اقتوبەدە وڭتۇستىك كورەيادان كەلگەن ەرىكتى الەۋمەتتىك شاشتاراز اشتى

سارا كيم ءوز ەلىنەن دەمەۋشىلەر تاۋىپ، سولاردىڭ قاراجاتىنا شاشتارازعا قاجەتتى قۇرال-جابدىقتاردى ساتىپ العان.
«ەففاتا» دەگەن ءسوز كارىس تىلىنەن اۋدارعاندا «اشىلۋ» دەگەندى بىلدىرەدى.
كەڭ ماعىنادا بولاشاقتا ادامنىڭ قابىلەتىن اشۋ دەگەندى مەڭزەسە كەرەك.
بۇل جەردە ەستۋ قابىلەتىنەن ايىرىلعان بويجەتكەندەر ەڭبەك ەتەدى. ولارعا شاشتاراز ماماندىعىنىڭ قىر-سىرىن وڭتۇستىك كورەيادان كەلگەن ەرىكتى ۇيرەتكەن.
قازاقستاندا بولعان التى جىل ىشىندە سارا كيم قازاق ءتىلىن ەركىن مەڭگەرگەن.
ول مۇندا جۇمىس ىستەيتىن قىزداردىڭ قابىلەتىن ەرەكشە ايتىپ وتىر.
سارا كيم، ەرىكتى:
- اقپاراتتى وتە تەز قابىلدايدى. مەن شاشقا حيميا جاساۋدى كورەيادا ءبىر اي ۇيرەندىم. ول ءبىر كۇندە قابىلداپ، ۇيرەنىپ الادى. وعان مەن تاڭ قالدىم. ونىڭ قابىلەتى جوعارى.
گۇلسەزىم توقابايەۆا شاشتى سان الۋان پىشىندە ءساندى ەتىپ ءورىپ، حيميالىق ادىسپەن بۇيرالاۋدى شەبەر مەڭگەرگەن. مەيىرىمدى ءارى ەڭبەكقور قىز مۇندا كەلۋشىلەردىڭ تالابىن تەز ۇعىنىپ، كوڭىلدەگىدەي ساندەپ بەرەدى.
سارانىڭ ايتۋىنشا، كەلۋشىلەر دە قىزمەتشىلەرگە ىممەن بارىنشا ۇعىندىرادى.
ارداق باسەنوۆا، قالا تۇرعىنى:
- وسىنداي ءسان سالوندارىنىڭ اشىلعانى تۇرعىندار ءۇشىن قاجەت. بۇل جەردە ءتۇرلى جەڭىلدىكتەر دە بار، باعاسى دا ارزان. مەن ءوزىم وسى شاشتاراز ورنالاسقان ءۇيدىڭ جوعارعى قاباتىندا تۇرامىن. وسىندا كەلىپ شاش قيدىرىپ تۇرامىز.
سارا كيم ۋنيۆەرسيتەتتە ءدارىس بەرەدى. كورەي دياسپوراسىنداعى مادەني ءىس-شارالارعا بەلسەندى اتسالىسادى. ەندى ول قۇلاعى ەستىمەيتىن بالالارعا ارنالعان مەكتەپ-ينتەرنات تۇلەكتەرىن كوبىرەك جۇمىسقا ورنالاستىرۋدى ماقسات ەتۋدە.
سول سەبەپتى، قازاقستاننىڭ باتىس اۋماعىندا بىرنەشە وسىنداي شاشتارازدار اشۋدى كوزدەپ وتىر. اۆتورلار: نۇرگۇل قوناقبايەۆا، بولات مولداعاليەۆ، ايبەك ءداۋىتوۆ
24.kz