كەدەن وداعىندا كەدى مەن بيىك وكشەلى اياق كيىمگە تىيىم سالۋدى ۇسىنادى

استانا. قازاقپارات - كەدەن وداعى اۋماعىندا كەدى، بالەتكا، بيىك تىك وكشەلى تۋفلي كيۋگە تىيىم سالۋ ۇسىنىلىپ وتىر.

اتالعان اياق كيىمدەر دەنساۋلىققا قاۋىپ توندىرەدى.

رەسەي پارلامەنتى تومەنگى پالاتاسىنىڭ دەپۋتاتى ولەگ ميحەيەۆ كەدەن وداعىنىڭ تەحرەگلامەنتىنە اياق كيىمدەرگە قاتىستى جاڭا مەديتسينالىق-ورتوپەديالىق تالاپتار ەنگىزۋدى ۇسىنىپ، ەۋرازيالىق ەكونوميكالىق كوميسسيا (ە ە ك) باسشىسى ۆيكتور حريستەنكونىڭ اتىنا ۇندەۋ جولدادى.

دەپۋتات تەگىس تاباندى جانە بيىك وكشەلى اياق كيىمدەر تابان قۇرىلىمىن بۇزادى دەپ ەسەپتەيدى.

ميحەيەۆتىڭ ايتۋىنشا، قازىرگى ۋاقىتتا ەرەسەكتەردىڭ 40 پايىزى جالپاقتابان اۋرۋىنا شالدىققان. «بۇرىن ىڭعايسىز اياق كيىمدەردەن، نەگىزىنەن، ايەلدەر زارداپ شەگەتىن، ويتكەنى تابان اۋرۋلارىنىڭ كوبى بيىك وكشەلى اياق كيىمدەردەن بولادى، مۇنداي كيىمدەر كولدەنەڭ جالپاقتاباندىلىق، بۋرسيت، نيەۆروما سياقتى اۋرۋلارعا شالدىقتىرادى.

ەندى بۇل اۋرۋلار ەرلەرگە دە قاۋىپ ءتوندىرىپ وتىر. ءساندى كەدىلار، لوفەرلەر، وكشەسىز موكاسيندەر دە دەنساۋلىققا قاۋىپتى. مۇنداي اياق كيىمدەر جالپاقتاباندىلىققا، جىلىنشىك بۇلشىق ەتىنىڭ وزگەرۋىنە، اياق تامىرلارىنىڭ تۇينەلۋىنە، كۇرەتامىر قانىنىڭ سوزىلمالى تاپشىلىعىنا سوقتىرادى»، - دەپ مالىمدەدى دەپۋتات.

كەدەن وداعىنىڭ قازىرگى تەحنيكالىق رەگلامەنتىندە بيومەحانيكالىق جانە ورتوپەديالىق تالاپتار جوق. رەگلامەنت تەك اياق كيىم دەتالدەرىنىڭ بەرىكتىگى، سۋ وتكىزگىشتىگى، حيميالىق قۇرامى سياقتى پارامەترلەردى عانا انىقتايدى. ەۋرازيالىق ەكونوميكالىق كوميسسيانىڭ باسپا ءسوز قىزمەتى كوميسسيانىڭ تەحرەگلامەنتتى وزگەرتۋگە قاتىستى كەز كەلگەن ۇسىنىستى قاراۋعا ءازىر ەكەنىن حابارلادى.

دارىگەرلەر بيىك وكشەلى جانە تەگىس تاباندى اياق كيىمدەردىڭ دەنساۋلىققا قاۋىپ توندىرەتىنىن راستايدى. «اياق كيىمنىڭ 4,5 سانتيمەتردەن بيىك وكشەسى تاباندى عانا ەمەس، تىزە بۋىنىن، جامباس سۇيەگىن دە بۇزادى، ايەل ادامنىڭ جىنىس ورگانىنا، جاتىرىنا كەرى اسەر ەتەدى، ومىرتقا مەن ميعا دا اسەر ەتەدى. مۇنىڭ ارتى ەنجارلىققا، زەيىنسىزدىككە، ەستە ساقتاۋ قابىلەتىنەن ايىرىلۋعا اكەلىپ سوعادى»، - دەيدى حيرۋرگ-ورتوپەد ۆلاديمير حوروشيەۆ.

ەسكە سالا كەتەيىك، بۇعان دەيىن كەدەن وداعى اۋماعىندا شىلتەرلى ىشكيىم وندىرۋگە، الىپ كەلۋگە، ساتۋعا تىيىم سالىنعان بولاتىن. بۇل تاۋارلار تەحنيكالىق رەگلامەنتكە ساي ەمەس بولىپ شىقتى. ءبىراق كەيىن ايەلدەر ىشكيىمىنىڭ دۇكەن سورەلەرىنەن جوعالمايتىنى حابارلاندى، ويتكەنى 2014 - جىلدىڭ 1 - شىلدەسىنەن باستاپ بۇرىنعى ەرەجەلەر بويىنشا بەرىلگەن سايكەستىك سەرتيفيكاتتارىنىڭ كۇشى جويىلادى.

اقپارات كوزى: tengrinews.kz