ەلباسى يوردانيا كورولىمەن ەكىجاقتى ىنتىماقتاستىقتى دامىتۋ پەرسپەكتيۆالارىن تالقىلادى

بۇل تۋرالى اقوردانىڭ باسپا ءسوز قىزمەتىنەن حابارلادى.
كەزدەسۋ بارىسىندا ساۋدا- ەكونوميكالىق، ينۆەستيتسيالىق، عىلىمي-تەحنيكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتى ودان ءارى دامىتۋ پەرسپەكتيۆالارى تالقىلاندى.
نۇرسۇلتان نازاربايەۆ پەن ابداللا II حالىقارالىق كۇن تارتىبىندەگى وزەكتى ماسەلەلەر جونىندە دە پىكىر الماستى.
قازاقستان پرەزيدەنتى ەكى ەل جانە ولاردىڭ كوشباسشىلارى اراسىندا ءوزارا سەنىمگە نەگىزدەلگەن جاقىن قارىم-قاتىناس قالىپتاسقانىن ايتتى. بۇل رەتتە ول يوردانيانىڭ جالپى تاياۋ شىعىستا ماڭىزدى ءرول اتقاراتىنىن اتاپ ءوتتى.
ابداللا II قازاقستانعا كەلۋگە شاقىرتۋى ءۇشىن العىسىن ايتتى، سونداي-اق ەلىمىزدىڭ كوپ جىلدار بويعى، سونىڭ ىشىندە سيريالىق بوسقىندار ماسەلەسى بويىنشا كورسەتكەن قولداۋى ءۇشىن نۇرسۇلتان نازاربايەۆقا يوردان حالقى اتىنان ريزاشىلىعىن ءبىلدىردى.
ەكى مەملەكەت كوشباسشىلارى ءوزارا ىقپالداستىقتىڭ الەۋەتىن جۇزەگە اسىرۋدىڭ ماڭىزدىلىعىن اتاپ ءوتىپ، وسى باعىتتا باسىمدىعى بار ءبىرقاتار شارالاردى قاراستىردى.