عالامتوردا «بايقوڭىر» ءسوزى ادامدار كوپ ىزدەيتىن ون ءسوزدىڭ ءبىرى
«تۇركى تىلدەس مەملەكەتتەر دەڭگەيىندەگى ءبىر باسقوسۋدا ماڭىزدى ستاتيستيكا ايتىلعان ەدى. ول مالىمەتتە جىبەك جولى دا قامتىلىپ وتىر. سوعان وراي، الەمنىڭ ءۇش ءجۇز مىڭ رەسپوندەنتتەرىنىڭ وتىز پايىزى جىبەك جولىنا قىزىعۋشىلىعىن تانىتقان. ياعني، جىبەك جولى بىزگە تاريحي مۇرا بولىپ تابىلاتىن تاماشا تۋريستىك ءونىم» ، - دەيدى ن. ساۋرانبايەۆ.
ونىڭ ايتۋىنشا، جىبەك جولىنىڭ ىشكى جاعىندا وڭتۇستىك قازاقستان وبلىسىنداعى تاريحي ەسكەرتكىشتەر باستى ءرول اتقارادى.
«جاقىندا ۇكىمەت وتىرىسىندا جىبەك جولىن دامىتۋ ماسەلەسى قارالماق، وندا وڭتۇستىك قازاقستان وبلىسىنداعى تاريحي ەسكەرتكىشتەرگە، وتىرار، تۇركىستان، تاراز، مەركە اۋماعىنداعى مادەني نىسانداردى دامىتۋدى قاراستىراتىن بولامىز» ، - دەدى ۆيتسە مينيستر.
سونىمەن قاتار، ن. ساۋرانبايەۆ بايقوڭىر قالاسىنىڭ تۋريستىك الەۋەتىنە دە نازار اۋداردى. ونىڭ ايتۋىنشا، عالامتورداعى Google ىزدەستىرۋ جۇيەسىندە «بايقوڭىر» ءسوزى ادامدار كوپ ىزدەيتىن ون ءسوزدىڭ ءبىرى بولىپ تابىلادى.
«بىزدە حالىقارالىق تۋريزم نارىعىنا ەنۋگە مۇمكىندىك بەرەتىن وسىنداي تۋريستىك ونىمدەر بارشىلىق» ، - دەدى ول.
اۆتور: قانات مامەتقازى ۇلى
