمدارىنىڭ دوكتورى، پروفەسسور تۇرسىنبەك كاكىشەۆ، شوقان ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى، تاريح عىلىمدارىنىڭ دوكتورى، پروفەسسور حانكەلدى ءابجانوۆ، تاريح عىلىمدارىنىڭ دوكتورى احمەت توقتاباي، فيلولوگيا عىلىمدارىنىڭ دوكتورى، جازۋشى تۇرسىن جۇرتباي، ق ح ر مەملەكەتتىك سىيلىعىنىڭ يەگەرى، جازۋشى ءشامىس قۇمار ۇلى سىندى جازۋشىلار مەن زەرتتەۋشىلەر قازاق جەرىن جوڭعار شاپقىنشىلىعىنان قورعاۋ جولىندا ەرەن ەرلىك كورسەتكەن باھادۇر باتىر ەر جانىبەكتىڭ ۇلاعاتتى ءومىر جولى مەن 18- عاسىرداعى تاريحي كەزەڭ جايلى عىلىمي نەگىزدەلگەن باياندامالارىن ورتاعا سالدى.
اۆتور: باقىتجول كاكەش ۇلى