14:00, 19 - ماۋسىم 2014 | GMT +5
قازاقستان مەن كورەيا اراسىندا ۆيزالىق تالاپتاردى جويۋ تۋرالى كەلىسىمگە قول قويىلدى
استانا. قازاقپارات - بۇگىن كورەيا رەسپۋبليكاسىنىڭ پرەزيدەنتى پاك كىن حەنىڭ قازاقستانعا مەملەكەتتىك ساپارى اياسىندا اقوردادا ەكى ەل ۇكىمەتتەرى اراسىندا ءوزارا ۆيزالىق تالاپتاردى جويۋ تۋرالى كەلىسىمگە قول قويىلدى.

قازاقستان تاراپىنان كەلىسىمگە ق ر سىرتقى ىستەر ءمينيسترى ەرلان ىدىرىسوۆ، ال كورەيا رەسپۋبليكاسى جاعىنان ءس ءى م باسشىسى يۋن بەن سە بەكىتتى.
بۇدان بۇرىن حابارلانعانداي، سىرتقى ىستەر ءمينيسترىنىڭ ورىنباسارى الەكسەي ۆولكوۆ قازاقستان ازاماتتارىنا كورەياعا ۆيزاسىز ساپارلاۋعا مۇمكىندىك بولاتىنىن ايتقان ەدى.
ونىڭ اتاپ وتۋىنشە، بۇل كەلىسىم جالپى ازاماتتىق ءتولقۇجاتى بار قازاقستان مەن كورەيا ازاماتتارىنا ءبىر ايعا دەيىن ءبىر- بىرىنە ۆيزاسىز ساپارلاۋعا مۇمكىندىك بەرەدى.
«بۇل تۋريزمدى، مەديتسينانى، عىلىمي تەحنولوگيالاردى، ستۋدەنتتەر الماسۋ جانە باسقا دا جايتتاردى دامىتۋمەن بايلانىستى» ، - دەدى ا. ۆولكوۆ.
اۆتور: رۋسلان عابباسوۆ