كورەيا قازاقستاننىڭ دۇنيە جۇزىلىك ساۋدا ۇيىمىنا كىرۋگە ۇمتىلىسىن قولدايدى

استانا. قازاقپارات - قازاقستان جانە كورەيا رەسپۋبليكاسىنىڭ پرەزيدەنتتەرى ەكىجاقتى قۇجاتتارعا قول قويۋ راسىمىنە قاتىسىپ، بىرلەسكەن مالىمدەمە جاسادى.

 بۇل تۋرالى اقوردانىڭ باسپا ءسوز قىزمەتىنەن حابارلايدى.

كەلىسسوزدەر قورىتىندىسى بويىنشا مەملەكەت باسشىلارىنىڭ بىرلەسكەن مالىمدەمەسى قابىلدانىپ، ەكى ەل پرەزيدەنتتەرىنىڭ قاتىسۋىمەن تومەندەگىدەي ءبىرقاتار قۇجاتتارعا قول قويىلدى:

 - قازاقستان رەسپۋبليكاسى ۇكىمەتى مەن كورەيا رەسپۋبليكاسى ۇكىمەتىنىڭ اراسىنداعى ءوزارا ۆيزالىق تالاپتاردى جويۋ تۋرالى كەلىسىم؛

 - قازاقستان رەسپۋبليكاسىنىڭ ادىلەت مينيسترلىگى مەن كورەيا رەسپۋبليكاسىنىڭ مەملەكەتتىك زاڭناما مينيسترلىگى اراسىنداعى ءوزارا تۇسىنىستىك جانە ىنتىماقتاستىق تۋرالى مەموراندۋم؛

- قازاقستان رەسپۋبليكاسىنىڭ ءبىلىم جانە عىلىم مينيسترلىگى مەن كورەيا رەسپۋبليكاسى عىلىم، اقپاراتتىق- كوممۋنيكاتسيالىق تەحنولوگيالار جانە بولاشاق جوسپارلاۋ مينيسترلىگىنىڭ اراسىنداعى عىلىم جانە عىلىمي- تەحنيكالىق قىزمەت سالاسىنداعى ءوزارا تۇسىنىستىك تۋرالى مەموراندۋم؛

- قازاقستان رەسپۋبليكاسىنىڭ قورشاعان ورتا جانە سۋ رەسۋرستارى مينيسترلىگى مەن كورەيا رەسپۋبليكاسىنىڭ ورمان شارۋاشىلىعى قىزمەتى اراسىندا ورمان شارۋاشىلىعى جانە قازاقستان رەسپۋبليكاسىنىڭ ورماندارىن قالپىنا كەلتىرۋ سالاسىنداعى ىنتىماقتاستىق بويىنشا ءوزارا تۇسىنىستىك تۋرالى مەموراندۋم؛

- ءوندىرۋشى قوندىرعىلاردىڭ ەلەكتر قۋاتىن ءازىر كۇيدە ۇستاپ تۇرۋ بويىنشا كورسەتىلەتىن قىزمەتتى ساتىپ الۋ شارتى.

قۇجاتتارعا قول قويۋ راسىمىنەن كەيىن ەكى ەلدىڭ كوشباسشىلارى مالىمدەمە جاسادى. نۇرسۇلتان نازاربايەۆ كورەيا رەسپۋبليكاسى پرەزيدەنتىنىڭ ساپارى ءتۇرلى باعىتتار بويىنشا جاقسى دامىپ كەلە جاتقان ەكىجاقتى ءىس- قيمىلدار قارقىنىن كۇشەيتەتىندىگىنە سەنىم ءبىلدىردى.

«وڭتۇستىك كورەيالىق سەرىكتەستەرمەن شيكىزاتتىق ەمەس سالاداعى ىنتىماقتاستىق جۇيەلى تۇردە كەڭەيىپ كەلەدى. قازىردىڭ وزىندە 300 دەن اسا بىرلەسكەن كاسىپورىن قۇرىلدى، سونىڭ ىشىندە جەڭىل اۆتوموبيلدەر مەن جۇك جانە جولاۋشى تاسىمالى كولىكتەرىن قۇراستىرۋ كاسىپورىندارى بار. بالقاش ج ە س- نىڭ، اتىراۋ وبلىسىنداعى گاز- حيميا كەشەنى قۇرىلىسى، «جامبىل» كەنىشىن يگەرۋ سەكىلدى ءىرى جوبالار تابىستى ىلگەرىلەۋدە. سونداي- اق كەلىسسوزدەر بارىسىندا ءبىز پاك حانىممەن بىرگە كورەيلىك بيزنەستىڭ قازاقستاننىڭ ۇدەتىلگەن يندۋستريالىق- يننوۆاتسيالىق دامۋ باعدارلاماسىنا قاتىسۋى جايىن تالقىلادىق. تاراپتار «تەحنولوگيالاردى رەسۋرسقا الماستىرۋ» فورمۋلاسى بويىنشا ىنتىماقتاسۋعا مۇددەلى ەكەندىگىن قۋاتتادى» ، - دەدى مەملەكەت باسشىسى.

سونداي- اق نۇرسۇلتان نازاربايەۆ قازاقستان- كورەيا بيزنەس- فورۋمى اياسىندا ماڭىزدى كەلىسىمدەرگە قول قويىلاتىنىن ايتتى. ال قىركۇيەك ايىنا «قازاقستان رەسپۋبليكاسى - كورەيا رەسپۋبليكاسى» ىسكەرلىك فورۋمى جوسپارلانعانىن حابارلادى. مەملەكەت باسشىسى بيزنەسكە جاقسى مۇمكىندىكتەر ۇسىناتىن «ينۆەستيتسيالار تۋرالى» جاڭا زاڭعا قول قويىلعانىنا نازار اۋداردى.

«كومپانيالار كورپوراتيۆتىك جانە تابىس سالىعىنان 10 جىلعا، مۇلىك سالىعىنان 8 جىلعا بوساتىلادى. ولاردىڭ كۇردەلى شىعىندارىنىڭ 30 پايىزى وتەلەدى. جۇمىس كۇشىن تارتۋ كۆوتاسىز جانە رۇقساتتامالارسىز جۇزەگە اسادى، سونداي- اق ءبىزدىڭ ەلدەرىمىز اراسىندا ۆيزاسىز رەجىم ورناتىلدى. وسىنىڭ ءبارى ەكى مەملەكەت ءۇشىن دە ىڭعايلى جانە ءتيىمدى بيزنەستىك احۋال قالىپاستىرادى» ، - دەدى قازاقستان پرەزيدەنتى.

مەملەكەت باسشىسى ەكى ەلدىڭ ىنتىماقتاستىعى حالىقارالىق دەڭگەيدە دە ءتيىمدى جۇزەگە اسىپ جاتقانىن ايتتى.

 «سەۋلدىڭ ا ءو ى س ش ك جۇمىسىنا بەلسەنە قاتىسۋىن قاناعاتتانۋشىلىقپەن اتاپ وتەمىز. ءبىز ەكسپو-2017 كورمەسىنە بەلسەنە قاتىسۋ تۋرالى دا ءوتىنىش جاسادىق. كورەيلىك وزىق كومپانيالار كورمە اۋماعىندا جاڭا زەرتتەۋ ورتالىقتارىن قۇرۋعا كومەكتەسە الار ەدى. ءبىز وڭتۇستىك كورەيا تاراپىنىڭ ءبىزدىڭ ەۋرازيالىق ەكونوميكالىق وداق يدەيامىزبەن سايكەسەتىن «ەۋرازيالىق باستاماسىن» قولدايمىز. سولتۇستىك كورەيانىڭ يادرولىق قارۋسىز مارتەبەسى تۋرالى كورەيا رەسپۋبليكاسىنىڭ يدەياسى مەن ۇسىنىسىن، سونداي- اق تۇبەكتى بەيبىت نەگىزدە بىرىكتىرۋ ماسەلەسىن شەشۋدى قولدايمىز. ءبىز سولتۇستىككورەيالىق سەرىكتەستەردى يادرولىق ارسەنالدان باس تارتىپ، پوليگوندى جاپقان قازاقستاننىڭ تاجىريبەسىن ەسكەرۋگە شاقىرامىز» ، - دەدى مەملەكەت باسشىسى.

  نۇرسۇلتان نازاربايەۆ پاك كىن حەگە ەلىنىڭ الدىندا تۇرعان ماسەلەلەردى شەشۋدە ساتتىلىك تىلەدى. ال كورەيا رەسپۋبليكاسىنىڭ پرەزيدەنتى وسى ساپارىنا ايرىقشا ءمان بەرەتىنىن، ويتكەنى ەۋرازيالىق وڭىردە نەگىزگى ءرول وينايتىن قازاقستان ەكونوميكالىق ىنتىماقتاستىقتا ماڭىزدى سەرىكتەس بولىپ سانالاتىنىن اتاپ ايتتى.

 «بۇگىن ءبىز 1992 - جىلى ديپلوماتيالىق قارىم- قاتىناس ورناتىلعان ساتتەن باستاپ بارلىق سالادا جۇيەلى دامىپ كەلە جاتقان ەكىجاقتى قارىم- قاتىناستاردى جاڭا، الدەقايدا ءتيىمدى جانە بولاشاققا مەجەلەنگەن دەڭگەيگە الىپ شىعۋعا ۋاعدالاستىق. مەن بۇگىن قابىلدانعان بىرلەسكەن مالىمدەمە قارىم- قاتىناستارىمىزدىڭ دامۋ باعىتى مەن ءتۇرلى سالاداعى پراكتيكالىق ىنتىماقتاستىقتىڭ ناقتى شارالارىن ايقىنداپ، ەكى ەلدىڭ ءوزارا ىقپالداستىعىنىڭ دامۋ ۇدەرىسىندە «نۇسقاۋلىق» ءرولىن اتقارادى دەپ ۇمىتتەنەمىن» ، - دەدى پاك كىن حە.

 سونىمەن قاتار وڭتۇستىك كورەيا پرەزيدەنتى ەكى ەل ءبىر- ءبىرىن ءوزارا تولىقتىراتىن ەكونوميكالىق قۇرىلىمعا يە ەكەنىن ايتتى.

 «بىلتىر ەلدەرىمىز اراسىنداعى تاۋار اينالىمى بۇكىل تاريحىمىزداعى رەكوردتىق كورسەتكىشكە جەتتى. قازاقستان كورەيا ينۆەستيتسياسىنىڭ ورتالىق ازياداعى ءىرى نارىعى بولىپ سانالادى. ءبىز بىرلەسكەن ءۇش ۇلكەن جوبانىڭ - بالقاش ج ە س قۇرىلىسىنىڭ، اتىراۋ وبلىسىنداعى گاز- حيميا كەشەنىنىڭ، «جامبىل» كەنىشىنىڭ يگەرىلۋىنىڭ جۇزەگە اسىرىلۋىنا قاتىسۋدامىز. سونىمەن قاتار «تەڭىز» كەن ورنىندا ءوندىرىس اياسىنىڭ كەڭەيتىلۋى ءتارىزدى جاڭا جوبانى ىلگەرىلەتۋدىڭ كوزدەلىپ وتىرعانىن دا قولدايمىز» ، - دەدى كورەيا رەسپۋبليكاسىنىڭ پرەزيدەنتى.

 پاك كىن حە ىنتىماقتاستىقتىڭ جاڭا فورماتىن ازىرلەۋ جونىندە كەلىسىمگە قول جەتكىزىلگەنىن، ونىڭ اياسىندا سينەرگيالىق ناتيجەنى پايدالانۋ ءۇشىن رەسۋرستار مەن تەحنولوگيالار بىرىكتىرىلەتىنىن حابارلادى.

 «ءبىز ينفراقۇرىلىمدىق قۇرىلىس، عىلىم مەن تەحنولوگيا، ورمان شارۋاشىلىعى مەن ەكولوگيا سياقتى سالالارداعى ىنتىماقتاستىق اياسىن كەڭەيتە وتىرىپ، ەكى ەلدىڭ بىرلەسە دامۋىنا جانە قازاقستان ەكونوميكاسىن ءارتاراپتاندىرۋعا ۇلەس قوسۋ جونىندە كەلىسىمگە كەلدىك. ەكى ەلدىڭ بولاشاققا مەجەلەنگەن قارىم- قاتىناسى ءۇشىن گۋمانيتارلىق- مادەني الماسۋدى جانداندىرىپ، باستاپقى كەزەڭدە ينۆەستيتسيالىق كەدەرگىلەردى ازايتۋ ماڭىزدى ەكەنى جونىندە ورتاق توقتام جاسادىق» ، - دەدى وڭتۇستىك كورەيا پرەزيدەنتى.

 بۇدان بولەك، پاك كىن حە كورەيا رەسپۋبليكاسى قازاقستاننىڭ د س ۇ- عا كىرۋ جونىندەگى ۇمتىلىسىن قولدايتىنىن ايتىپ، بۇل ەكى ەل اراسىنداعى ساۋدا- ينۆەستيتسيالىق ىنتىماقتاستىقتى ارتتىرا تۇسەتىنىنە، ال ءبىزدىڭ مەملەكەتتىڭ الەمدىك ەكونوميكانىڭ دامۋىنا بۇدان دا كوبىرەك ۇلەس قوساتىنىنا دەگەن ءۇمىتىن ءبىلدىردى. كەزدەسۋ سوڭىندا ول وسى ساپار وتكەن جيىرما جىل ىشىندە قالىپتاسقان سەنىمدى قارىم- قاتىناستار الەۋەتىنىڭ بۇدان ءارى دامىتىلۋىنا ايتارلىقتاي سەرپىن بەرەتىنىن اتاپ ءوتتى.